الأربعاء، 22 فبراير 2006

ظروف قاهرة


الأستاذ عماد خدوري المحترم

اشكر لك اهتمامك الأخوي بأخباري والسؤال عني وأود ان أطمأنك والأخوة الذين يسألون عني بأنني بخير والحمد لله ولكن ظروف قاهرة أبعدتني عن الكتابة أتمنى أن أتجاوزها في القريب العاجل وأعود مرة أخرى حيث إنني أصبحت بعيدا عن الكومبيوتر لأسباب تتعلق بطبيعة عملي ، أنا كما أنا لا زلت مع أخوتي محبي العراق الذي يعيث فيه السياسيون فساداً ونهباً وتخريباً ، لقد إبتلينا بأتفه نخبة سياسية عبر تاريخنا ، انظر إليهم وهم يتصارعون على مقاعد الحكم غير آبهين بالشعب المسكين الذي ينهشه الجوع والعري والخوف ،ـ
مرة أخرى أتقدم لك وللقراء بوافر الشكر على السؤال الدائم الذي يخجلني ويجعلني ألعن الظروف التي أبعدتني عنهم
حفظ الله العراق من كل مكروه وجنبه شر الأشرار من صعاليك السياسة الجديدة،ـ

أخوكم

شلش العراقي

Comments:
العزيز شلش
اتمنى لك كل التوفيق من كل قلبي واتمنى ان تكون الظروف الي دتمر بيها تمر بكل سهولة وتعود عليك بالنفع انشاءالله واذكرك انه شكد مبتعدت اتمنى يبقى صوتك لان قليل الي مثلك فعلا انسان يستحق الاحترام رغم انه احنا بس نقرا وبمكانا لكن يكفيك انه انت اليوم مو مثلنا لان احنا صرنا مثل الشيطان بسبب سكوتنا ابدا لتوكف ودير بالك على نفسك الله وياك
مسلمة
 
عزيزي شلش، اتمنه ان اعرف رأيك باليديصير بالعراق هاليومين. منو فجر المراقد المقدسه؟ أو الاحسن اكول منوا استفاد من التفجير؟ راح تتغير هيكليه وزاره الداخليه و الدفاع مثل مكان مخطط اله و اتصير وزارات اداريه يرأسهه تكنوقراط؟ راح يسمع صوت احد غير صاحب العمه و صك الغفران الجديد؟ صدك اهل السنه هلكد اغبياء بحيث ايكطعون الخبط الي رجعهم للصوره؟ لو هلكد الدوله غبيه بحيث متهدئ اللعب؟

عراقي بوذي
 
صـدك شلـش عندي فـد سـؤال بـمنـاسبة ألأحـداث الأخيـره : أنـت سنــي لـو شيعــي ؟؟

شيعـي متـزوج سنيـه
 
شلوشي حبيبي شلونك ان شاء الله الظروف تمر بسهوله ويسر واسلم على اخويه صاحب التعليق الفوكايه اللي يكول اهل السنه اغبياء
اعتقد قصده ابناء العامه هذا اولا ثانيا اريد اذكره منو حكمه هو واهل العمايم من اجى للدنيا هوه وابوه واجداده ما اعتقد اللي حكم كل هذا الوكت الطويل بزوده مو بزود العمام وهو اقليه مثل متكولون يكون غبي
اعتقد بمعادله شلشيه بسيطه نتوصل الى ان اللي يكول هيج كلام هو عفوا غبي
وبالمناسبه اللي رجعهم للصوره مو خيط الحفافه مالتكم اللي رجعهم زودهم لانه همه اهل زود من يومهم وكل واحد وطبعه
وعيني شلوشي هابي فلانتاين داي
الدوحه تسلم عليك
 
هههه اخويه من الدوحه انته مفتهمت ولا كلمه من الي كتبتهه و اني اسئلتي و باختصار تعني هل من المعقول اهل السنه همه الي ايسوون هيج شي؟ و اني اتصور الي يستفاد من هالتفجيرات ايران لان تبعد عنهه المشاكل و اتخلي امريكا ابورطه جبيره و الاتلاف العراقي لان الشروط الي حيخليهه الحكيم و الجعفري راح تمشي باسم الطوارئ و الظلم و الدين. اني مو سني ولا شيعي اني بوذي و محد حكمني غير عقلي. اني اتفاجئت بالعراقيين مديستخدمون غير العواطف و اشلون ناسين المنطق الا اخويه شلش. عرفت رد الفعل المتسرع وين ايوصل اخي من الدوحه؟ بالصين يستخدمون النمر كرمز لرد الفعل المجرد (الي حضرتك سويته) و التنين كرمز للحكمه الي تستقبل الفعل و تفكر و ترد عليه بالوكت و الطريقه الصحيحه (الي اتمنه ساستنه ايسووه). يا ريت نتعلم منهم
اني و انته اخوبه العراقي (اخويه من صدك مو مال هالايام)
عراقي بوذي
 
اتمنى ان تكون الضروف التى تمر بيها سهله وارجو لك الموفقيه

عراقى
 
وينك شلش تعال مشتاقيلك ترة وبعدين الناس حتمل ترة وبعد متدخل يلة انشالله ظروفك تمر على خير
بااي
رسل
 
عيني شلش هاي وين هل الغبة عسى ماشر, يمعود طولت الغيبة علينا, انشاء الله قضيتك محلولة لدير بال مادام احنا عيشين بزمان الهربجي فكلشي اوكي, عيني شلش الله يخليك انريد نقراء كتاباتك عن هل الديصير من طربكة, بلله عليك اريد اسالك فد سؤال واريد اشوف رايك بيه لان اني صدك مدا تصور ان الناس الي في بلدنا يحملون هيجي عقلية وهيجي فكر اني الي عرفته عن الله بكل حياتي ان الانسان عنده اعظم واقدس من كل شي موجود على هل الارض, زين بس الي ديصير عكس هل الشي , يعني الناس دتتكاتل علمود مرقد او جامع او مكان صلاة , زين كلي هو الانسان يقدس المكان لو المكان يقدس الانسان, اني الي فاهمتة بهل الحياةانه الانسان او نكدر انكول جمع المؤمنيني الحقيقين هو يقدس المكان الي همة بيه, يعني بمعنى اخر اي مكان يجتمع بيه المؤمنين ويصلون او يعملون من خلاله الخير يصير جامع ويصير كنيسة عند ربنا, زين اشو هنانة الاية مكلوبة , الناس دتتكاتل علمود المكان يعني الانسان ديقتل اخيه الانسان علمود واحد ثالث خبيث عبث بالمكان المقدس وخلى هل الاثنين يدذابحون, ثمة هذولة الناس وين جانو لمن حسين كامل مدري علي كمياوي ضرب الائمة , اشو محد فك حلكة, لو هسة باسم الديمقراطية كمنا انخيط ونخربط ابكيفنة, وعلى فكرة ترة اني لامن ذولة ولامن ذولاك اني من غير ربع اصلا وافتهمهة انت.
المهم ارجعلنا بلعجل يمعود ترة طكت ارواحنا
الكاتبة شلشولة ترة مو شلوشة مالتك لا اني اختها شلشولة
 
اخوية شلش ان شاء الله انت بخير و اني اعرف انه ما يريدوك تكتب حتى لا تبين وجوههم القذرة و السودة دنيا و اخرة
بس رح اكول كذب ايران و امريكا اعداء اصلا همه اصدقاء
و لعنة الله على وزير الدفاع الايراني
و لعنة الله على صولاغ الايراني و الجعفري الجبان و الحكيم (الاعور الدجال) و حوبة القران و المساجد تطلع بيهم
و اللهم اخسف الارض بايران و امريكا
صدقت يا سيدي يا عمر عندما قلت:
ليت بيني و بين فارس جبل من نار
و حسبنا الله و نعم الوكيل


ام عمر
 
يا اخوان يا اخوان
يا من تتكلمن عن الشيعة والسنة
لازم تعرفون هذا البلد ما يحكمه الدين
مصايبنا وبلاءنا كله من وره السستاني وهيئة علماء المسلمين .
اريد اقول حكمة على الاقل يتعض بيها الاخ البوذي او ابو الدوحة حتى ما يتعاركون مرة ثانية
الحق يحتاج لرجلين .. احدهما يقوله والثاني يفهمه
وسلامي لاخوية شلش العراقي واكله شلش
لا تحزن ولا تيأس ولا تستسلم لظروفك انت انسان ناجح ، تعرف ليش شلش لان النجاح ((هو ان تنتقل من فشل الى فشل بدون فقدان الحماسة ))
اخوك الصغير
الحسام العراقي
 
شلوشي الورد مايخاف من حر وبرد
نتمنالك العوده السريعه وان شاء الله بخير وسلامه
اما بالنسبه لاخويه العراقي البوذي ومن صدك اخويه ممحتاج ازوك الحجي
فاني اعتذرله واكوله اني فهمتك غلط ومو عيب اللي يغلط يعترف بس العيب يغلط ويكول اني قدس الله سري
و تحيه لاختنا شلوشه وصدك سؤالج وين جانو من حسين كامل كال اني حسين وهو حسين خلي نشوف منو يشور وضرب الحسين والعباس اشو كلها فلتت وين جانو اللي طلعو هسه والدوحه تسلم عليكم
 
الى العزيز شلش،
اتمنى ان تكون بصحه جيده لان قلقنه بده ايزيد عليك.
سلام اليك اخويه من الدوحه وشكر خالص
انشالله يتوفق العراقيين ابحياتهم و يرجع الهعراق بلد ابيض القلب و تلتف ايديه و تحضن الكل بدون استثناء.
سلام
عراقي بوذي
 
Dear Shallooshi,

You are a sweet soul. God bless you and bless all Iraqis.
 
لا اعرف ان كان من اللائق ان ادعوك بالعزيز وانا حتى لم اعرفك ولكن عد سالما فنحن بحاجة الى اناملك السحرية وهي تطبع حروفا ترسم البسمة الصفراء على قلوبنا المعتمه انت والكثير منا محتاجون الى الضحك الى السخريه ولكن قبل كل ذلك الى التغيير شكرا لك
غادة محمد حميد
 
إرسال تعليق



<< Home

This page is powered by Blogger. Isn't yours?