الأحد، 22 أكتوبر 2006

اخرب واتكهرب بعيونة...ـ

.
شكرا للدكتور والاخ الكبير حقا عماد خدوري مرتين ..اولاً لانه انشأ هذه المدونة وتابعها بصبر .. وثانيا لانه تحمل ايميلاتي الجاهلة بكيفية الدخول والكتابة في المدونة، فارسل لي رسائل توضيحية بالتفصيل الممل ...انه حقاً تواضع العلماء.. وعلى الرغم من اختلافات كبيرة في وجهات النظر بين ما أكتب ، وبين ما ينشر الدكتور في مدونته ، لكنه لم يتأخر في نشر آرائي حتى تلك التي تتقاطع بالكامل مع آرائه ..ـ
.
إسمحوا لي ان اشكره من اعماقي ، وانشاء الله اكدر اشيل نفسي وادخل للبلوغ لوحدي واكتب على راحتي.. لان بصراحة يا اخوان تعبت من المقالات ، فقلت يجب ان اتحول الى اسلوب اخر هو اسلوب التواصل اليومي، لان المقالة كمت اشوفها هواية رسمية وجنها لابسة قاط ورباط .. اريد اصير شوية سبورت واخذ راحتي بدون جديات ، وانت تعرفون اني بديت وياكم خوش ولد، ومخلصها ضحك ونكات وقصص عن خنجر وصبيحة وسوادي وباقي ال رحيمة الكرام، ولكن الاوضاع التي تدهورت بشكل عنيف سرقت مني الضحكة ، وسرقت الكثير من روح الدعابة ، وحتى نوبات من اريد اكتب فد شي ساخر، اكول عيب يا شلش ، لا الناس تكول هذا سفيه ، الدنيا بيا حال وهو كاعد ينكّت ، وهكذا يوم بعد يوم شفت نفسي شخص ماخذها جديات. وبعد شوية راح اصير جني مهدي الحافظ ، ميضحك لو يجي مدري منو . ولكن الواقع يا اخوان ان الحياة وخاصة للشعوب الحية (وانا مؤمن بحيوية العراقيين حتى هذه اللحظة) تستمر في اعادة انتاج نفسها، سواء بالبكاء والضحك واللطم والغناء والرقص والفن وحتى هامش الجريمة هو امر مفهوم في المجتمعات ـ (للاسف الجريمة عندنا لم تعد هامشا) ، فقلت ياشلش ارجوك اذا تريد تضحك ، اضحك ، واذا تريد تبجي ابجي، واذا تريد تخربط خربط ، يعني عيش كما انت وبالانكليزي بي يور سيلف ، لتخلي الامل يجف ، ولتخلي اعداء الضحكة يفرحون.. وشكد افرح من نوبات اشوف عرس بالكرادة ، واشوف شباب مطلعين راسهم من السيارات ويصيحون ويركصون واشوف بملامحهم نوع من الانتقام من الظروف التعيسة الي احنا بيها.. وافرح اكثر من يجيني سالم صديقي ويكلي اليوم متواعد وية صاحبتي، وافرح اكثر من اشوف حمودي كاعد بمقهى الانترنت ويدور مواقع مخلة بالاخلاق ، رغم اللافتة فوك راسه تكول ممنوع المواقع غير الاخلاقية.. افرح مو لان اني أييد حمودي بهاي الاشياء ، افرح لان الحياة مستمرة وبيها كل هذا التنوع ...ـ
.
رمضان راح يخلص واني صمت رمضان كاملا ، واكتشفت نفسي اني الوحيد من كل جماعتي صايم ، واقسم لكم انه من شارعنا كله، يمكن لو اربعة لو خمسة صايمين ، وحتى اللطامة ابناء المليشيات وحملة لواء حماية المذهب ، طلعوا صايمين بالجذب، يعني صوم نص ردن ، المهم اني مو رب العالمين ، يوم القيامة كلهم راح يتعلكون من كراعينهم..ـ
.
لو عكب باجر لو الثلاثاء راح يكمل العيد ، لان باجر نص عيد ، وراح اعايد كل الناس القريبين مني اهلي وجيراني واقاربي ، واصالح صديقي رضا لان زعلان علي ، وما ادري راح اعلكها لو لا ... يعني ألـط فـد ربعية ونص عرك لو لا ، ها خنجر شتكول؟!، لحد الان اني ما مقرر، بس من يلتمون الشباب هي تنلاص من كيفها .. الشباب لو تحطهم بجهنم هم يشربون ويغنون ويركصون ، واعتقد ان ما نحتاجه فعلا في هذا الوضع هو الغناء والطرب وشيء من الرومانسيات التي افتقدناها ، لان شوية شوية راح نتحول الى شعب من المخابيل ، والموسيقى وحدها كفيلة باعادة الحياة الى نقائها ...ـ
.
إخواني أخواتي القراء، بمناسبة العيد السعيد افتحوا المسجلات وعلى اعلى صوت ، واحتفلوا وافرحوا حتى لو بالجذب، ترى أعداء كم مهمتهم الاولى سرقة الفرح.. واذا طار الفرح شيبقى من الوطن غير يصير مقبرة .. لا .. منخلي العراق ابو الكعدة الحلوة ابو الامسيات الساحرة يصير مجلس عزاء كبير ، احنا شعب حي ولازم نستمر... ـ
.
لحد يكول شلش بطران قبل ميسمع يمة لدغتني العقربة لحسام الرسام والتي يختمهها بالمقولة الخالدة : اخرب واتكهرب بعيونه

Comments:
مساء الخير وكل عام وانت بخير رغم فراق الخير عن بلد الخير الا انه تفائلو بالخير تجدونه 0
كم انا معجب بكتاباتك واتمنا متحرمنا منها لان كلامك بصيص امل النا نسلي بي رواحنا من الضيم وانا لله وانا اليه راجعون
 
يـــا شـلـش , لـكـن الأرض تـدور ..... !!!!!؟

لا أدري - من يدري ؟!؟ - كيف لعراقي - بسيط اللغة - مثلي أن يتواصل مع شلـش السـهل الممتنع , بكوميدياه السوداء التي تصفعنا أحيانا فيستفيق البعض من غيبوبته الكارثية !!!؟
شــلش يا بسمة العراقي النازف بكبرياء ,يا من يذكرني دوما و أبدا أن أشد نوبات الضحك الهيستيري لا تفرض حضورها الا في مأتم عزيز لم ننفض أيدينا من تراب قبره بعد .....- على الاقل في حالتي أنا - , شلش الورد - هكذا حاف بلا لقب أستاذ الذي حمله شعيط و معيط - , تمنياتي لك و للعراق و العراقيين بعيد أقل حزنا - و لا ابالغ بالتمني فأقول : عيد سعيد - و بعام أمن و أمان و تحرير و أستقلال و أستقرار , تحية لــك من أبطال المقاومة الوطنية العراقية الذين لا يجدون في كلماتك الا ترجمة حقيقة لما يعيشونه و يعتبرونك مقاوما حقيقيا ما دمت تعرّي كل الجرائم التي ترتكب بأسم المقاومةو التحرير , و قد لا تصدق أن كل عراقي أصيل من أباة الضيم يفهم أنك أنما تجلد بكلماتك مجرمي - المـقـاولة اللقيطة !!؟ - من صداميين مدحورين و بهائم التكفير المفخخة , و لا يعتبرونك تمس بهم من قريب او بعيد لأن الله و العراق يشهد على طهر أياديهم و سلاحهم من دم كل عراقي برئ , بل و من دم و عرض و مال كل عراقي و قع في شبهة العمالة و الارتزاق - الاّ عراقي حمل عليهم و عليكم و على عيالهم و عيالكم السلاح - ز

تمنياتي لك و لنفسي أن تبقى مسلحا بأبتسامتك الاشد وقعا على أعداء الفرح العراقي من رصاص الابطال , ليعلموا أن روح العراقيين عصية على التحطيم

و عسى أن نلتقي يوم تشرق شمس الحرية و تنقشع غمامة الأرهاب - الكوكتيل - فلا نخشى عليك من (دريل ) بدري أو سيف زرقاوي أو أبو غريب أمريكي , فتمشي ثملا جذلا و رائحة - العرق المستكي ! - تفوح من أعطافك ( مع تحفظي الشديد على تناول المنكر !! ) و عندها اتمنى أن يعرف الجميع من هو شلش العراقي

تحيةحب لك من كل الرفاق و أيظا من د. خير اللـه سعيد بن مدينة الثورة البار
 
ايامك سعيدة شلش الوردة
 
أستاذي أنته شلش
أرجو أن تسمحلي اضيفك الى مدونتي

كل عام وانت واني و كل العراقيين بخير, ما أعرف شأكول بعد.
 
شونك شلش....ايامك سعيدة حبيبنا

الشيء الوحيد اللي جابته أمريكا زين للعراق هو انه خلتنا نسمع صوتك..بس اكو شغلة مهمة كلش كلش باعتبارك مرجع كبير لازم مقالاتك القديمة اللي كتابات شايليها كلها ترجعها اهنا بشرفك زين؟ لان اني جنت بالعراق طابعهن و مسويلهن فايل و خازنهن بالحاسبة و هسه راحن....

و بعدين رحم الله والديك انت مفد يوم ضحكتنا ببلاش...كل حجيك جان بيه معنى, ادري الظرف صعب بس احنا نجي عليك علمود تنسينا.

و في الختام اكو مجتمع مدونات عراقي بس معظمه بالأنكليزي و ينرادله واحد مثلك جلفي علمود نبطل تفياك.
 
Konfused kid

إشارة الى طلبكم من شلش:ـ

ـ"لازم مقالاتك القديمة اللي كتابات شايليها كلها ترجعها اهنا بشرفك زين؟ لان اني جنت بالعراق طابعهن و مسويلهن فايل و خازنهن بالحاسبة و هسه راحن...."ـ

أود أن أعلمكم بأننا قد إحتفظنا بكافة مقالات شلش، ومنذ أول مقال له في 25 أيلول 2005 ، وان كلها متوفرة في هذا الموقع وتحت أبواب الأرشيف على يمين الصفحة.ـ

أرجو إعلامي عن عدم ظهور أي منها.ـ

عماد خدوري

 
هلو شلش شلونك ان شاء الله بخير يارب ويكثر من امثالك بصراحه اني من اقرا كتاباتك بصراحه ابجي واضحك بنفس الوقت بس حبيت اتعلقلي على موضوع حيل موضجني ياريت تذكره اكولك ماتكولي شنو سالفه الحجاب المفروض والله ضجنا هسه الزرقاوي مات وماحجبنا وفوكاها اجوي المليشيات شلون يعني ؟؟
 
إرسال تعليق



<< Home

This page is powered by Blogger. Isn't yours?