الخميس، 26 أكتوبر، 2006

شلش بالتبني !!!!ـ

اليوم الجو جان كلش حلو ، غيوم وزخات مطر خفيفة ، لكن الثورة كعادتها لاتحب الاجواء الجميلة . انه قدرها وحظها الاسود والمصخم ، فبدل ان تعيش يوما من ايام العيد كباقي مدن الله ... تسربل في شوارعها من الصباح الباكر ، نشالة ابودرع وقفاصة حجي محمد ابو مريم ، لملاقاة الطائرات الامريكية والدروع والمارينز الذين جاؤا لالقاء القبض على ابو درع ، الله يرحم ايام زمان، والله اربع انضباطية جانوا ياخذون نص الدربونة ومحد يفك حلكه ، هسة اكبر امبراطورية بالعالم جاية على ابو درع ... عشنا وشفنا .. المهم ، ركض ودربكة بالدرابين، وفليح الاطرم يوزع المهام على المقاتلين الاشاوس، ويحذر السكان من مغبة الخروج من مساكنهم، واطلاق نار عشوائي، ناس ماتت وناس انجرحت وانتهت القصة باحتفال جماهيري حاشد بقيادة عضوي الكونغرس العراقي فلاح شنشل وكريم بخاتي.. هوسات وطربكة وشجب واستنكار وصور القائد ومشهد قديم شايفه الف مرة ،من ايام الزعيم لحد الان .. واني بنص هاي المعممة لاماكل ولاشارب ، اريد اشوية ارتاح ، اكتبلي جم كلمة محد مطيني فكه ،عبالك كاعد بالجبهة مو بالبيت ، شمسوي ياربي ، ليش هيج ، اريد ارتاح جم يوم ، ليش العمر خلصناه قهر بقهر ،سنة كاملة لطم ، واجه العيد هم كلبوا الجماعة مناحة وقهر ... هسة ليش انولدت بهاي البقعة المباركة . يعني الا بالثورة. ليش ما الله خلقني صيني .. فليبيني ، موزمبيقي ، حتى لو فرنسي هم ميخالف ، يابة لو من ملاوي هم اني قابل ، على الاقل بملاوي تجي مادونا وتتبناني ، الله .. تخيلوا شلش امه مادونا ، يومية الصبح اكعد اغسل وجهي وافرش اسناني وامشط وابوس ماما :
هاي مامي.. هاو ار يو تو دي ؟
تبتسم ماما وتحط ايده على شعري .وتكلي من كل كلبها : هاي بيبي
بيبي .. والله هي كالت بيبي اني شعلية،ليش تغارون ؟ شبيكم مشايفين اجانب ؟...بيبي ونص وغصبن على شواربكم ... مستكثرين علي بيبي يا معدان ..هيج ويسويها البخت واعيش حياتي بكنف مادونا ، والله احسن مليون مرة من كنف حجي ارحيمة .. هو منيله كنف ... حجي ارحيمة قنفه ماعده .
الله بشرفكم خلوني احلم .. لحد يكعدني .. ماما تروح لباريس تاخذني .. تروح للمكسيك على عنادكم هم تاخذني ...تروح للزيارة تاخذني .. تروح للسوك هم تاخذني .. انجب لك ، هي مادونا تروح للسوك ، صدك متخلف ..
يعني شيصير لو صدك مادونا تتبناني .. جان شاكيرا صارت جيرانا وبيت جوليا روبرتس ورانا وبيت جنيفر لوبيز شوية ليغاد من الفلكة .. وعلى ايدك اليمنى اول متلوف بيت برتني سبيرز وبراس الشارع يم ابو الصمون بيت كاميرون دياز ..
اخوان بشرفي، بشرفي اذا مادونا تتبناني اطيكم كل واحد ورقة ،ميت دولار كاملة ... كلكم اطيكم ، انعل ابو الفلوس ... شنو قحط ..الفلوس وسخ دنيا ،
تخيلوا من اصير ابن مادونا افتح التلفزيون يطلعلي عدنان الدليمي .. راسا تلعب نفسي ..ادوخ .. التلفزيون يكوم يهتز . عوع .. هو از دليمي ، .. هي از ديرتي، اي هيت هم ...اي هيت هم ..اي هيت هم ..واو ... هاي افري بدي ، ايام ذي سن اوف مادونا ... ماي مام از بوب سنغر ، هاي مستر مالكي .. هاي مستر هكيم .. هاي الاوي .. هاي مهدي الهافز .. هاي مس سفية سهيل .. هاي دير مستر مشئان .. هاي تلباني اند برزاني اند بولاني ، بليس وير از مستر سولاغ لونك تايم نوت سي هم ، تيل هم هلو بليز ،باي سي يو ...
مادونا بشرفج وانت اشرف من الجمعية الوطنية ، ليش رحتي لملاوي تتبنين طفل، جان حجيتي ، مو اني هم طفل بريء وما عدي احد ... والله يتيم ومشتعل جد جدي ،، ليش مادونا ليش .الله يقبل ...
يابه ملازم مادونا ، ماكو وحدة مطربة ، راقصة ، كاولية ، تجي تتبناني وتخلصني من جيش المهدي

Comments:
كل عام وانت بخير
اعجبتني كثيرا اسلوب الكتابه بهذه الطريقة واعتبرها احسن من المقالات وخاصة اذا كان التعليق يتعلق بمواضيع تستجد كل يوم
بالتوفيق
 
اموت عليك!
 
ايامك سعيدة شلش
والله اني ماعايدت كل احد ، بس انت تستاهل لانك عراقي شريف وسلملي على جيرانكم شاكيرا وكلها تعالي للعراق بلكي على وجهك تنفض مشاكلنا..اشكرك على هاي الضحكة بهذا الزمن القاسي
اخوك الشاعر جواد الشريفي ابن مدينتك
 
عيني ابن مادونا فد لطولك .. خاف تروح تسوي مادونا شيعية وتلبسها بوشية... شكرا لهذا المقال الجميل انشاالله تتواصل كتاباتك

سلمى
 
حضرة الاخ العراقي جدا شلش المحترم، السلام عليكم ورحمة الله وبركاته،


أولا احييك على كتاباتك الرائعة المثلجة للصدور، وثانيا وحتى لا أُطيل عليك فتهمل رسالتي، أسمح لي بالولولج الى الموضوع بدون مقدمات،

منذ حين وحلمٌ يراودني بفترات، فأجد نفسي أقترح طريقة جديدة للأنتخابات تطبق في العراق وكما يصفها الحلم أو الرؤيا فهي تصلح للعراق والعراق فقط. ملخص الرؤيا ان يستخدم الناخبون أصبعهم الأوسط - أو يدهم كلها إن دعت الضرورة- للتتشح بلون حبر الأنتخابات على ان يكون لون الحبر مميزا لكل مرشح مع الغاء فقرة البطاقة الإنتخابية وصناديق الإقتراع وعلب الحبر لإنتفاء الحاجة لها حيث سيتسنم المرشحون مسؤولية علب الاحبار وصناديق الإقتراع في آن، بينما تكون أيادي الناخبين بطاقات انتخاب تشفي غليلهم من مرشحيهم
. أرجو أقتباس رؤياي هذه في كتاباتكم ولكم الحق بالتصرف بها أنى شئتم لضرورة أدبية أو دواعي نشر ولكم مني كل الأحترام والتقدير

أخوك مو شلش العراقي
 

نقلا عن وكالة الصحافة الفرنسية

حيث اكد السكرتير الشخصي للرئيس الايراني الدكتور فاضح كل اسراري ان الرئيس الايراني يروم اجراء تعديلات وزارية او بالاصح اجراء تغيير وزاري شامل لاعضاء الحكومة الايرانية
وردا على سؤال لوكالة الصحافة الفرنسية حول الاسماء المرشحة لشغل المناصب الوزارية قال الدكتور فاضح
هناك اسماء كثيرة والامر لم يحسم بعد ولكن اوفر المرشحين لشغل المناصب الوزارية هم كل من
وزير الدفاع السيد اكبر مدفعجي
وزير الداخلية السيد قامع تظاهراتي
وزير الاتصالات السيد خابرته رأسن جاني
وزير الزراعة السيد زارع اكبر بيتنجاني
وزير العلوم السيد محلل ادراري
وزير الصحة السيد خابط ابرتي
وزير التجارة السيد موزع حصتي
وزير الكهرباء السيد مشغل مولداتي
وزير العمل السيد كافر بكل عمالي
وزير النفط السيد تارس صوباتي
وزير الطاقة السيد مفجر آباري
وزير ة شؤون المراة السيدة ستر الله فوطتي
وزير الخارجية السيد فاتح اكثر بعثاتي
وزير الري السيد حافر آباري
وزير الدولة للشؤون الدينية السيد مؤدي كل صلواتي
وزير النقل السيد مشغل كياتي
وزير التربية السيد غلام معلم اطفالي
وزير التعليم العالي السيد جامعي تخليص عيالي
وزير الثقافة السيد عارض اهم ثقافاتي
وزير التخطيط السيد مدبر اموري
وزير الصناعة السيد صانع اهم احتياجاتي
وزير المالية السيد مزور عملتي

هذا واكد السيد فاضح ان هذه الاسماء قابلة للتغير وحسب قناعة السيد الرئيس

 
شلش:
ما اصل سيد (لكو) او ملا (لكو) ..
ما اصل هذه الشخصية؟

مع الود..

عبد الزهرا جبر
كوالالمبور
 
شلش والله انت روعة , طرا على بالي شلش اللي في مسلسل بيت الطين :)
 
إرسال تعليق



<< Home

This page is powered by Blogger. Isn't yours?