الأحد، 29 أكتوبر 2006

مشاعر شلشية

خلصت المظاهرة السلمية مال جماعة مقتدى، والناس تفرقت ، دوام ماكو ... وحتى اذا واحد راد يطلع شوية ، هم الطرق كلها حواجزوتفتيش ، والامريكان بكل مكان ، ضايعلهم واحد ويدورون عليه ، كلبوا الدنيا عليه ،هو مجرد جندي ، قحط ، شبيكم مشايفين جنود ؟، هاي انتوا لو ضايعلكم وطن مثلنا شتسون؟؟ ، يمكن تحفرون المريخ ،والمشكلة الجندي مالهم الضايع من جماعتنا ، خطية عود فلت لامريكا المسكين وهناك، هم ما كعد راحه ، راح اتطوع بالجيش ، شلون فكَر بامريكا ولبس ابو خليل ، دروح لهوليود صير كومبارس ، روح اشتغل مطرب شعبي مثل اخوانا الملونين ، وبأمريكا اسهل من الغناء ماكو ، البس نص بنطرون وشكك هدومك وجيبلك جم وحدة سمرة طوخ من الكَيارة وكوم صيّح " اي لوف يو"، راسا يحطوك بفرقة ففتي سنت ، يابه ملازم ففتي سنت ، سويلك فرقة اسمها ، خمسين فلس واذا ماقبلوا بالعملة العراقية سمي فرقتك" نص ورقة "،.. يعني مالكيت الا تصير نايب عريف ، وفوكاها تجي هنا وتضيع واحنا نبتلي من وراك ،صار اسبوع مطوقين بغداد والناس كاعدة ببيوتها لاحس ولاحركة ، حتى مؤتمر المصالحة من وراك نقلوه بلندن، لان هناك الطرق يكولون مفتوحة .بس ترى هاي حلوة مال نتعارك بابو سيفين والفضل ونتصالح بلندن . لك احنا رحنا للكعبة نتصالح ماصارتلنا جارة ، بلندن راح نتصافى ؟، اخوان اذا واحد زعلان عليَّ خل يجي بلندن نتصالح ، والله جديات خل يجي بلندن ، يلكاني جوه الجسر . بس على شرط بعد ميسويها ..
المهم ، لبست بنطروني وقميصي وكعدت بالركن يم البلوكة ، كلت بلكي يجي صديق منا منا ونكضيها سوالف .. ورا شوية ، كلبي كام يدك ووجهي صار اصفر وايدية كام ترجف ، شكو ؟ اجت خديجة المعلمة ، اليوم طلابها اخذوهم للمظاهرة وهي راجعة مشي سودة علي .. حضّرت نفسي وهيأت جم كلمة حلوة واستعديت ، خديجة اقتربت .. وصلت .. صارت كبالي ...صرنا وجه بوجه ، كَِلبي كَام يدك اسرع..الزموني راح اموت .. كمت ارجف ... خديجة فاتت ماعبرتني .... لا كلام ولا سلام ..شايلة خشمها .. ليش ما ادري؟ .. كعدت اتذكر.. اني مسوي شي غلط ؟...
لا والله وحياتكم صارلي شهرين جار عدل ... لاسكر ولاعربدة ولامغني بصوت عالي ولا متحرش بمرة اخوها ، لعد هاي شبيها .. ليش هيج لبستني .. يابا خل تروح شنو قحط بنات ..شلش هاي شبيك والله الف وحدة تتمناك .. بعدين ترى خديجة مو حلوة .. يعني موذاك الجمال ..وشوية مغرورة .. اني شخابص نفسي ..ومثل يكول المرحوم سعدي الحلي " حبيبي امك متقبل من احاجيك " بس هي ليش ما سلمت ، خاف ماشافتني ، شنو ماشافتني ؟، قابل اني بريعصي ، رجال شطولني شعرضني .. يالله خل تروح .. هاي مو اول مرة ... ياما سهرنا ليالي وياما صعنا وتركنا الدراسة وعفنا الاهل ونسينا المستقبل وياما غبنا من الجيش وتحملنا اهانات العرفاء ، وياما تعبنا ويامنا وكفنا براس الشارع وتحملنا قهر ومطر . وياما الشمس شوتنا وياما البرد موتنا.. شحصلنا ... ياهو نكول عليها هاي بت اوادم ، تطلع مصادقة سطعش واحد وبالاخيرتتزوج واحد حواسم ، لازم انسى خديجة وابو خديجة .. عائلة كلهم حقراء ..وابوها اكبر ارهابي .. واخوها علاس ، وعمامها بحارة باكو النفط مال البانزينخانة ، بعدين مريم بت حجي فارس احلى منها الف مرة .. وتشبه مريام فارس ، اسم على مسمى ... تعرفون مريام فارس ؟..لا بشرفكم ؟ صدك متعرفوها ؟ اكو واحد ميعرف مريام ؟.. اذا نانسي عجرم صاروخ ، فمريام فارس حاملة طائرات ...شعرها وحده يسوى الف خديجة ... اليوم عليها .. اليوم راح الوصها ..اليوم ادوّخ الجمجمة و صدك راح انسى خديجة وعشيرتها وبالقندرة , بعد ما عبرها حتى لو تبوس نعالي ، خل تعرف اوادمها مو عبالها اني ميت عليها ، الكرامة فوق كل شيء والمقاومة حق مقدس لكل الشعوب...والله ودعاتكم اني ما ادريلها بال ، بس اكول خطية . نوبات تكسر خاطري واجاملها ، بس بالحقيقة مو هي فتاة احلامي .. لايابا خديجة منو .. اصلن متجي ابالي لو ما الفراغ والضوجة والكهرباء مكطوعة وشبكة تلفون ماكو ومقهى الانترنت معزلة وماعدي شي اتلهى بي ... اسكتوا .. اسكتوا اجت خديجة .. بشرفي هي ، اعرفها من صوت حذاءها .. اي والله هي .. اجت اجت .. فدوة لهل المشية ..وصلت.. اسكتو

ها شلش شلونك، اشو كاعد هنا
. . . . . . . . . . .

والله مشتاقتلك وينك صار يومين ماكو

. . . . . . . . .

حياتي شلش
. . . . . . . . . .

لك شنو هــــــــــاي ، ارتفعت درجة الحرارة .. صخنت .. راح اموت .." حياتي شلش ".. احلى اغنية بالعالم .. خدوج انت عمري، انت حياتي ..كل عشيرتي تروح فدوة لقندرتج.. ها يابا مو كتلكم خديجة ماشافتني .. مسكينة تعبانة .. خدوج احلى وحدة بالعالم والله .. خدوجة لو يشوفوها الامريكان راسا يعوفون الجندي التايه مالهم ويجلبون بيها .. خدوج ملكة جمال الكون .. قمر القطاع وكهرباء المحلة ..خدوج مولدة 700فولت تغذي القطاع مشاعر واحاسيس،خدوج تكهرب الرصافة من تضحك ومن تبجي يعزل الكرخ ، والله مشيتها موسيقى .. قابل هي مريم بت حجي فارس العوجة .. مريم ام سنون .. مريم ام رعيصة .. ام كمزة .. انعل ابوها لا ابو حجي فارس وياها .. وحدة دايحة .. عاوية ..متوصل لقندرة خدوج ..
حياتي شلش
حياتي شلش
اكلكم انتوا سمعتوها كالت حياتي شلش؟ ، لو اني ما مركز ؟!.. خاف لبستني واني متوهم ... واذا لبستني احرك ابو ابوها بت الكلب.. لا اني هم لبستها شفتوني شلون درت وجهي ومارديت عليها.. اصلا ولا عبرتها شنو قحط نسوان .. الف وحدة..... اسكتو .. اسكتوا رجعت خدوج ..........ـ..



Comments:
إيدك بالدهن خاللللللللي...
والله صار لك هواية ممضحكنا هيجي مثل كبل كلها كاعد تحجيلي كراريس وطنية...عمي هيجي انريدك....و فدوة لخدوج وين خنجر...صار زمان...

والله الا انتخبك.
 
و الله ما اعرف ليش ما اصدك انه انت عايش بالثورة رغم انه تحجي تفاصيل كلش دقيقة عن هاي المنطقة
مجرد احساس
 
يمعود انت وحدك تسمع هية وين كالت شي البنية
هاي احلام اليقظة شلش
سلامي
 
خنجر انت ليش متعوف الرجال بحاله مسكين خلي مصدك.. الحجي بيناتنا ترى هي ماكالت اي شي هو ديحلم خلي يحلم
 
اهلا وسهلا شلش
فرحت بعودتك لانك تعبر عما نقول بابسط واوقع الكلام وكما يقول المثل العراقى (تنكش من القلب دود)
 
شكرا لهذه العودة التي كنت اتمناها ، واتمنالك التوفيق بحياتك لانك عراقي من صدك
 
والله عاشت ايدك عمي تدري اني معجب بيك من ايام ( سليمة الى استراليا بحفظ الله ورعايته) صدك كلامك على الجرح يلتهب العفو يطيب...
لو ترشح الى مجلس البلدية والله لانتخبك ابو خدوجة
 
so funny.
but what i dont get, how the hell does a guy living in thawra, with all respect, know 50cent?
 
فيييييييييييييييييييييكه أبروح ؤبوي , اكول اكدر ألنك للموقع مالتك؟... و تحياتي
 
والله عمي شلش تستاهل وديربالك عليه من الطصات ....واشوف لو متطلع بيه وتنتظر علمه يبلطون الشوارع... يعني مبقه شي لسنه 2018 اصبر.

شلش مو تلتهي بالسياره وتبطل كتابه.
 
Shalash,

I can not say much. I read your blogs, and i can see the real Iraqi (aseel) who is really concerned about his Country, the great Iraq. I just wish that all iraqis are like you, Hope Allah will protect you and all Iraqis.
 
dudانا استمتع بقراءة مقالاتك استاذ شلش اعتقد ان الاعلام يجب ان يعطيك الفرصة

http://www.nadyelfikr.com/viewthread.php?fid=2&tid=45042#pid373826
 
السلام عليكم
اخي العزيز شلش
احييك على كتاباتك واني واحد من المعجبين الي هسة صاروا بالملايين صدك بالملايين والكل تحجي بيك وخاصه في الامارات فهنا صرنه نترقب كتاباتك لحظة بلحظة ونحب نقراها ونضحك على طريقتك الجميله والمسليه والمفيدة بنفس الوقت وصدك شر البلية ما يضحك
اخي الغالي صحيح يبقة بس العراق وهذولة كلهم ينكسحون وينتهون بس كون يجيلنه واحد بوذي يحكمنه ها شتكول؟ حتى لا انت كتلت علي ولا انت كتلت عمر وتستمر الحرب السخيفة حول قميص عثمان الى بعد فد الف سنه .
اتمنى ان اكون ما ازعجتك واني احب انشر مواضيعك حتى الي ما قاريه يجي ويقراها والى مزيد من الابداعات

اخوك ذيب العراق
 
إرسال تعليق



<< Home

This page is powered by Blogger. Isn't yours?