الأربعاء، 8 نوفمبر، 2006

صارت بالهاونات

.
الاعظمية تحت رحمة الهاونات، والكاظمية تحت رحمة الهاونات، والباب المعظم والكريعات وهنا وهناك دك هاونات .. شنو هاي اللعبة الجديدة ؟، ليش كل ماينسد زاغور يطلع غيره؟ ومنو ورا فكرة الهاونات الجهنمية؟ـ
.
لحد يكلي الاحتقان الطائفي، الاحتقان الطائفي نتيجة مو سبب، لحد يحط عربانة علوان كدام الحصان، شنو يعني الاحتقان الطائفي؟ وليش اكو احتقان طائفي؟ ومنو استورد الاحتقان الطائفي؟ـ
.
ذاك اليوم احنا نهتف اخوان سنة وشيعة وهذا الوطن منبيعه، ليش انكَلبنه محتقنين طائفيا وبهاي السرعة ؟،اني وبخبرتي المتواضعة اكَول الهاونات مصدرها واحد، وهذا المصدر معروف بالنسبة الي على الاقل، وبشاركني بعض الاحيان عبد الرضا صديقي، المصدر هذا يا اخوان هو نفس المصدر الذي يريد تقسيم العراق بسرعة بحجة ما كو جارةـ
.
الاحتقان بلغ مستوى خطير، والتعايش صار صعب. شنو التعايش صار صعب، و ليش ؟ همة اهل الثورة قابل كلهم كاعد يطلقون هاونات لو اهل الاعظمية كلهم كاعد يردون بالمثل على الكاظمية والكريعات، لو جان هذا صحيح جان ما بقت نملة حية تمشي بشوارع بغداد، بس هاي عصابات مدربة تدريبا جيدا ومعدة اعدادا كبيرا لهذه المهمة القذرة، وبعدين اذا اكو بيكم عسكري يصححلي ـ الهاون سلاح دفاعي لو هجومي ؟ !!ـ
.
الهاونات تنطلق من ساحات حي اور ومن شرق القناة ومن الطالبية، ومن جهة الاعظمية ما ادري منين، اهل الاعظمية اكيد يعرفون، واذا قوى الامن غير قادرة على تمييز المفخخات، فان الهاونات ليست كذلك، فانها تنطلق والجميع يسمعها والجميع صار يميز مكان انطلاقها، المسألة خطرة والهاونات خلتنا منشوف طريقنا، واحترنا مندري انباوع على الطريق خاف اكو عبوات، لو نباوع ليكدام خاف اكو مفخخات، لو نباوع على السماء خاف تمطر هاونات،ـ
.
اني امنيتي بهاي الظروف الحقيرة والصعبة ان لا يقول ابناء الاعظمية : اهل الثورة يضربون علينا هاونات.. ترى والله محد من عدنا قابل بهاي الجرائم، واخوانا اهل الكاظمية، ترى اهل الاعظمية ميسوون هذا الشي المخزي، وعلينا ان لا ننسى موقف عثمان وهبة اهل الاعظمية من اجل اهلنا بالجسر، واهل الكريعات ترى انتوا والاعظمية اهل، واهل الهاونات لا من عدكم ولا من الاعظمية، عمركم محد ضرب طلقة باتجاه الثاني، هاي السوالف ترى ميسويها عراقي، واذا سواها عراقي مقابل جم دولار، فهذا العراقي امه متصرفة مو صحيح بشبابها، لان الشريف ميضرب عامي شامي على النساء والاطفال والشباب الحلوين ويخيلهم ميندلون طريقهم،ـ
.
هاي الاعمال مو طائفية ولا الها اي علاقة بالاحتقان الطائفي، هاي الاعمال هي تريد تصعد الاحتقان الطائفي، حتى الطائفيين الكبار يكولون ـ ها يابا شفتو الوضع ؟ لايمكن ان ننسجم بعد اليوم، صارت بالهاونات ولازم ننفصل، ـ
.
اخوان هاي لعبة مكشوفة ومفضوحة، تعالوا نحط ايدنا بايدكم وحتى ما تفرقنا الهاونات الخبيثة، خل نجلب بركبة العراق، ترى هاي الهاونات سياسية، وتحمل رسائل سياسية ونوايا خبيثة للتقسيم والاقتتال، ولازم نعرف منو من مصلحته نتقاتل بالهاونات غير السياسيين الذين عوائلهم خارج الخطر، وخارج العراق وهم شخصيا محصنين بالحراسات والمباني الشاهقة، وما اعتقد واحد من الثورة بيته يوكع بدفرة وبركبته خمسطعش نفر، يريد حرب هاونات ، لا ماكو هيج حجي ، هاي متعبر علينا، بس نحتاج صبر اسطوري وتفكير صحيح حتى نعبر محنة الهاونات..ـ
.
اليوم بجيت بجيت الى ان نشفت دموعي ، على اهلي بسوك مريدي، وبجيت على اهلي بالاعظمية وبجيت على اهلي بالكاظمية ومنين ما ادير وجهي اهلي ديموتون واعدائهم فرحانين .. اعرف الصبر صعب بهاي الظروف والمحنة جبيرة وكاعد نفقد اعزاء، بس ما عدنا خيار غير الصبر وكشف اللعبة شوية شوية .. احنا بالثورة راح نشكل مجموعة رصد الهاونات ونريد من عدكم تشكلون مجموعة بالاعظمية وباقي مناطق بغداد، وننشر اسماء القتلة المجرمين ونشوف شنو رد المالكي والزوبعي عليهم حتى تنكشف الامور ..ـ
.
صبرا ياعراقيين وانتوا اهل الصبر والظالم يومه قريب ، تصبحون على خير والله يبعد عنكم شر الهاونات،ـ
.
اخواني اهل الاعظمية بوسولي كل طفل خايف من اطفالكم وكولوله شلش وعشيرة شلش فدوة لدمعته، والله احنا اهلكم وننقهر عليكم مثل ما نقهرنا اليوم على الفقراء المساكين ضحايا الارهاب في سوق مريدي ...ـ

Comments:
اخواني اهل الاعظمية بوسولي كل طفل خايف من اطفالكم وكولوله شلش وعشيرة شلش فدوة لدمعته والله احنا اهلكم وننقهر عليكم مثل مانقهرنا اليوم على الفقراء المساكين ضحايا الارهاب في سوق مريدي

والله انت اشرف عراقي شيصير لو كلنا مثلك انت منين جايب هذا الشعور الوطني
الله يحفظك ويكثر امثالك
اخوك ابن الحارثية
 
والله زمااان
يا شلش زماان ...!!!
كل احنا نصير جف ونمسح دموع الشلش ...؟؟؟
 
والله زمااان
يا شلش زماان ...!!!
كل احنا نصير جف ونمسسسح دموع الشلش ...؟؟؟
 
< والله زمااان
يا شلش زماان ...!!!
كل احنا نصير جف ونمسسسح دموع الشلش ...؟؟؟ >
 
كلام سليم وصحيح، مية بالمية عيوني شلش اعتقد لو تطلع الأحزاب بعد فشلهم جميعا بدون استثناء ويتركون الحكومة والوزارات والمحاصصة وكل المصطلحات الجابوهه وياهم ويروحون لبلدانهم، كان عشنا بسلام ووئام وأطمئنان لا احتقان ولا توتر سنة، شيعة، أكراد، عرب، حتى أم اللبن ترجع تمشي بشوارع بغداد ومحد يقول لها على عينج حاجب.
 
اخويه شلش
الصبر موجود والا مجان باقين الناس لي هسه عايشه وساكته
بس نكول للناس لتسكتون على عبد الانفصال الحكيم و عدنان الطائفي
 
I can assure you Shalash that no one will translate your post. People reached a point of being in the defensive and would rather accuse each other and leave Iraq to crack.
Everyone is accusing and accusing and don't want to hear the other.
 
رحم الله والديك بس ترى الناس خايفة من بعضهه و بس السرسرية هسه صارت بايديهم...لازم الناس العادية تتحرك و تكول...و بعدين انت تدري الأعظمية بيهه هواية بعثية و هذوله ورا اعدام صدام راح يبطلون و يدورون مصلحتهم...بس خوفك من المهدي لان ذوله موقفهم راح يقوى و هسه بس أملنا انه يخسرون قواعدهم الشعبية المبنية على الخوف مو الحب...بس اذا على كولتك اكو ناس مصلحتهه الخوف فشراح يكضيهه...الله يستر و شكرا على عرافيتك الخالصة

من الأعظمية
 
بسم الله الرحمن الحيم اللهم الهم العراقيين المجاهدين الصبر والحكمه وربي ينور بصيرتهم ومتنطلي عليهم الاعيب الامريكان والصهاينه الدمويه ومع الاسف يساعدهم بعض ضعاف النفوس من الخونه والجبناء الذين يقتلون العراقيين بكل اشكالهم فوالله القاتل نفسه والمقتول والضحيه نفسه القاتل دائما امريكاواسرائيل والمقتول هو الشعب العراقي البطل الذي بعون الله يوم بعد يوم يكشف الاعيب الدجاليين ويتمسك بوحدهشعبه ووحده مصيره وحسبنا لله ونعم الوكيل معن فخري من بغداد
 
عاشت ايدك
اكتب و الهوا بظهرك اكتب و طلع الخيسة مال سياسين هل وكت عيني شلش من اقرأ الكتابات اكول وية نفسي لو كل العراقيين يفكرون مثلك جان صار براس العراق خير يلة احنة نصبر و ناكل هاونات و الاخوان بالمنطقة الخضراء ياكلون ستيك بالفلفل الله يرفع هذه الغمة عن هذه الامة
 
و الله ياشلش انت حجيك كله على الجرح بس منو يقره منو يكتب و الناس تهجولت لامنهة ولاعليهة و شلون احنا ميصير براسنا خير مو تعبنا و المشكلة بس الزينين ديروحون بيهة.اه اه و كم اه
 
Nice !!!

i dont speak your lenguage :-)


www.axiologico.blogspot.com
 
و الله ياشلش انت كل كلامك على الجرح و احنا كلنا اخوة قبل منكون اصدقاء و نسبان بس شتحجي شتكول.عبالنا نرتاح و نتطور بس وكعت علينا العمائم البعثية السوداء فكبتت على نفوسنا و تستمر تاخذ الين وتذب الشين.اه اه اه و نتدري شلون راح تصفى.
 
و الله ياشلش انت كل كلامك على الجرح و احنا كلنا اخوة قبل منكون اصدقاء و نسبان بس شتحجي شتكول.عبالنا نرتاح و نتطور بس وكعت علينا العمائم البعثية السوداء فكبتت على نفوسنا و تستمر تاخذ الين وتذب الشين.اه اه اه و نتدري شلون راح تصفى.
 
عـزيزي شلـش ... ليـس الصبـر هـو الحـل لـمشكلتنـا بـل الكفـاح الـمسلح ضـد ألأحتلال ومـن يسـانده هو الطـريق الحـق والله ناصـرنـــا
 
Shalash
you give us hope when there seems to be none left, you remind us of the Iraqis we knew who are so different from the "Iraqis" who are our leaders, Allah Yi7fith kul eliraqyeen
 
ا خاف احجي وعليه الناس يكلون خليني ساكت احسن
 
الله يساعدكم يارب
 
لاعاب حلكك ياشلش ياعراقي وبارك الله بيك
 
والله كلامك صحيح يا شلش بس كون لا تطلع انت طائفي وتريد تمرر افكارك على العراقيين الفقراء المبتلين ببلاء عبد العزيز الا حكيم والمالكي وحزب الرذيلة اووووووووووووو العفو حزب الفضيلة وبالتالي تستولي على الكراسي واصير مثل ما جاي ايصير العرك بالقنادر بين المدعين والمتلبسين باسم الدين وباسم اهل البيت وكل واحد ايكول لصاحبه اخوي لاتقصر بوك اشكد ما تكدر من الدولارات وخيرات العراق لان احنا ما باقين بالكرسي. اخويه شلش الماساة كبيرة والجرح العراقي ينزف منذ عشرات السنين ولا فد يوم اجه شريف وخلص البلد من هذه الاوحال القذرة وعيش وشوف من هاي الرؤؤس العفنة
 
إرسال تعليق



<< Home

This page is powered by Blogger. Isn't yours?