السبت، 11 نوفمبر 2006

يوم انكس من يوم

.
الحكومة الوطنية المنتخبة بربع فتوى من المرجعية، اغلقت قناتين فضائيتن هما الزوراء وصلاح الدين بدعوى انهما تحرضان على تكريس الطائفية، وهذه خطوة خطيرة وتشير الى ان هذه الحكومة في طريقها الى حكم ولاية الفقيه وتقليم اظافر الاعلام شوية شوية، وبعد ذلك ستأتي الى الانترنت وتقول انه يفسد اخلاق الشباب وانه يتضمن مواقع اباحية وارهابية ومن ثم تمنع الستلايت وتحصرنا حصرة الجلب بالجامع، هذا المالكي طلع كلاوجي مضبوط ويلبي اوامر العمائم خطوة خطوة،ـ
.
انا شخصيا لم اشاهد الزوراء ولا اعرف بوجود قناة اسمها صلاح الدين، وعن الحلال والحرام احيانا اشوف الزوراء لان بيها طرب وكاولية وطربكة واخبار مشعان الجبوري، وهذه الاشياء ليست طائفية والحمد لله، لان الغناء والرقص ليسا بعملين طائفيين، هذا بالاضافة الى ان معظم المطربين والراقصين هم من ربعنا، ولااعتقد انهم يرقصون على الحان ابو ايوب المهاجر او ايقاع ابو قدامة التونسي وانما يرقصون على انغام فيدرالية الوسط والجنوب، واذا كانت هناك قنوات طائفية تصيبني بالقيء فهي الفرات والعراقية، فالاولى تسمينا اتباع آل البيت، ونحن عراقيين سواء كنا من اتباع آل البيت او من محبي ابن تيمية، هذه كلاوات مكشوفة، شنو يعني اتباع آل البيت؟ هناك ملايين الهنود والباكستانيين والايرانيين من اتباع آل البيت حسب تصنيف الاعور، بل ان كل المسلمين هم من آتباع البيت، والا كيف هم مسلمون، ومشكلتنا هي ليست تصنيف المسلمين وانما جمع شمل العراقيين، ولكن هذه التسمية هي حق يراد بها نصب على عقول الفقراء، بمعنى انتم اتباع آل البيت، والاخرين ضمنا هم اعداء آل البيت،ـ
.
وباعتقادي الشخصي المتواضع ان لص الجادرية وابنه وحاشيتهم وحرسهم من الايرانيين هم اعداء آل البيت لأنهم يسرقون باسم هذا البيت الطاهر، وآل البيت بالمناسبة ليسوا طبطبائيين ولا يعملون في تجارة النفط ولايسكنون الجادرية، وهذه العصابة التي تريد ان تختطفنا من العراق باسم اتباع آل البيت هم مجموعة ارهابيين تكفيريين لا يقلون فجورا عن القاعدة ومن لف لفها،ـ
.
يقول احد اتباع المالكي ان هاتين القناتين نقلتا المظاهرات المؤيدة لصدام، وانا اعتقد ان المتظاهرين تأييدا لصدام هم من صناعة حكومة المالكي التي جعلت ايام صدام ايام ذهبية قياسا للمأسي التي نعيشها الان، على الاقل كان لدينا وطن يحكمه دكتاتور، اما الآن فلا وطن عندنا بل ماخور للدعارة السياسية، يدخله كل من هب ودب والهوانات تتقافز فوق رؤسنا والمفخخات تتمشى بشوارعنا، وخسرنا من العراقيين مية وخمسين الف حسب تصريح وزارة الصحة، وهذا الرقم متواضع امام الارقام الحقيقية؛ كما اننا كنا ايام الدكتاتور خرافاً واصبحنا في زمن المالكي ذباباً، نسينا الماء والكهرباء والمجاري والخدمات ونريد ان تطلع علينا الشمس ونحن احياء، هل هذه حياة؟ ومع ذلك يريدوننا ان نسكت ،وكل من يرفع صوته يقولون له انت صدامي، والحقيقة انهم اكبر صداميين، ولولا صدام ما جان شفنا خلقهم الزفرة الكريهة،ـ
.
اليوم السيستاني وعبر وكيله يطالب باعدام صدام بين مرقدي الحسين والعباس وكانما صدام هو قاتل الحسين والعباس ، اني ما اعرف السيستاني ياهو مالته بهاي الامور القانونية التي تخص القضاء والقانون العراقي وهو رجل يرفض حتى جنسية العراق، مسكين صدام الامريكان اعتقلوه والسيستاني يريد يعدمه يم الحسين، والاثنين يدعيان انهما ينتقمان منه باسم العراقيين، ترى هاي صدك مهزلة ليش ماكو عراقيين يحاكموه، وين رجال العراق، اولئك الذين ترتجف الارض من خطواتهم، وكان صدى خطواتهم في شارع السعدون تهتز منه ارصفة طهران واصفهان، اولئك الرجال الذين كانت العرب من محيطها الى خليجها تلوذ باكتافهم وهيبتهم،ـ
.
للاسف اصبحنا اسرى بيد الجرابيع والسحالي، اموالنا مسروقة ونفطنا مهرب وعراقنا مقسم وشعبنا ذليل ومشرد وعلماؤنا واساتذتنا يـُقتلون ، واستبدلنا علماء العراق ومفخرته بعلماء الوضوء واغتسال الجنابة والخراطات التسع، والله ياصدام وانت ما محلفني، انت تستحق ميت اعدام مو على السويته بينا ايام حكمك، لا على نهايتك السخيفة وتسليمك العراق عنوان البشرية العريض بيد سيد لكَن وجعب بريج، لحد يكول شلش سكران، بشرفي اني بطل عرك ميوكعني، بس النار مشتعلة براسي ولو ما وجوهكم الطيبة جان هجيت من هاي المزبلة التي كنا نسميها في السابق وطن، بس لتخافون الوطن يرجع وطن، والعراق شاف بتاريخه مصايب وبقى العراق
.
يا مالكي يا جعفري يا حكيم يا زوبعي يا هاشمي ، هذا العراق ، معليكم هسة ينفض ترابه ويكوم ، ويصير طرادهم ماله والي ، والحدود مفتوحة وقصورهم عامرة يم عمامهم ، اذا لحكوا يوصلون عمامهم...ـ
تصبحون على خير

Comments:
"اننا كنا ايام الدكتاتور خرافا واصبحنا في زمن المالكي ذبابا "

اخ وجم اخ

رحم الله والديك
 
اكتب شلش شكو عليك اكتب.. بس اكلك هو صدك جان بالعراق رجال تهز الكاع مثل متكول و تهز ارصفه ما ادري وين؟ ولله اني سامع بهيجي شي في الزمن الغابر من القرن الماضي بس ما شفت بعيني. انشاله نشوف ونمشي وراهم. الله كريم.
 
والله يا شلش انتة اشرف انسان بقى على العراق وهذا لا يعني خلو العراق من الاشراف و الابطال امثالك اللي بقوا مصدر الصبر والسلوان لشعبنا الجريح و لوطننا الحبيب وشعبه الواحد وترابه الطاهر الي نتشرف ان نسقيه بدمائنا في سبيل حريته ووحدته على الرغم من انف الاعداء بارك الله فيك وكثر الله من امثالك وحفظك الله من كل مكروه
اخوك عامر
 
Hello Shalash,

شنو أنت؟؟؟ كتاباتك هزت الحاسبة و المونيتر و كلشي و كلاشي...

God bless you
 
رحم الله امك و ابوك
 
You are genius man! you have a talent, I really enjoy your writings, and agree with you completely.
inshalla we pass this difficult time and allah karem.
take care Shalash.
 
كل ما افقد الامل بالوضع اقره مقاله الك برجعلي الامل لان احس بالنفس موجود بالعراق من كتابانك
 
You deserve to rule Iraq! You have all the credentials, a thinker among imbeciles, an intellectual among illiterates, a clean human being around filthy scoundrels, a man who loves his country, and I am 100% sure that if you were the ruler you will not steep to their level, those creatures who hate Iraq and are trying their best to destroy it! I hope I am right.
Whenever I read your articles I feel so sad, the sadness of someone who lost all hope, I know that the aim of your writings is to keep us hoping but I know deep inside that what is happening now needs a century to fix, and I don’t have much time, I think I will die and not see my Baghdad again. I don’t know what the country needs, is it an iron hand? Another dictator? I hope not. Do you think that Al Hakim and his gang or Muqtada and his cronies read you? And if they do, do they stop and think of the damage they are inflicting on their country? I doubt it! It is us, people like you, who read you, we are the minority who cares and who cannot do a thing, and if the majority read you, they will hate every word you write, they will call for your death as a traitor and an infidel who writes under the influence of Arak.

Muna
 
لا وانت الصادق يا شلش صدام يستاهل اعدام تفلا حتى الغرق.
 
dear shalash
you make me admire your writings..you are brave..
i hope ,someday,i will meet you face to face..and dont be afraid of me cause i am loyal to iraq ,just like you..
 
بارك الله فيك ياشلش على مقالاتك الرائعة
أنا معجب بمقالاتك حيث أنا من اليمن
اتمنى أن اكون صديق لك
تحياتي لك ولكل أهل العراق الجريح
 
السلام عليكم وتحيه الى الاخ شلش العراقي من اخيك رعد العراقي اتعجب عليك يا اخي وانت لسان العراق الناطق اراك اليوم تستنكر غلق قناتين لازالتا تبكي على بقايا حكم الظلم والطغيان ومازالتا تثيران الفتنه بين ابناءالشعب الواحد اللي يثير الفتنه شسويله انطبطب عليه وانكله رحم الله والديك قناة مادافع عن الشعب وانما تدافع عن فكر معروف ومنبوذ ونظام سابق غلقته الحكومه ومن حقه هذا اذا شافت انها تثير فتنه وبعدين انت شفت اناشيدهم شلونها شكد هذوله منافقين وين كانوا عن هاي الاناشيد طلعوها هسه وبعدين هو مومشعان اجه وي الدبابه الامريكيه ورفع علم امريكه على المحافظه بنينوى وطردوه اهل نينوى بساعته شعجب صارلي هسه وطني
وبعدين اني اريد اسالك يا اخي سؤال واسال بقية الاخوه اشو محد منكم انتقد واعترض عندما غلقوا قناة الفيحاء وهي قناة على الاقل ماتثير فتنه وانما هي ضد الدكتاتوريه وتنقد الحكومه نقدلاذع صحيح هي غلقت في دولة اخرى ولاسباب فنيه ولكن بواطنها سياسيه واضحه لكن على الاقل انتم المثقفين الذين تدافعون عن عودة قناة الزوراء وصلاح الدين لماذا لم تطالبون باعادة قناة الفيحاء وسمحلي يا اخي العزيز مو كل المطربكجية من جماعتنه وبعدين ماكو فرق واعذرني على كلامي هذا وارجو ان يتسع صدرك لي واشكرك
رعد العراقي
 
qawiyya walla:)
i still cant believe ako wa7id bil thawra yo3rof ygool makhoor da3ara siyasiyyah.
i just cant help noticing that this dude cant possibly be in thawra.
 


مكرود يالزحلاوي
تكتل الدوود وتحٌمر الخدوود
يالزحلاوي
يال إسمك على لسان كل اهل الكهاوي
وحديثك يرويه كل قاص وكل راوى
المنصوب على الميز يا بطل زحلاوى
والكعدة وياك تحلا بزلاطة ومشاوى
كل مصّة منّك الف تعادل وتساوى
وتنسّى الواحد شجان بفكرة ناوى
وتحلا بيك ام كلثوم وعود مكّاوى
والموشاعر تلكى رصافى لو زهاوى
ياملهم السياب وحب كل بصراوى
خلّلى عصيرك جرك زهدى لوخستاوى
لكن رخصك يموت عليه كل مصلاوى
وشربك السحر كللّه يجرح ويداوى
ومن جوّه راسك المشاكل والبلاوى
يشهد ابو نواس والنهضة والعلاوى
ياحبيب المشخاب والدليمى وراوى
وكلدانى اشورى يزيدى والمنداوى
غدار ما تتأمّن يابطل الزحلاوى
بأول ربع المحترف يرجع يصير هاوى
وبالنص السبع بيهم ينكلب واوى
مكرود تصدر بحقك بيانات وفتاوى
الشيعى يمنعك ويكتب ضدّك شكاوى
والسنّى يحرمك ويلطشك بألسكتاوى
ويدفعون بيك لو ما عدهم كراوى
بس العيب البيك ويّه الكل تخاوى
هذا طبعك ودومك مزهى يا غاوى
ويزهى بيك التتن ولفّه السبعاوى
ودومك تضل فخر يابطل الزحلاوى


 
عاشت ايديك يا شلش الورده و كلنا وياك على الدرب

اخوانك المغتربين في عمان
 
الله لا يوفقكم يا عائلة الحكيم...... كلها بسبب عبد العزيز الحكيم ... يريدون يربطونة بايران بأي طريقة او باخرى .... منو اللي ساعدهم حتى يوصلون لبيوت الطيارين العراقيين اللي قصفوا ايران بزمن الحرب و كتلوهم ؟؟ الحكيم طبعا ... اكو واحد يجيب رئيس فرع حزب الثورة الاسلامية بالعراق و يخلوه بالحكومة العراقية .... والله العظيم اتمنى ان تجيلة طلقة و تاخذة هالنذل..و كل واحد وياه يريد يربطنة بايران
 
عاش لسانك! يا شلش هذولة الكواويد لعبوا نفسنا! لعد يصير 100 واحد ينعلس والحكومة السخيفة اليوم تكول "حررناهم" جذب وألف جذب اني اعرف ناس بعدهم معلوسين ، تفوو على هاي الحكومة وتفوو على مجلس النواب!!!

زابي
بغداد
 
الله الله الله

شريد اكول غير روعة شنو هل قابليه والقران انت فضيع شلش
عاش لسانك ويخليك الله للعراق
اخوك الذيب
 
حبيبى شلش لاعاب حلكك لان ماطار طير وارتفع الا كما طار وقع
ان العراق الان اسير لمجموعه تبدا بحرامى الجادريه وتنتهى بمجموعه من الاطباء الفاشلين اللذين اصروا على العمل بسلك الامن (شنو العلاقه)مااعرف مثل السيد كريم........... العفو اقصد الدكتور الربيعععععى الذى اصر على ترك الطب وعلاج البشر ليتفرغ لاستتباب الامن ,, والله زين والسيد داود الذى سبقه فى المنصب والمغنم وتحولت الغنائم الى ارصده فى بنوك الشارقه وفلل فى دبى من المشاريع الحكوميه(ذوى الدخل المحدود)يعنى رخيصه لايتجاوز سعرها مليون درهم....... لاباس لازم تتوزع الثروه كخطوه باتجاه السوق العربيه المشتركه.
بس خلى يسمعون كل الحراميه ان فلوس العراق تلعن سارقها مثل لعنة الفراعنه وشماياكله العنز يطلعه الدباغ ويجب ان لايغيب عن البال شعار الشيوعيين الجابوننه البلا *ماكو موامره تصير والحبال موجوده--------- وهل هناك موامره اكبر من اللتى تحاك الان لحرق العراق ؟؟؟؟؟
الله المستعان فيكم
 
i agree 100% in what you have said.
mahdi
 
والله حجيك على راسي وانت هم ؟ بس جيب الي يفتهم من الزمايل
 
إرسال تعليق



<< Home

This page is powered by Blogger. Isn't yours?