الأربعاء، 15 نوفمبر 2006

باجر تبين

.
تجي اربعين سيارة وينزلون مسلحين بنص المنطقة الحساسة من بغداد، ويخطفون اكثر من ميت شخص ويرحون، وبعدين تجي الداخلية تحرر اغلب المختطفين، وكل هذا ورئيس الوزراء طلب البحث عن الجناة، والداخلية كاعد تبحث عنهم، شنو هذا فيلم باكستاني، لان حتى الافلام الهندية مترابطة شوية،ـ
.
الجناة يا دولة رئيس الوزراء، كما يسميك على الدباغ، هم اعضاء حكومتك، واجهزتك وعصابات احزاب حكومتك، الجناة هم انتم لانكم جئتم الى الحكومة على قرع طبولهم، الجناة يعرفهم الصغير والكبير الا انتم، ما ادري شبيكم ليش متعرفوهم، والله ما ادري.ـ
.
وبتصريح دولتكم هذا اليوم بالجامعة ذكرت حضرتك الارهابين والصداميين والتكفيريين، ومن وصلت للجماعة سميتهم الميليشيات المنفلتة؛ شتقصد بالميليشيات المنفلتة، يعني اكو ميليشيات منضبطة، ميليشيات لا تتحرك الا باوامر، ولا تقتل الا باوامر ولاتنفذ الجرائم الكبرى الا باوامر فهذه الميلشيات تسمونها منضبطة، لانها تحترم كلمة السيد، لذلك فمسموح لها ان تتحرك بحرية، حتى لو بسيارات الداخلية والدفاع،ـ
.
عيني ابو اسراء القاتل قاتل، اذا كان منفلت او منضبط او يصلي ورا سيد لكو. المجرم مجرم، ماكو بالجريمة القاب ورتب، قاتل نفس واحدة حسب القران كانما قاتل الناس جميعا. ـ
.
احنا راح نشوف باجر شراح تسوي بالله، صدك تكشف القتلة وتقدمهم للعدالة لو تشكل لجان تحقيقة تنام وية لجان الجعفري؟ شد حيلك ابوية، انت تريد تحكم دولة لو تريد تطلع بالتلفزيون، الدولة استاذ نوري مو كاميرات ومايكرفونات، ،الدولة دولة وتحتاج رجال اقوياء وحازمين، ليست هناك دولة تسَير امورها بالدعاء والتعاويذ والمحابس وكلمة "سوف" لا تنفع مع ادارة بلد مثل العراق دايخه بي الدنيا، انسى "السوف" وشوفنا افعال، صارلك سنة تصيّح لا سلاح خارج سلطة الدولة، والاسلحة الحديثة التي دخلت الثورة مؤخرا تكفي لتسليح دولة،ـ
.
عيب، صار سنوات نسينا حياتنا ونسينا شكل الكرخ وكمنا منعرف شارع الكفاح منين نروحله ونمشي ونتلفت مرعوبين، لو تحل المشكلة لو تكول اخوان اعذروني ترى والله عبرنا مرحلة الياس وطبينا بالعدم، وصار الموت راحة، شنو راحة الموت صار هواية وعادة، اطفالنا كاموا يتفرجون على الجثث اكثر ميتفرجون على الاحياء، اجيال من المرضى والمعقدين والعدوانيين صارت تتناسل بيناتنا، شوفلنا جارة الله يخيلك، ترى كمنا نتقيء من الخطب والوعود والكلمات والعملية السياسية والمصالحة الوطنية وكل هاي التفاهات، بيك حيل للدولة اتفضل شوفنّا، ما بيك حيل لتستحي ترى هي مو لعبة، خو انت مو جدك نابليون ومفطوم على القيادة، ..ـ
.
اكلك ابو اسراء، سمعت بالحرامي الجديد راضي الراضي لو بعدك، ترى احنا نعرفه من زمان بس هم زين اختلف وية جماعة الفضيلة وفضحوه .. والله عيب اربع سنين نريد واحد شريف بالحكومة ما كو، لك وين صاروا العراقيين اليستحون من خيالهم، ليش تحولنا حرامية بيوم وليلة، حرامية شنو؟ عيب هاي الكلمة لازم نسميها الفساد الاداري .. اني ماشايف مثل حكومتنا ناس متستحي، لا والمشكلة وهاي اكبر مصيبة، كام شعبنا هم ميستحي ويسمي هاي العصابات حكومة ، ـ

Comments:
allah ya ba6al:)
walla 3asht 2eedak.
 
عاشت ايدك يا بطل:)
 
ياجماعة الخير هل سمعتم بمقولة رئيس وزراء سابق حينما قال بانى غطاء لبالوعه كبيره اسمها رعاع الشعب فى العراق ؟؟؟ فمنذ ان قتل او بالاحرى سحل فى ثورة الشسعوبيين سنة 1958 بدأنا باستنشاق جيف البالوعه وعام بعد عام وصلنا الان الى قاع البالوعه او السبتتنك وكما معلوم لديكم ان التيتى يترسب فى القاع(التيتى مصطلح عراقى للرواسب الثقيله يعرفه النزاحون)وبدون تشابيه.المهم من قال بانى غطاء البالوعه هو نورى السعيد رحمه الله
 
والله بس الميستحي فعلا والماعنده ذره عقل ولا غيره يسميهه حكومه اليسميهه حكومه هذه لو مشايف حكومات صدك لويعجبه يصدك الجذبه الي يجذبهه عله نفسيته المريضه بكره الناس الشرفاءوالمجتع السليم
ابو منار
 
مرحبة شلش
هاي اول مرة اكتب بس احس قلبي يريد يطك اوف اوف ياربي صدك جذب الي ديصير بينه لخاطر الله ادري هسه اشسوينه اشوا من ضيم لضيم ربي فدواتك انت عكدتها وانت تحلها لانه انلاصت فد مرة .يامالكي ياقندرة محد يحلها هسه لو ما ادري شيصير تالي يكولون التحرير ياتحرير مصخم ملطم هذا لو مخلينا على قبل جان ارحم مليون مرة.صرنا نمشي ونحجي ويه روحنا الواحد بالكوة لازم الكفرة بحلكة استغفر الله واتوب اليك..........ربي رحمتك راح نتخل
 
مرحبة شلش
هاي اول مرة اكتب بس احس قلبي يريد يطك اوف اوف ياربي صدك جذب الي ديصير بينه لخاطر الله ادري هسه اشسوينه اشوا من ضيم لضيم ربي فدواتك انت عكدتها وانت تحلها لانه انلاصت فد مرة .يامالكي ياقندرة محد يحلها هسه لو ما ادري شيصير تالي يكولون التحرير ياتحرير مصخم ملطم هذا لو مخلينا على قبل جان ارحم مليون مرة.صرنا نمشي ونحجي ويه روحنا الواحد بالكوة لازم الكفرة بحلكة استغفر الله واتوب اليك..........ربي رحمتك راح نتخل
 
لعاب حلكك اخويه شلش . عيني والله هم يعرفون بروحهم كلهم حراميه و قتله بس تعرف ماكو واحد يكلهم لا و يحاسبهم بس اكلكم لا تنسون الله فوك كل واحد و لا تنسون * و بشر القاتل بالقتل *
تره والله خلص العمر و ما شفنه العراق يوم مرتاح
ادري شنو صار براسكم يا ناس
تره الله انطانه عقل نفكر بيه مو نعوفه على صفحه و نسمع كلمه مدري منو كالهه و نصدكهه
يالله اني هم ما ضل بيه بعد اكتب
بس اكول رساله بلكي يقراهه المالكي و اتباعه و اهم شي عدي الصغير
فلوسكم و طمعكم راح يحركم و بعدين تذوقون شر اعمالكم
و بوكتهه اني مراح اطلع ولا اتشفه بيكم بس اكول حسبي الله و نعم الوكيل و هو يطلعه بكل ظالم و مستبد
 
لاتلوم الحكومة اخي شلش صدك لو كال المثل من قلة الخيل شدو علجلاب سروج وراح نظل ورة الجلاب وندعي من الله سبحانه وتعالى يدزلنا الخيول
 
ماكول غير ولاية بطيخ وحكومة كلو انظل انكول الله كريم
 
عاشت ايدك اخ شلش بس منو الي يسمع ويعقل
 
I love you Shalash
 
I love you Shalash, you allways make my day when i read your essays, Thanks alot my dear Thanks ya shareef
 
I love you Shalash, you allways make my day when I read your essays, Thanks alot my dear
 
إرسال تعليق



<< Home

This page is powered by Blogger. Isn't yours?