الجمعة، 17 نوفمبر 2006

من يرجع ابو اسراء خابروني

.
دولة رئيس الوزراء سافرلتركيا وقضية خطف الجماعة ظلت معلقة بالداخلية، ويكولون التحقيق جاري على قدم وساق ، وماكو واحد بالثورة ميندل وين تم حجز المساكين، بس الداخلية لايمكنها الدخول الى اعماق حافاة المياه والتحقيق هناك ..ـ
عيني بولاني تريد ادليك على موقع الاعتقال، لو خاف تعتقلني وياهم واني ما بي حيل ومتكسر وما اكدر اشيل روحي .. ـ
يالله كلهم ميطلعون تسعين واحد، نمونة، فدوة للسيد، قحط عراقيين؟ اشو مزبلين، حتى بمصر كاموا يبيعون فلافل على المصريين، والله دنيا - العراقي يبيع فلافل، وين؟ بمصر، ذكرتوني بالمصريين من إجو للعراق وجنا زغار ونروح للمطعم وناكل فلافل من المعلم، نسيت اسمه، بس يمكن اسمه حسنين، لان نص المصريين بالعراق جان اسمهم حسنين والنص الباقي جانو دبلوم تجارة ..ـ
ايام زمان جان اذا مصري حط عينه على عراقية نكوم نرجف ونصاب بالحمى ومنام الليل، جانت الناس تستحي وتخجل وتعتبر العرض واحد، هسة وين صارالعرض، عدنا مليون رجل دين وخطيب ومعمم ومعكَل بس الشرف راح، راح بالرجلين، والله نوبات اسمع سوالف يشيب منها شعر الطفل، طفل مال كبل مو مال هسة، هسة اطفالنا كاموا يحششون بفضل الجمهورية الاسلامية، والله اكو طفلة يمكن عمره ثنعطش لو شوية اكبر، بباب الشرجي اربع وعشرين ساعة محششة والالفاظ البذيئة متفارك لسانها، بس احلى شي بيها من تصيح عليها دكلك: عيني - ديمقراطية، عاشت الديمقراطية وعاشت التكنوقراطية وعاشت الشلشقراطية ..ـ
شتريدون - الديمقراطية واجتكم لباب البيت، وكل واحد صار بكيفه، وين ماكو جربوع ابن جربوع صار قائد سياسي ويطلع بالتلفزيون ويكول هاي مخالفة دستورية، والله لو اسوي امتحان بالدستور ولا واحد من مجلس النواب ينجح، حتى الكتبوا الدستور نسوه، اما الشعب فميعرف من الدستور غير الورقة الحطها بالصندوك حتى السيد ليشور بي،،،ـ
ابو اسراء كلي تركيا شلونها ؟ ابراهيم طاطلس شلونه ؟ بعده مريض لو صار زين، اذا شفته بشرفك سلملي عليه، كله شلش يكول صاحبته الحلوة وين صارت، خو ما تحجبت وصارت مديرة مدرسة بدر الكبرى وكامت تحلف بشرفها، ست نورية مو عليج هذا الكلام بشرفي، لان انت اشرف وحده شفتها بحياتي خاصة من تحجبتي وجبرتي الطالبات يتحجبن صدك كبرتي بنظري، ولو انت جبيرة بنظري من زمان، من زمان ست نورية، الله يرحم ايام زمان، جان بطل البيرة بربع دينار والناس تكرع، هسة بطل العرق بالفين دينار والناس هم تكرع، اسماعيل ابن الحجي يكول لويصير البطل بمليون هم اكرع، ها ست نورية تذكرتي اسماعيل ابن الحجي، والله اسماعيل اكبر شريف شفته بحياتي، ولو لحد الان ما تحجب، بس بعده جبير بنظري لان كل متكله عمي لتشرب يومية يكوم يضحك ويكول اني انتخبت مثال الالوسي لان مثلي يلط ابيض ...ـ
شوكت يرجع المالكي حتى نحجي جديات ، بالله من يجي خابروني بشرفكم

Comments:
(ترّن ... ترّن...
أطمئن استاذ شلش هذا مو تليفون اللي يخابرك حتى يكلك رجع ابو اسراء...
لان ياريته راح بدرب الصد ولا ردّ...
هذا تليفوني اني...!!!)
 
(ترّن ... ترّن...
أطمئن استاذ شلش هذا مو تليفون اللي يخابرك حتى يكلك رجع ابو اسراء...
لان ياريته راح وبدرب الصد ولا ردّ...
هذا تليفوني اني...!!!)
 
ترّن ... ترّن...
أطمئن استاذ شلش هذا مو تليفون اللي يخابرك حتى يكلك رجع ابو اسراء...
لان ياريته راح وبدرب الصد ولا ردّ...
هذا تليفوني اني...!!
 
(ترّن ... ترّن...
أطمئن استاذ شلش هذا مو تليفون اللي يخابرك حتى يكلك رجع ابو اسراء...
لان ياريته راح وبدرب الصد ولا ردّ...
هذا تليفوني اني...!!!)
 
والله يا أخي أنت كاتب جيد وتستعمل اسلوب جميل جداً يناقش الواقع العراقي بفن السخرية الهزلية وهذا النوع من الكتابات لها الأثر الكبير في نفسية القاريء باسمي أنا أشكرك شكر من صميم قلبي على كتاباتك المفيدة والتربوية في نفس الوقت وننتظر منك المزيد .
 
هلو شلش شلونك والله العظيم بعدني اضحك وابجي على كتابتك واني كمت اوزع الموقع لدرجه انو اخر مره رحت للكليه ردت اطبع كتاباتك وانشرها بس مع الاسف خفت بس يلا بالمستقبل ان شاء الله تحياتي
 
استاذي العزيز شلش
تحية وتقدير .. لاتعرف كم فرحت عندما اعطوني عنوانك ورجعت كل يوم ) مثل واحد جوعان يدور على اكلة من الصبح) افتش عن مقالتك .. اكتب ياستاذنا .. واستمر.. لانك تكتب من قلبك من قلب كل عراقي .. يجري بدمه العراق .. والله ماأخاف على العراق مادام اكو بعد مثلك .. لكن بالله عليك لاتنس اي طائفة اكتب على الكلل فالكل مظلوم .. واولهم العراق ..
 
اخي العزيز شلش العراقي
ولو مو كل حجيك مترابط ومركز على ربعك بس نكاتك تضحك وأنا اقرأ لك على سبيل قضاء الوقت.
 
Dr. Khaddori,

It is not a good practice blocking comments sent by serfers especially if they were sincere and polite.

I sent a comment about Shalash's writing few days ago but got no reference in this blog.

Please keep things simple so the blog will be more dynamic and don't filter users comments based on your ideology or thinking, at least give Mr. Shalash the right to respond.

Regards

Mohammad
 
السلام عليكم
موضوع اروع من موضوع
ايدك تنلف بالحرير يا شريف يا عراقي
اطلق عليك كلمه عراقي بكل فخر
واحمد الله انوا اكو انسان شريف مثلك بالعراق

صدك اذا خليت قلبت

اخوية اوجهلك دعوة تجي تنشر ويانه بمنتدى فنرتوب العراقي
www.fnrtop.com/vb

اخوك الذئب العراقي
 
الاخ شلش الوردة
تحية طيبة و بعد

على فكرة تكلمت على مديرة مدرسة بدر الكبرى - الغزالية، تعرف انها قتلت من قبل المليشيات بعد ان مثل بجسدهاقبل اسابيع معدودة ، هل تعرف السبب؟

اخوك ابو اوس الغزالية - بغداد
 
الاخ شلش
تحية طيبة وبعد

هل تعرف ان الست نورية - مديرة مدرسة بدر الكبرى - قد قتلت من قبل مليشيات قبل كم اسبوع ، بعد ان مثل في جسدها!!!

تستطيع ان تقول ليش ؟؟؟

اخوك ابو اوس - الغزالية - بغداد
 
الاخ شلش
تحية طيبة وبعد

هل تعرف ان الست نورية - مديرة مدرسة بدر الكبرى - قد قتلت من قبل مليشيات قبل كم اسبوع ، بعد ان مثل في جسدها!!!

تستطيع ان تقول ليش ؟؟؟

اخوك ابو اوس - الغزالية - بغداد
 
is Shalash still a live, is he well, I am one of many that are worried to deth for him. Shalash please just write one word, say Iam
STYING ALIVE.


Saad Al-iraqi
 
السلام عليكم
بعد التحية والسلام
ممكن واحد من الاخوان يكللنا شنو قصة شلش وين صار وليش اختفا يعني اخاف انعلس الرجال لو يجوز كتلو وشمرو ويه الجثث مجهولة الهوية الي نلكاها يوميه.
اني يوميه افتح هذا الموقع اكول بلكت اليوم شلش ظهر وكتبله فد مقالة حتى اطبعها وارجع للبيت اشوفها للعائله كلهابس للاسف ماكو اي شي.
فاذا احد يعرف خبر عنه يا ريت يخبرنا عليه لان حرامات شخض مثله يختفي والعراق يحتاج لكلماته الحلوه اللي تبث الامل بنفوسنا واحنا في امس الحاجة لشمعه على الاقل نشوف بيها الداير مدايرنا.
 
هل تعرف يا اخي العزيز
انت وامثالك حرام يكتبون بلغة القران وهي العربية
لانك انسان ليس لديك مبادئ كما هو واضح من كلامك
بل انسان كانت قناني المشروب والخمر تأتيه في زمن الحكومة السابقة كرشاوي وهو مستمتع بها والان خسر كل شئ ولم يبقى لديه سوى هذه التراهات التافهة
لست ادافع عن احد لاني لست عراقيا ولكن واضح من كلامك انك كنت وضيعا في السابق واصبحت الان تحت مستوى الوضيع حاليا
فارجو ان تكتب ما هو مفيد ومهذب ان كنت من فئة المهذبين وانا استبعد ذلك
مع تحياتي لمن هو انسان وليس خرفان
 
إرسال تعليق



<< Home

This page is powered by Blogger. Isn't yours?