السبت، 18 نوفمبر 2006

لعبة جديدة مفضوحة

.
قلت في اكثر من مناسبة رايي الشخصي بالسيد حارث الضاري، ووصفته بالطائفي والارهابي الى غير ذلك، لكنني اعرف وتعرفون ويعرف سكان جزر القمر، ان الطائفيين والارهابيين والقتلة واللصوص والمنحرفين موجودين كذلك في الحكومة وكياناتها السياسية، ولكي تتحدث الحكومة عن القضاء واستقلاليته فليذهب عبد العزيز الحكيم ايضا الى المحكمة، اولا لانه سرق الجادرية، وهذه لاتحتاج الى دليل، وثانيا لانه طائفي وارهابي ويرعى قناة تنعق بالطائفية ليل ونهار، وثالثا لانه عميل لدولة كانت عدوة وظلت عدوة وستبقى عدوة الى يوم القيامة ،وهذا الحجي مو من جيبي، ايران نفسها اعترفت بانها مرة تريد ومرة لا تريد التفاوض مع امريكا بشان الامن في العراق، فمشكلتها ليس تدخلها الاجرامي في بلدنا، بل توقيت بيع هذا التدخل لامريكا من اجل مصالحها التي يمثلها الحكيم وعصابته، فاذا اردنا ان نحاكم الضاري وهو يستحق، خاصة بعد اعلانه ان القاعدة هي مقاومة شرعية، يجب ان نحاكم الوجوه الكالحة و العمائم العفنة التي رمتها ايران في احضان البرلمان العراقي باسم الشيعة وال البيت وما هنالك من كلاوات صارت مكشوفة ومفضوحة وحتى الذين تورطوا في انتخابهم، الكثير منهم يلعن اليوم الذي ذهب به الى مراكز الانتخاب، بل ان الكثيرين صاروا يحملون المرجعية هذه المصيبة التي وقعنا فيها، ومثلما لا يمثل الضاري شريحة عراقية اصيلة وكبيرة فان الحكيم لا يمثل سوى الخامنئي واطلاعات والحرس الثوري وبعض المخدوعين بعمامته والاعيبه الفولكلورية من اقمشة سوداء وخضراء، والبولاني العبقري اصدر مذكرة التحقيق بحق الضاري لكي يجعلنا ننسى نتائج التحقيق في جريمة الداخلية، باختطاف اكثر من مئتي عراقي من دائرة البعثات، لان المالكي قال سنكشفهم ونحاسبهم ونعلن عنهم، وهو بهذا كذاب كبير، لانه لايستطيع ان يحاسب واحد ا منهم،والشيء الذي اريد ان الفت نظرك اليه بهذه المناسبة عزيزي القاريء، هو ان المختطفين الموجودين حتى مساء امس في الثورة، ليس لجيش المهدي علاقة بخطفهم، ولكنهم اخذوهم هناك ليورطوا جيش المهدي بهذه التهمة وهو بريء منها تماما حسبما عرفت وتأكدت، واذا البولاني يكول شلش كلامك مو مضبوط، فاني اتحدى هو ومن جلبه الى الداخلية، واذا ارادت جهة محايدة ان تعرف عنوان المخطوفين فانا مستعد ان اشرح بالتفصيل مكان وجودهم حتى مساء امس كما ذكرت، ومو عبالكم شلش شوية وخطية مسكين كلشي ميعرف، لا وداعتكم كلشي اعرف واني فد واحد حشري وفضولي وحاط نفسي بنص الطربكة، وما ارتاحيت حتى عرفت فلم الاختطاف .. ـ
واريد المالكي بالله شيسوي وبعدين اشوفكم الحقيقة، خاف الحكيم يعتقد ان اطلاعات اذكياء ومحد يكدر عليهم، لا عيني العراقيين اذكى من الخلفوهم، واعتقد ما نسينا اهلنا شسووا بيهم بالحرب، والله شوفوهم نجوم الظهر،ـ
ارجع لموضوع حارث الضاري طبعا هذا كلام جديد يريدون من خلاله اشعال الحرب الطائفية المباشرة، التي فشلوا في اشعالها بطرق اخرى، فعلى اخوانا ان يتذكروا ان العراق اكبر من حارث الضاري، واكبر من اي شخص ولايعتبرون الضاري يمثلهم، ترى محد يمثلكم غير العراق، دائما ازعلوا على العراق وبس، وليس على اشخاص او رموز تخص طائفة دون غيرها، العراق وحده من يستحق ان نموت من اجله، لان العراق وحده من اصدرت بحقه مذكرة اعدام، لتنشغلون بالضاري وغيره، عصام الراواي افضل من الضاري مليون مرة، ولانه وطني معتدل وغير طائفي انقتل بنص بغداد وبالنهار، اكو مشروع طائفي كبير للاسف الجهلة انجروا بي، وصاروا يلعبون نفس اللعبة، رجاء واحلفكم بالعراق لحد ينجر للتفاهات، قضية السنة والشيعة قضية تافهة وسخيفة ولاتستحق ان يضيع من اجلها شبر من العراق، دائما حط العراق اكبالك وتصرف لاتخطأ وتتقشمر، معليك بعلي وعمر وعثمان، هؤلاء عند ربهم في جنات الخلد، اما نحن فنعيش في جحيم الطائفية ويضحك علينا الحكيم والصغير والضاري والكبيسي، هذه قاذورات سيرميها التاريخ بالمزابل، اما العراق فباق باق باق،على عناد كل العملاء والطائفيين والخونة واللصوص والدجالين،ـ
نسيت اكلكم، اشتريت سيارة بشرفي، اريد واحد يكلي مبروك، شبيكم ، والله كل فلوسها حلال، مابيها دينار حرام، وداعتكم حتى تايراتها ممسوحة، بس المسجل يخبل، والله يلعلع، وحطيت بيها عشرين كاسيت، تسعة كاولية واحد حسام الرسام واثنين كاظم الساهر واحد نانسي عجرم الجديد والباقي كوكتيلات وردح، بس واحد سموفنية لموزارت ، كلت عيب خاف يصعد وياي فد صديق مثقف ، ويعجبه يعيش لحظات تأملية ، واخيرا تحقق حلم حياتي وصارت عندي سيارة، والله كل شوية اطلع بالباب اباوع عليها، اكول صدك شلش صار عندك سيارة، الله شكد حلو الواحد عنده سيارة مالته وين ميريد ايروح بيها، بس بيني وبينكم اني شوية خايف اشو سيارتي ثكيلة خاف مفخخة.ـ
.
.
أخي شلش
وكما ذكرت أنت سابقاً، فهناك إختلاف في الرأي بيني وبينك، إذ أن الإنجراف في تعريف "الإرهاب" والسائد من قبل المفهوم والإعلام الأمريكي ليخدم حصراً أهدافهم السياسية الجائرة في الإحتلال ونعت كل من يقاومهم وبتصفيق من إسرائيل و هلاهل قرقوزاتهم في المنطقة الخضراء يجب أن لا ندعه يمحي معنى مقاومة الإحتلال المشروع والمفروض وطنياً، إذ أن الخلط ما بين الإثنين وتمريغ المقاومة برذالة الإرهاب يطيب للأمريكان ويـُسهّل من المهمة السياسية للذين يحتجزون رهائن دائرة البعثات بجواركم ولا يفيد النقد الساخر في طمس هذه الحقيقة
بالله ضيف هذه الأغنية للكاسيتات بسيارتك المبروك عليها، ترى ما تحتاج لثقافة عالية وتأمل تجريدي
أخوك
عماد خدوري

Comments:
حياك الله
 
I solute your courage and your mindful articles
Akhook
Mohammed El Alousi
 
Mabrook al Sayara ya Shalash!
 
شلونك اخويه شلش
سلامي لكل عراقي شريف والسلام على من اتبع الهدى .... اي نعم الهدى لان هسة بوكتنا هذا لحد يكلي اكو واحد معمم لو لابس شماغ شريف كلهم ... ماريد احجيها خاف عيب بس والله كلها هالشكل
يعني بشرفك شلش لو اي واحد خلي يجاوبني اني عايش منطقة مالت الجماعة 23 سنة عمره محد كلي على عينك حاجب ولا شفت فد يوم مضايقة ن واحد وبعز زمن صدام والبعثية جنا عيني عينك نسوي هريسة ونوزع والجماعة يكومون يعتبون اذا مدزينالهم من ثواب ابا عبد الله ... لا مو بس هيج ابوية الله يرحمه ماخلى جامع من جوامع اخوانه السنة اذا مو بيده شدله مكبرات الصوت واصلا مجان يعجبه يصلي بالحسينية جان يصلي وياهم مجتف همين .. واليوم بحمد من الله ونعمته صارت الدورة اكبر وكر لاخواننا المجاهدين وبعد صرنا كخة ومحد يريدنا لا وشفايتلك بس هالشكل لا الي يطلع من بيته لازم يأجره لو يكعدون بيه هيج خاوة عيني عينك والاجارات حددوها اخوانه المجاهدين عالي يعفون بيوتهم اذا بيت كامل وطابقين ب 150 الف واذا مشتمل 75 الف لا غير هجينا للحلة عبالنا يصرولنه عون وداعتك شلش مشتمل جنه كنمالت دجاج بميتين ..... ولا كواد من ذولي اهل العمايم المعفنة كام وكللهم حرام عليكم تسون هيج بالعالم ونزلو الاجارات لا يكلك انت بغدادي ومتوازي تكعد بيش ما جان .... اني مو هذا الداقني لا الداقني تعال شوف العمايم الي عاثت بالارض فسادا تسرح وتمرح شلون الطليان من تهدها وتديخهن بلا غنام يسرحووووووووون ويمرحون بدوائر الدولة رحت راجعت مجلس المحافظة بلكن تعيين شي بالاستعلامات تلكوني ماكو تعيينات بس انت تروح للعلوية هي تمشي شغلتك يابة العلوية منو ؟؟؟ هي العلوية جوة شنو هاي العلوية فتاحة فال تجيب البخت كلي اخويه لتدوخني تردي تشوف العلوية روح الزم سرة ورا ذولي العالم لك عيني رحت غير ارد افتهم محلها من الاعراب شنو بمجلس المحافظة شنو كلشي مفتهمت كاعدة العلوية وحدها بمكتب وتلاثةتلاثة يفوتولها وكلشي ممكتوب على مكتبها يعني فد مهزلة زين ادري يا الله شنو السالفة احنا مخلصانين من العمايم النوب تطلعلنا العلوبات لك شلون مصيبة يا الله شوف شلش اني بعد جزعت ولعبت روحي فد نوب وبعد ما احرك كلبي على كلشي يموتون عشرة يموتون مية باليوم يطبهم مرض هم الي اختارو وهم يتحملون نتيجة اختيارهم يعني الله عليك اني مادري ششافو بذولي القشامر ياهو الي تلزمه يكلك اذا متنتخب 555 يشور بيك السيد لو يكلك مرتك متحل عليك بعد وراحو مثل الزواج وانتخبو وشايلين صورة هذا العار ويكمزون بيها وكلها تصيح وين الحاربك وينه صدام النذل وينه ومن هالكلاوات يعني محد ضربهم على ايديهم هم يحبون السادة ميحبون المقلم يا اخي ليش تحرك كلبك على هيج زواج هههه ترة الي انتخبوا 618 مو اقل فطارية من الي انتخبوا 555 فانت لتحرك كلبك على شعب عربانة خليهم ذولي الي دا يموتون وينكتلون دا نخلص منهم حتى من تصير انتخابات جديدة تروح اصواتهم للكبور ونرجع ننتخب علاوي البطل وحمبد مجيد الوردة وهالاشكال كلها نخلص منها
 
اخي العزيز شلش العراقي
ولو مو كل حجيك مترابط ومركز على ربعك بس نكاتك تضحك وأنا اقرأ لك على سبيل قضاء الوقت.
 
الى الاخ عماد خدوري،

من الافضل ايراد اي تعليق على مقالات شلش ضمن باب التعليقات وليس في ذيل المقال مباشرة اسوة ببقية القراء.

انا ايضا، كما بقية القراء، اختلف مع شلش في ارائه السياسية ولكني اقراءه لانه صريح وصادق وذكي ولا يتبع اجندة سياسية معينه. فمثلا انا لا افهم لماذا يعتبر ايران عدوتنا الى يوم القيامة!! فهذا الراي باعتقادي هو نتاج حرب صدام و التي تحول الايرانيين بفضلها الى فرس مجوس وقبله كانت ايران حالها حال تركيا وكل دول الجوار. وحتى وان كان للحكومة الايرانيه يد خفية في العنف الدائر حاليا فهذا لا يعني ان لنا مع الايرانيين عداء تاريخي.

ختاما اشكرك وكل القراء جهدك في نشر مقالات شلش.

دريد الحمداني
 
مبروووك
والله عليك لا تنسى تحط اللوغو على جامة السيارة...
ومثل ما اني حطيته بسيارتي؟؟؟
زين !!!

الكمورة
 
والله الي مثلك يستاهل طياره مو سياره بس
 
مبروك عل سياره اخوي شلش وعاشت ايدك عل مقال المحترم الف رحمه على والديك انت الوحيد الي تبرد كَلب العراقيين
 
أخي العزيز شلش العراقي...تحية طيبة وبعد
يشهد الله انني أشتاق لمقالاتك مثل شوقي للعراق ولأمي وإخواني...فقلمك يضحكنا ويبكينا , ونسأل الله أن يوفقك لمزيد من الكتابة
فقط أحببت أن اذكرك ياعزيزي بأن شيخ مثل الضاري لاينبغي علينا دمغه بالإرهاب , وأما الطائفية فقد حضرت محاضرة له من عهد قريب , ووجدته بعيد عن الطائفية المقيتة ,وأنا مذهبي غير مذهبه والله على ماأقول شهيد
أخوكم هاشم حداد
 
mabroooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooook....bas deer balak la yejy wa7ed yreed yt3ashah way al malaaikah aw yes3ad wayak .........ai wahed 3endah li7ya a6oal min 1cm mamno3 yes3ad wayak
 
mabroooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooooook....bas deer balak la yejy wa7ed yreed yt3ashah way al malaaikah aw yes3ad wayak .........ai wahed 3endah li7ya a6oal min 1cm mamno3 yes3ad wayak
 
هلو شلونك عيوني شلش شكو ماكو , شلش اتمني تجي للديوان العراقي علي البالتوك هذا المكان الوحيد الي تجدر تحجي بي مثل افكارك المتنوره صدقني لا توجد خطوط حمراء,اوفففففففففف شلش تدري هسه احنا بيا زمن بزمن التعتيم الفكري الذي يقوده المعممين وحكو الساده والملقم همين, اجوللك من تدخل اسئل علي عراقي بوص الادمن هذا عبالنه انت وطلع مو انت بس يالله تعال قسم براحتك ابو الشباب , مو السياسه هم كوميديا الهيه مثل كوميدية الانتخبوا المرجعيه وطلعوا سرسريه www.paltalk.com ودور علي غرفة الديوان
 
مبروك عمي وتتربى بعزك ان شااااء الله

:D

بس عمي الله يخليك دير بالك من تطلع بيها
 
شلونك عمي
يابة مبروك و الله هسة راح ادمر الدنيا اليوم اسوي انكلترا فلم اليوم اروح احرك مرت نوري المالكي تااي يكلله زوجهة لا ترجهين للعراق الة تاخذين الجواز
و رجع زوجتة الاولى و الله و على لسانهه كالم واحد من الكبار .
المهم تونس وية سيارتك عمي بس و الله كلهة عملاء بس محد يصدك
و يوم عرسك على هاي البلوج و انشوفك يا اصيل
 
اخويه شلش
السلام عليكم
ادري هسه احنه شلون بينه و جارتنه شنو
متكلي ورامن نوكف اذا همه كل السياسيين و الاحزاب منافقين و دجالين احنه ورامن نمشي منو يلمنه و يوحدنه المصيبه هسه الوضع صار كالاتي عندك طلقه تسوه طلقه ماعندك طلقه .... كلشي متسوه
الجاره شلون
 
بالمناسبه احب ازفلكم هذه الخبر
الجكاير بالفزاليه صارت حرام
 
الأستاذ الغالي شلش
بدايتاً أحب أعرفك بنفسي
أني هشام من الناصرية ويمكن أنا الوحيد ألي بالناصرية طبعت أذا كانت ليست كل مقالاتك فأغلبهن وقمت بتوزيعهن على أصدقائي بعد أن جمعتهن بفايل بسيط والكل يشكرني كوني وفرت الفرص لهم لقراءة مقالاتك الجريئة
علماً أن عرفت موقع كتابات من خلال زياراتي المتكررة لمكتب سماحة السيد أياد جمال الدين
المهم أستاذي الغالي
في الأاونة الأخيرة لم أجد كتابات شلش تلك الكتابات التي كنت أضمد بها جراحي وأخص كتاباتك من بعد صدور حكم الأعدام بطاغية العصر المجرم صدام
رجائي الأخوي
أن توضح لي
هل هذا أعتقادي صائب أم لا
وقد لاأكون أمثل لك شيء لكن أنا أحد المهتمين بكتاباتك فأرجو أن ترد عية
وهذا أميلي
hu75s@hotmail.com
 
السلام عليكم و رحمة الله اخوتي

شلونكم و اخباركم؟ ان شاء الله بخير .... بس اتمنى من الله سبحانه ان تكونون بخير و سلامة ... صار لك مدة مو مبين اخونا شلش ... ان شاء الله المانع يكون خير اخي ... ظل بالنا يمك و انت تدري الامور شوي ما تسر عدو و لا صديق ... ننتظرك و ننتظر رجعتك لقرائك بالسلامة ان شاء الله

و السلام عليكم و رحمة الله

بنت بغداد
 
اخي شلش اريد اسالك ليش بطلت تنشر بموقع كتابات؟
هل صحيح لانك اكتشفت ان صاحبه خط مايل؟
 
والله يا شلش اني من اشد المعجبين بكتاباتك...وعاشت ايدك لأن فضحتهم....والله يومية انتظر منك ان تفضحهم اكثر واكثر...وخصوصا حبابيبنة الل.............انت تعرفهم...اصحاب العمائم الطاهرة..ننتظر منك كل جديد شلش.....تحياتي المعجبة
 
وحبيت اباركلك على السيارة....بس دير بالك لا تتسلب.....تحياتي..المعجبة
 
اولاً تحياتي للاخ شلش واحب اسجل اعجابي بقلمك وفكرك

واحب اكول للاخ عماد الاغنيه روعة

تحياتي للجميع

دينا
 
سلامي للاستاذ شلش
مبروك لكم السيارة الجديدةبس لو مشتري دراجة كان افضل لانها اسرح واحسن في شوارع بغداد المزدحمة وخصوصا عندما تكلف نفسك بلتفتيش عن المضلومين والمنكوبين في كل احياء بغداد
هاي سيد خدوزي ومشكور على الاغنية الا يوجد لمارسيل خليفة اغنية وطنية مناسبة يمكن اهدائها للسيد شلش ام انكك مقاوم جديد لا تعرف اغاني المقاومة التقليدية
اود هنا ان اؤؤكد بان غالبية الشعب العراقي مستعدة لمقاومة الاحتلال وبدون تردد ولكن ومع الاسف انت العراقي يرى ويسمع عن المقاومة التي تجزي الان وهي اسلوب قذر لتجعل الناس تقبل بلوجود الامريكي الكابس على الصدور ولا هذا الشكل من المقاومة
لان العراقي عرف المقومة الجزائرية والفيتنامية والفلسطينيةسابقا ولاحقا من بيسان والاغوار الى جنوب لبنان الى العرقوب والاخضر العربي بلمناسبة يا سيد خدوري المقام الجديد ان الاخضر العربي هو بعثي عربي من تلاميذ صلاح جديد وتعرفه العرقوب وحاصبيا وكل ارض جنوب لبنان
حاول ان تفش عن انتصارات ما تسمى المقاومة العراقية في الاسواق ومراكز العزاءوووووووووو

ومبروك لك سيد خدوري هذه المقاومة
وللسيد شلش اتمنى ان يتذكر صويحب وبقية ابطال انتفاضة ال 67 في اهوار العراق

ابو احمد العبيدي
 
شلش وينك..صار حوالي اسبوع وما كتبت شي..اني خايفة عليك بس لا صار عليك شي بالاحداث الاخيرة..الله يهدي نفوس العراقيين ويحفظكم ويحفظنا
 
شلش وينك صار اسبوع ماكو ..اني ظل بالي عليك من الاحداث الاخيرة..الله يحفظكم ويحفظنا
 

عزيزي الدكتور عماد
الاغنية جميلة، وعلى الجرح.. ولكن -وكما تعرف- لايمكننا تحميلها من موقع يوتيوب.. حبذا لو تضعها (للتحميل) من موقعكم.. مع تقديري.. واتفق معكم بشأن رأيكم بالإرهاب..
د. فاضل بدران
http://iraq4ever.blogspot.com/

 
haaa weenik talk about what happen today in Iraq....don't u think it's time to talk but not joke....Walah shibana talk that's it.
 
أخواني الأعزاء...
رابطة مشجعي شلش العراقي موجودة في الرابط التالي:
shlashfans.blogspot.com

أخوكم البغدادي
 
أخواني الأعزاء...
رابطة مشجعي شلش العراقي موجودة في الرابط التالي:
shlashfans.blogspot.com

أخوكم البغدادي
 
Dear all,
We have a new blogger for our lovely critic Shalash Al Iraqi and I called Shalash Fans.

http://shalashfans.blogspot.com/

I will try add all his article as me time allow me for that.

Regards,

Baghdadi
 
يسلام عليك مقالاتك رائعة
 
Dear Shalash, It's been 10 days since your last post, I hope nothing is wrong, we are all waiting for your comments on what happened in Sadr City. Best regards.
 
its been a long time that u did not publish a post Shalash, r u ok? please let us know.
 
اخي شلش كلامك كلش معقول بس جيب الي يفتهم ، عراقنا ضاع بعد اخذها مني حجاية وميرجع ...
 
Hello Imad,

Is there anything wrong with Shalash? I am worried that somthing happened to him during the crises. Tell him that we are all waiting for his comments.
 
شلش سلاماً انت وكل العراق
اتمنى من الله ان تكونوا على احسن ما يكون
 
شلش سلاماً انت و كل العراق
رب اجعل هذا البلد امناً
 
YEs i am worried too .. i hope hes fine man .. u never noe wen ur day comes in iraq


plz be safe shalash
 
سمعتوا باللي عندة وطن وضاع
سمعتوا بالحاير ويشم الكاع
يدورعلة ريحة وطن اسمه العراق
من سنين والجرح غاير بصدره
وكلبه من كثر القهر انفطر
وعلة الهجر والنسيان ماكدر
وفشة سر الحنين وصاح وذاع
وين الوطن ياهل الوطن
وين الكاه او وين ينباع
كالوله مخبل لا تحن وانسه
وعيش الامان وين ماجنت
وطنة بين الدول تفصيخ انباع
كاللهم ولكم سالفتكم صدك
هيج العراق بساع ينّسه و ينباع
لو نسيتو من جنتوا صغار ولعبتوا
بين بيوت اهلنة والجار اخو الجار
ومن جان عدكم ارض وبيوت والداريم الدار
وبالمدرسة اول حرف دار
ودار الزمان وصرتوا بلا دار
والدور وية الدار تسوي محلة
والعراق مو عالخارطة صورة و رسمه
العراق والله بالكلب محلّة
ولو الف بوش وبليروكل الكفار تعاونوا
ووكفلهم الف خائن لكاعة ولأهلة
عراقنا ماينقسم تفصيخ لا والله
واللي يروح من عدنة اليوم بالغدر
باجر نلوي ايديهم ونردّة
العراق مو مال أبوهم
العراق عراق ناسة وأهلة
وخلي الشامت اليوم فرحان
واللي حد سجينه بنحر العراق اوولده
بس من يجينا الدور ونندار
ذاك الوكت انلزمة حدة
وترة حك الجار بالامثال عالجار!!
والله عالمعتدي من فوك
هوة اللي يشوفه و ينتقم من عندة
سمعتوا لو بعد.. ياسامعين الصوت
العراق مايخونه اللي عراقي أبوه وجدّه
مايخون الوطن اللا اللي فاين حظة وبختة
وسودة بوجه كلمن ركع للاجنبي و باس رجلة
واللي بالمنطقة الخضرة اليوم متحصن
باجر الجابة للعراق وياه ايردة
ويبقه العراق النه وللي من كلبه يحبه
وللي العراق عندة أعز من عينة او ولده
وللي ايريد من العراق بس الهوى
مو كومة فلوس لو نفط بالبراميل يحلبة
وهم بعد تكولولي لاتبجي عالعراق و انسه؟!
مو عيب عالاصيل لو بجت عينة
وبالعبرات الجبيرة اختنك حسه
من شاف الوطن برجل الكفر ينداس خده
وكل يوم بالميات ينكتل من عندة أعز ولده
تكولولي انسه واني أذكركم
هذا عراق الخير لحم جتافنة من عنده
واذكركم واذكركم وهاي تاليهة
صار الوطن تذكار وعلم وشعار علة ركابنة انشدّة
وخبر مستعجل علة نشرة الاخبار
انو انفجار يم الدار كتل الجار والصغار
حتى العصافير ما نجت
حطولهة مفخخة بالاشجار
ونكت وسوالف شلش وهذا اللي صار
من عكب عينك يالعراق ما النه اسم
شأسمي العراقي من غير العراق
لا وعيونك اللي ذبلهة الحزن
تبقى انت بينا رسم واسم اووشم
وهوستنة للموت لمن نحن
اي والله و عونج يا كاع
ونشيدنة للصغار انعلمه رغم الحزن
موطني موطني
 
دعاء سياسيين العراق

اللهم زِد من جلوسناعلى كراسينا وبارك لنا فيها!ـ
واجعلها للوارث منا!ـ
واجعل ثأرنا على شعبنا!ـ
وانصرنا على من عارضنا!ـ
ولا تجعل مصيبتنا في حُكمنا!ـ
ولا تجعل راحة الشعب أكبر همنا ولا مبلغ عِلمنا!ـ
ولا الإنقلاب العسكري مصيرنا!ـ
واجعل القصر الرئاسي هو دارنا!ـ
اللهم إنا نسألك فترة ممتدة!ـ
وهجمة مُرتدة!ـ
والصبر على المعارضة!ـ
والنصر على الشعب!ـ
ونسألك الحُسن لكن لا نسألك الخاتمة أبداً!ـ
اللهم ارزقنا معونة لا نسرق بعدها أبدا!ـ
اللهم لا تفتح أبواب خزائننا لغيرنا!ـ
اللهم أعطنا كلمة السر لحسابات الحكام السابقين لنا في بنوك سويسرا!ـ
اللهم وفق أمريكا لما فيه خيرنا!ـ
اللهم اغفر لـ (جورج بوش) فإنه لا يعلم أننا لا نعلم!ـ
اللهم وفقه لما فيه 99% في المئه من أصوات الناخبين!ـ
اللهم اقذف حُبه في قلوب (اللوبي) الصهيوني كالجلطة!ـ
اللهم لا تُحاسبه من أول غلطة!ـ
اللهم نجهِ من أي إعصار أو كارثة طبيعية لأننا سنلوص مع شعوبنا من غيره!ـ
اللهم عليك بشعبي، أما أعدائي فأنا سأتفاوض معهم!ـ
اللهم طيّب جمرتي وخبّث جمرة شعبي!ـ
اللهم ارزقنا حب أمريكا
وحب من يُحب أمريكا!ـ
وحب ما يُقربنا إلى حب أمريكا!ـ
اللهم مش كنت خلقتني أمريكاني و ريحتني!ـ
اللهم أمركني ولا تأفغني!ـ
اللهم برطني ولا تصوملني!ـ
اللهم فرنسني!ـ
اللهم ألمني ولا تؤلبني!ـ
اللهم أني أبرأ من الإستعانة في حكم شعبي بأحد!ـ
ولا حتى بصديق، ولا برأي الجمهور!ـ
اللهم أني أعوذ بك من كرسي لا يُخلع!ـ
ومن شعب لا يُقمع!ـ
ومن صحيفة لا تُمنع!ـ
ومن خطاب لا يُسمع!ـ
ومن مواطن لا يُخدع!ـ
ومن الوقت المستقطع!ـ
وأعوذ بك من كل عمل يُقربني إليك!ـ
اللهم لا (تكنسل) دعاءنا!ـ
ولا (تهنجنا) ولا تُعد تشغيلنا!ـ
ولا ترفعنا من الخدمة أبد الأبدين يا أرحم الراحمين يا رب

 
السلام عليكم و رحمة الله اخي د. عماد ...

وينه شلش؟؟؟ بس لا صار بيه شي لان احداث الايام اللي فاتت كلش هواية تخوف و احنا كلنا خايفين لا يكون صار له شي .... الله يخليك طمئننا عليه لان ظل بالنا عليه كلش هواية ... هو الوحيد الشريف اللي ينقل لنا الصورة و كلنا يهمنا شنو اللي صار له....
الله يحفظكم كلكم و يخليكم للوطن ... العراق يحتاج كل عراقي اصيل ان يوقف و يكشف الغمة عنه ... الله يحفكم جميعا

و السلام عليكم و رحمة الله
 
شلونك اخويه شلش والله جنك بكلبي و كلشي تحجي صحيح بس انت كلي اكو احد من العالم الموجوده او خلي نكول اكثرهم راح يصدك و يفتهم اللي انت و اللي مثلك ديكولو و هيه هنا المشكله اخويه اني حجيت على الحكيم بيبيتي ضربتني بالنعال و تكلي ولك مو حرام عليك تحجي (عالسيد)يابه هسه هو قابل الله و ما احجي عليه
و صاحبي سني جان بايت يمي حجيت عالضاري زعل و طلع من يمي بثمانيه و نص بالليل و جان حظر التجوال بالتسعه و هو بيتهم بالعامره و اني بالكراده يعني شوف الزعله شلون قويه بحيث كلبته اسد يطلع بالليل
اي اخويه تره هذوله الزغار اللي دتحجي عليهم مع الأسف صارو كبار مو مثل كبل واحدهم كاله ميسوه
طبعا لأن اجو على ولد الخايبه و قشمروهم كالولهم راح نسوي عراق اسلامي مثالي زين يابه هذا يا اسلام منهم اللي راح تسوو مو احنه عدنه ميت صفحه بس على كولة الشاعر
لا تصفن بدنياك اذا صفنت تدوخ
صارو صدر ديوان بعد ما جانو فروووو

اتصور انته و غيرك من القراء الكرام راح تفتهمون البيت الأخير لأن مثل ما انت كلت العراقيين اذكياء
و انشالله نظل نسمع من كتاباتك الحلوه و اللي تعبر عن واقعنه المؤسف اللي صار يضحك لأن شتسوي شر البلية ما يظحك

و السلااااام
 
الاخ عماد خدوري المحترم
ارجو ان تطمئننا حول الاخ شلش, هل هو حي يرزق هل لديكم تواصل معه.
لقد عودنا الاخ شلش العراقي حقا على رصد الاحداث بشكل متواصل ولكنه انقطع عنا واسأل الله ان لايكون انقطاعه هو الغيبة الكبرى. نسأل الله ان يبقيه ويديمه صوتا عراقيا اصيلا معبرا عن ضمير كل عراقي شريف. ارجوك طمئنا

ابو علي
النرويج
 
الأخ العزيز عماد

تحية طيبة وشكرا على التواصل المفيد

لدي استفسار بخصوص الأخ شلش - هل عاد الى مرحلة السبات الشتوي؟ فقد لاحظنا توقفه عن الكتابة - والقراء في شوق لكتاباته ..ـ
نأمل أن يعود قريباً، هذا إذا كان قد نجا من مجزرة المفخخات القذرة التي قام بها التكفيريون في مدينة الصدر قبل أيام

وشكرا


 
هاشلش هاي انت هم صرت تبيع وطنلوغيات بسوك مريدي
 
تبرىء الكلمات في القلوب

ثم همس الرب في قلوبنا...
الكلمات تصل حيث لا يقدر السلاح

سألنا حكيم قريتنا، كيف ينزل الدفء
على النفوس والشيطان
قد ألقى بسمومه المفضلة
خوفاً ويأساً وكراهية
على القلوب البريئة
كما الرماد من محرقة السعادة

كيف تنام عيون الايمان
وسرير الأمل
تفترشه ملاءة القنوط الشاحب
وعيون الحنث الفاسدة
تنتهك حرمة الكلمات المقدسة
وتسعد باغتيال هدايا السماء

وسألنا :كيف يبتسم الخير
ويصفع الكره الفضيلة من وجه الخجل
و أتباعه يشوهون ويحرفون فى نفوس ضحاياهم
حتى يصل الاعتقاد
بأن الإثم فضيلة والقتل عدالة والكره هو الحب

تحدث الحكيم
بصوته الخفيض وقال
أن للشيطان أتباع
يغتسلون في أنهار النبيذ في حادي*
وبعشق السخرية الفارغ
يحصدون نفوساً مغشوشة جنيت بمنجل الانتحار

مستحيل أن يكون الطريق إلى الفردوس مرصوفاً
بجثث الأبرياء - عبر نهرٍ من الدم
اعتنقوا مد الحق وجزره الرائع في قلوبكم
تقبّلوا الشك والعار أينما كانوا
لكي تدركوا أن النفس تسعد بالعطف وليس بالانتقام

سطع صوته كالضوء وقال:
ابحثوا بشجاعة في أعماق قلوبكم
بلا نفاق ولا خداع ولا إجحاف
وحين تلمسوا الايمان هناك
ستنزل الكلمات الالهيه دواءً للقلوب
مثل مطر أبدي يجذبه البحر دائماً
حتى يرتفع ليملأ حرم النفوس
بودٍ عميق هادىء ويغدو سلاماً
على شواطىء العزم الالهي.


[أرض الموتى في الأساطير الاغريقية*

أبريل 2006
 
اهلا شلش و اهلا استاذ عماد خدوري

والله وحشتنه شلش اشو ماكو ؟ اني يوميه انتظر كتاباتك و افتح موقعك ميت مره باليوم مثل المخبله بس مع ذلك انت ماكو والله اني دائما ما اعتب على اهل بغداد لمن يكطعون. يعني الله يساعدكم والله بس مع ذلك لتنسه قراءك و محبيك اللي ينتظرون مقالاتك يوميه. الله لو يعينوك بدل ابو اسراء والله انت تفتهم و محلل اتستراتيجي تملخ...
 
شـلـــــش فـــي ذمـــــة الـخلـــــود
 
اٍنــا للـــه واٍنــا اليــه راجعـون
شلــش فــي ذمــة الخلــود
 
hello,
Kindly inform us if there s something wrong with Shalash.. So many events r going on and its impossible that he has no comment to say or an article to write.. is something the matter?? ev morning me and my freinds at work open his site to see if there is any new news.. and nothing is on since 17/11..
kindly inform him we miss his articles.. and we hope he is ok after all the awful things going on in iraq in the past few weeks..
 
هاي وينك يمعود شلش مو الدنيا مكلوبه
 
السلام عليكم ورحمة الله وبركاته استفساري عن الاخ شلش وماهي اخباره وماهو سبب توقفه في هذا الوفت المهم هل هناك مايوقفه نرجو الاطمئنان على احواله وشكرا
رعد العراقي
 
Hello,

this is my second try to send a comment , asking about Shalash,, kindly inform if he is OK or what exactly has happened to him.. me and my freinds are all worried,, we got so used to open his site and checking whats new ..
we are worried something bad has happened to him..
 
مرحبا..
لاحظت من اكثر من اسبوعين ان اخبار شلش انقطعت..حقيقة احنا خايفين بس لا صار عليه شي خلال هذي الفترة..الله يحرسه من كل سوء
 
good evening
i have noticed that shalash had disappeared,since the last time he wrote in his blog
i am worried about him even i dont know him personally
i hope he will be back safe again
rana
 
الأخ العزيز والذي لم أتشرف بلقائه شلش
طلت علينا غيبتك ياضمير العراق الحي يامن ترى الوضع العراقي بدون عدسات طائفية، يامن تعبر وبصدق عما يحس به العراقيون والعراقيات الكادحون. والذين ملوا الخطب السياسية الفارغة. إشتقنا لكلامك الجدهزلي والذي كلي أمل أن ينتبه له الساسة لكي يحسوا بما يعاني منه الشعب ولكي يتلفتوا لعلاج علله الذين هم قسم من أسباب هذه العلل! دعائي لك بالسلامة وأمنياتي لك ياأخي بالصحة والتوفيق وطمننا على أحوالك ياشلش ياعراقي ياأصيل

ئاشتي مجيد
 
الاخ شلش المحترم

لقد تحدثت على مديرة مدرسة بدر الكبرى في مقالتك هذه، تعرف المليشيات قد مثلوا بها و قتلوها - تعرف السبب ليش ؟

تحياتي لك
ابو اوس - الغزالية - بغداد
 
يمعود شلش يوميا افتح هذا الموقع على أمل ان اشوف مقالة جديدة منك وما اشوف شي جديد والله بقا بالنا يمك أفتقدنا مقالاتك اللي اتبرد الكلب والعراقيين الشرفاء كلهم ترى ايحبوك ويقرون مقالاتك عفيا طمننا عليك
 
Where is Shalash Al Iraqi I hope they haven't killed him too
 
Please let Shalash write some thing I hope he is not killed too
 
Am I looking stupid! or the blogs are just like that ,, this is my first blog so please execuse my mistakes I'm asking if Shalash is still a live and I wish to read his comments on the current situation,, please Shalash back to us
 
السلام عليكم
حبوبي شلش العراقي
السلام عليكم ورحمه الله تعالى وبركاته
لا عاب فمك يا غالي اي والله لا عاب حلكك
لك داد كول لهذا مثال الالوسي يبطل من الحجي الفارغ مالته يدعي بالديمقراطيه وهو محتل ويهين بيه اصغر جندي امريكي ومن يطلع بالشارع ربعه الخوافين ملثمين ويضربون طلقات على الناس حتى يفتحلوه الطريق وهو رياح للبرطمان قصدي البرلمان
اني عايش في ليبيا وهذا الغبي مثال الدحوسي من كلمه دحس وحشر انف يحجي حجي فارغ ويريد يطكع رزقنا احنه هنا اللي عايشين في لبييا وهو المهم دولاراته واصلته من ابو اسراء وربعه والباقي مو مهمهين عنده حتى لو انكطع رزقهم لو انطردوا من ليبيا
هو لو بيه خير يحارب اللئيم قصدي الحكيم والايرانيين اللي مطيحين حظه وحط البرطمان
حبوبي شلش احجيلينه عن الالوسي هذا وشوف فلمه شنو اخاف بعصي قصدي بعثي قديم يمعود ؟
اخوك رافد
عراقي في ليبيا
 
مع الاسف اكتشفتك متاخر. من سخرية الزمان انك تشتري سيارة قبل حادث التفجير الكبير في مدينة الثورة. نسال الله انك من الاحياء.
 
إرسال تعليق



<< Home

This page is powered by Blogger. Isn't yours?