الاثنين، 30 أكتوبر، 2006

إعادة نشر مقالات شلش العراقي على الإنترنت

.
لأسباب فنية على الأغلب، تم رفع العديد من مقالات شلش العراقي من موقع "كتابات" والتي كان ينشر شلش مقالاته فيها.ـ
ونظراً لإحتفاضنا بأرشيف كامل لمقالات شلش العراقي، فلقد تم الإنتهاء من إعادة نشر كافة مقالات شلش والصادرة في نهاية عام 2005 بالإعتماد على موقع كتابنا "سراب السلاح النووي العراقي".ـ
تبيـّن لنا الآن بأن العديد من مقالات شلش العراقي لبداية عام 2006 قد تم أيضاً رفعها مؤخراً من موقع "كتابات".ـ
سنقوم تدريجياً بإعادة نشر كافة مقالات شلش على هذا الموقع. ـ

الأحد، 29 أكتوبر، 2006

مشاعر شلشية

خلصت المظاهرة السلمية مال جماعة مقتدى، والناس تفرقت ، دوام ماكو ... وحتى اذا واحد راد يطلع شوية ، هم الطرق كلها حواجزوتفتيش ، والامريكان بكل مكان ، ضايعلهم واحد ويدورون عليه ، كلبوا الدنيا عليه ،هو مجرد جندي ، قحط ، شبيكم مشايفين جنود ؟، هاي انتوا لو ضايعلكم وطن مثلنا شتسون؟؟ ، يمكن تحفرون المريخ ،والمشكلة الجندي مالهم الضايع من جماعتنا ، خطية عود فلت لامريكا المسكين وهناك، هم ما كعد راحه ، راح اتطوع بالجيش ، شلون فكَر بامريكا ولبس ابو خليل ، دروح لهوليود صير كومبارس ، روح اشتغل مطرب شعبي مثل اخوانا الملونين ، وبأمريكا اسهل من الغناء ماكو ، البس نص بنطرون وشكك هدومك وجيبلك جم وحدة سمرة طوخ من الكَيارة وكوم صيّح " اي لوف يو"، راسا يحطوك بفرقة ففتي سنت ، يابه ملازم ففتي سنت ، سويلك فرقة اسمها ، خمسين فلس واذا ماقبلوا بالعملة العراقية سمي فرقتك" نص ورقة "،.. يعني مالكيت الا تصير نايب عريف ، وفوكاها تجي هنا وتضيع واحنا نبتلي من وراك ،صار اسبوع مطوقين بغداد والناس كاعدة ببيوتها لاحس ولاحركة ، حتى مؤتمر المصالحة من وراك نقلوه بلندن، لان هناك الطرق يكولون مفتوحة .بس ترى هاي حلوة مال نتعارك بابو سيفين والفضل ونتصالح بلندن . لك احنا رحنا للكعبة نتصالح ماصارتلنا جارة ، بلندن راح نتصافى ؟، اخوان اذا واحد زعلان عليَّ خل يجي بلندن نتصالح ، والله جديات خل يجي بلندن ، يلكاني جوه الجسر . بس على شرط بعد ميسويها ..
المهم ، لبست بنطروني وقميصي وكعدت بالركن يم البلوكة ، كلت بلكي يجي صديق منا منا ونكضيها سوالف .. ورا شوية ، كلبي كام يدك ووجهي صار اصفر وايدية كام ترجف ، شكو ؟ اجت خديجة المعلمة ، اليوم طلابها اخذوهم للمظاهرة وهي راجعة مشي سودة علي .. حضّرت نفسي وهيأت جم كلمة حلوة واستعديت ، خديجة اقتربت .. وصلت .. صارت كبالي ...صرنا وجه بوجه ، كَِلبي كَام يدك اسرع..الزموني راح اموت .. كمت ارجف ... خديجة فاتت ماعبرتني .... لا كلام ولا سلام ..شايلة خشمها .. ليش ما ادري؟ .. كعدت اتذكر.. اني مسوي شي غلط ؟...
لا والله وحياتكم صارلي شهرين جار عدل ... لاسكر ولاعربدة ولامغني بصوت عالي ولا متحرش بمرة اخوها ، لعد هاي شبيها .. ليش هيج لبستني .. يابا خل تروح شنو قحط بنات ..شلش هاي شبيك والله الف وحدة تتمناك .. بعدين ترى خديجة مو حلوة .. يعني موذاك الجمال ..وشوية مغرورة .. اني شخابص نفسي ..ومثل يكول المرحوم سعدي الحلي " حبيبي امك متقبل من احاجيك " بس هي ليش ما سلمت ، خاف ماشافتني ، شنو ماشافتني ؟، قابل اني بريعصي ، رجال شطولني شعرضني .. يالله خل تروح .. هاي مو اول مرة ... ياما سهرنا ليالي وياما صعنا وتركنا الدراسة وعفنا الاهل ونسينا المستقبل وياما غبنا من الجيش وتحملنا اهانات العرفاء ، وياما تعبنا ويامنا وكفنا براس الشارع وتحملنا قهر ومطر . وياما الشمس شوتنا وياما البرد موتنا.. شحصلنا ... ياهو نكول عليها هاي بت اوادم ، تطلع مصادقة سطعش واحد وبالاخيرتتزوج واحد حواسم ، لازم انسى خديجة وابو خديجة .. عائلة كلهم حقراء ..وابوها اكبر ارهابي .. واخوها علاس ، وعمامها بحارة باكو النفط مال البانزينخانة ، بعدين مريم بت حجي فارس احلى منها الف مرة .. وتشبه مريام فارس ، اسم على مسمى ... تعرفون مريام فارس ؟..لا بشرفكم ؟ صدك متعرفوها ؟ اكو واحد ميعرف مريام ؟.. اذا نانسي عجرم صاروخ ، فمريام فارس حاملة طائرات ...شعرها وحده يسوى الف خديجة ... اليوم عليها .. اليوم راح الوصها ..اليوم ادوّخ الجمجمة و صدك راح انسى خديجة وعشيرتها وبالقندرة , بعد ما عبرها حتى لو تبوس نعالي ، خل تعرف اوادمها مو عبالها اني ميت عليها ، الكرامة فوق كل شيء والمقاومة حق مقدس لكل الشعوب...والله ودعاتكم اني ما ادريلها بال ، بس اكول خطية . نوبات تكسر خاطري واجاملها ، بس بالحقيقة مو هي فتاة احلامي .. لايابا خديجة منو .. اصلن متجي ابالي لو ما الفراغ والضوجة والكهرباء مكطوعة وشبكة تلفون ماكو ومقهى الانترنت معزلة وماعدي شي اتلهى بي ... اسكتوا .. اسكتوا اجت خديجة .. بشرفي هي ، اعرفها من صوت حذاءها .. اي والله هي .. اجت اجت .. فدوة لهل المشية ..وصلت.. اسكتو

ها شلش شلونك، اشو كاعد هنا
. . . . . . . . . . .

والله مشتاقتلك وينك صار يومين ماكو

. . . . . . . . .

حياتي شلش
. . . . . . . . . .

لك شنو هــــــــــاي ، ارتفعت درجة الحرارة .. صخنت .. راح اموت .." حياتي شلش ".. احلى اغنية بالعالم .. خدوج انت عمري، انت حياتي ..كل عشيرتي تروح فدوة لقندرتج.. ها يابا مو كتلكم خديجة ماشافتني .. مسكينة تعبانة .. خدوج احلى وحدة بالعالم والله .. خدوجة لو يشوفوها الامريكان راسا يعوفون الجندي التايه مالهم ويجلبون بيها .. خدوج ملكة جمال الكون .. قمر القطاع وكهرباء المحلة ..خدوج مولدة 700فولت تغذي القطاع مشاعر واحاسيس،خدوج تكهرب الرصافة من تضحك ومن تبجي يعزل الكرخ ، والله مشيتها موسيقى .. قابل هي مريم بت حجي فارس العوجة .. مريم ام سنون .. مريم ام رعيصة .. ام كمزة .. انعل ابوها لا ابو حجي فارس وياها .. وحدة دايحة .. عاوية ..متوصل لقندرة خدوج ..
حياتي شلش
حياتي شلش
اكلكم انتوا سمعتوها كالت حياتي شلش؟ ، لو اني ما مركز ؟!.. خاف لبستني واني متوهم ... واذا لبستني احرك ابو ابوها بت الكلب.. لا اني هم لبستها شفتوني شلون درت وجهي ومارديت عليها.. اصلا ولا عبرتها شنو قحط نسوان .. الف وحدة..... اسكتو .. اسكتوا رجعت خدوج ..........ـ..



الخميس، 26 أكتوبر، 2006

شلش بالتبني !!!!ـ

اليوم الجو جان كلش حلو ، غيوم وزخات مطر خفيفة ، لكن الثورة كعادتها لاتحب الاجواء الجميلة . انه قدرها وحظها الاسود والمصخم ، فبدل ان تعيش يوما من ايام العيد كباقي مدن الله ... تسربل في شوارعها من الصباح الباكر ، نشالة ابودرع وقفاصة حجي محمد ابو مريم ، لملاقاة الطائرات الامريكية والدروع والمارينز الذين جاؤا لالقاء القبض على ابو درع ، الله يرحم ايام زمان، والله اربع انضباطية جانوا ياخذون نص الدربونة ومحد يفك حلكه ، هسة اكبر امبراطورية بالعالم جاية على ابو درع ... عشنا وشفنا .. المهم ، ركض ودربكة بالدرابين، وفليح الاطرم يوزع المهام على المقاتلين الاشاوس، ويحذر السكان من مغبة الخروج من مساكنهم، واطلاق نار عشوائي، ناس ماتت وناس انجرحت وانتهت القصة باحتفال جماهيري حاشد بقيادة عضوي الكونغرس العراقي فلاح شنشل وكريم بخاتي.. هوسات وطربكة وشجب واستنكار وصور القائد ومشهد قديم شايفه الف مرة ،من ايام الزعيم لحد الان .. واني بنص هاي المعممة لاماكل ولاشارب ، اريد اشوية ارتاح ، اكتبلي جم كلمة محد مطيني فكه ،عبالك كاعد بالجبهة مو بالبيت ، شمسوي ياربي ، ليش هيج ، اريد ارتاح جم يوم ، ليش العمر خلصناه قهر بقهر ،سنة كاملة لطم ، واجه العيد هم كلبوا الجماعة مناحة وقهر ... هسة ليش انولدت بهاي البقعة المباركة . يعني الا بالثورة. ليش ما الله خلقني صيني .. فليبيني ، موزمبيقي ، حتى لو فرنسي هم ميخالف ، يابة لو من ملاوي هم اني قابل ، على الاقل بملاوي تجي مادونا وتتبناني ، الله .. تخيلوا شلش امه مادونا ، يومية الصبح اكعد اغسل وجهي وافرش اسناني وامشط وابوس ماما :
هاي مامي.. هاو ار يو تو دي ؟
تبتسم ماما وتحط ايده على شعري .وتكلي من كل كلبها : هاي بيبي
بيبي .. والله هي كالت بيبي اني شعلية،ليش تغارون ؟ شبيكم مشايفين اجانب ؟...بيبي ونص وغصبن على شواربكم ... مستكثرين علي بيبي يا معدان ..هيج ويسويها البخت واعيش حياتي بكنف مادونا ، والله احسن مليون مرة من كنف حجي ارحيمة .. هو منيله كنف ... حجي ارحيمة قنفه ماعده .
الله بشرفكم خلوني احلم .. لحد يكعدني .. ماما تروح لباريس تاخذني .. تروح للمكسيك على عنادكم هم تاخذني ...تروح للزيارة تاخذني .. تروح للسوك هم تاخذني .. انجب لك ، هي مادونا تروح للسوك ، صدك متخلف ..
يعني شيصير لو صدك مادونا تتبناني .. جان شاكيرا صارت جيرانا وبيت جوليا روبرتس ورانا وبيت جنيفر لوبيز شوية ليغاد من الفلكة .. وعلى ايدك اليمنى اول متلوف بيت برتني سبيرز وبراس الشارع يم ابو الصمون بيت كاميرون دياز ..
اخوان بشرفي، بشرفي اذا مادونا تتبناني اطيكم كل واحد ورقة ،ميت دولار كاملة ... كلكم اطيكم ، انعل ابو الفلوس ... شنو قحط ..الفلوس وسخ دنيا ،
تخيلوا من اصير ابن مادونا افتح التلفزيون يطلعلي عدنان الدليمي .. راسا تلعب نفسي ..ادوخ .. التلفزيون يكوم يهتز . عوع .. هو از دليمي ، .. هي از ديرتي، اي هيت هم ...اي هيت هم ..اي هيت هم ..واو ... هاي افري بدي ، ايام ذي سن اوف مادونا ... ماي مام از بوب سنغر ، هاي مستر مالكي .. هاي مستر هكيم .. هاي الاوي .. هاي مهدي الهافز .. هاي مس سفية سهيل .. هاي دير مستر مشئان .. هاي تلباني اند برزاني اند بولاني ، بليس وير از مستر سولاغ لونك تايم نوت سي هم ، تيل هم هلو بليز ،باي سي يو ...
مادونا بشرفج وانت اشرف من الجمعية الوطنية ، ليش رحتي لملاوي تتبنين طفل، جان حجيتي ، مو اني هم طفل بريء وما عدي احد ... والله يتيم ومشتعل جد جدي ،، ليش مادونا ليش .الله يقبل ...
يابه ملازم مادونا ، ماكو وحدة مطربة ، راقصة ، كاولية ، تجي تتبناني وتخلصني من جيش المهدي

الثلاثاء، 24 أكتوبر، 2006

مو كلمن يهز الجتف مثلك بشغلة محترف

.
ايامكم سعيدة ، واشكر كل الاخوات والاخوة الذين ملئوا بريدي بالتهنئة بالعيد ، وبرسائل رائعة وجميلة تشبه العراقيين الطيبين ، وصراحة اني بين فرحان وبين خجلان من هاي الرسائل ، وامام هاي المشاعر ماعدي غير اكول الله يرجعلكم عراقكم مثل ماتحلمون بي ، عراق الفة ومحبة واخاء وتفاهم وشلونك عيني وشلون الاهل ، وسلملي على ابوك وكل للحجية باجرغداها يمنه ،ـ
والاخوان الذين فاتهم اكل الكاهي والكيمر اقول لهم لتديرون بال ، شلش اليوم اكل مال عشرين نفر ، صدكوني ما اتشاقه ، اليوم اكلت كيمر وكاهي عبالك مشايف ، حتى خالتي صبيحة كالت :هاي شبيك انفتكت خو ما انفتكت ، والبارحة صدقت توقعاتي ولطيت نص عرك ، الجماعة عزموني وكلت دعوة كريمة واني استاهل ولازم البيها، ومثل كل سنة اتعب اواجوع واعطش برمضان والوصها بالعيد، وكعدة البارحة جانت صدك كعدة تخبل ، لان الاخوان القائمين عليها حرسهم الله ، منعوا اي حديث سياسي ، وكل ما واحد راد يدخلنا بالسياسة ، يكوم وسام ويعلي صوت التلفزيون ، وشلون اغاني البارحة ، كلها تنزل على الجرح، ومن بين هاي الاغاني عجبتني اغنية لمطرب نسيت اسمه ، بس الحلو بهذا المطرب انه شوية يشبهني ، وهم نصاب مثلي ،واغنيته تكول "موكلمن يهز الجتف مثلك بشغله محترف .." وهو هنا يتغزل باحدى اخواتنا الكاوليات اللائي يتقافزن مرحا امامه ويحركن شعورهن ذات اليمين وذات الشمال..ـ
ولكن موضوع هذه الاغنية كان سببا للمفكر الاستراتيجي عبد الرضا صاحب التصريحات الرنانة لكي يبادر بالقول ، والله صحيح مو كلمن يهز الجتف مثلك بشغله محترف ، ثم اضاف الاحتراف والخبرة يا اخوان ضرورية في كل مجال خاصة بالسياسة ، وان سبب ماساتنا ان الاخوة القائمين على الشان السياسي عندنا لا سياسيين ولا هم يحزنون ويعملون تحت شعار "لا اطيك ولا اخلي رحمة الله تجيك" ، قاطعه رزاق ، يابا موكلنا ماكو سياسة ، والله اليحجي سياسة هسة اطرده ، ورزاق معروف بسجله الاجرامي في طرد الاصدقاء ، ياما طردنا بنص الليل من البيت ، بس هاي المرة وين انروح اذا طردنا ، الطرق مقطوعة ومنع التجول ، "والله مع الاسف احنا ولد العراق ممنوع نمشي بالشوارع والامريكان رايحين جايين بشوارعنا" وفوك هذا القهر الاخوان شرطة هذا الوكت خطية مشايفين سكران بحياتهم ، كلهم من الحوزة الشريفة للشارع ، واذا لزموا سكران ، راسا يكولون عليه وهابي سلفي تكفيري صدامي ، بينما في الواقع ان اخوانكم من عشاق العرق الاصلي هم ابعد الناس عن كل هذه الصفات ، بل هم اطيب الناس واتحداكم اذا شفتوا عركجي فجر نفسه او اشتغل بالميلشيا او كال اني سني او شيعي ،ـ
رحم الله بارات ايام زمان، كانت فعلا خيمة للوحدة الوطنية وكنا فيها احبابا لم نكن نسمع بالفيدرالية ولا المصالحة الوطنية ولسنا محتاجين الى وثيقة مكة ، وكان دم العراقي وماله وعرضه حرام ولكن للاسف الشديد وصلنا الى اليوم الذي اصبح فيه وطننا و دمنا ومالنا وعرضنا حلال ، ولا ادري لماذا حللوا كل هذه الاشياء وبقي العرق والبيرة والجن والمزة حرام.. ـ

الأحد، 22 أكتوبر، 2006

اخرب واتكهرب بعيونة...ـ

.
شكرا للدكتور والاخ الكبير حقا عماد خدوري مرتين ..اولاً لانه انشأ هذه المدونة وتابعها بصبر .. وثانيا لانه تحمل ايميلاتي الجاهلة بكيفية الدخول والكتابة في المدونة، فارسل لي رسائل توضيحية بالتفصيل الممل ...انه حقاً تواضع العلماء.. وعلى الرغم من اختلافات كبيرة في وجهات النظر بين ما أكتب ، وبين ما ينشر الدكتور في مدونته ، لكنه لم يتأخر في نشر آرائي حتى تلك التي تتقاطع بالكامل مع آرائه ..ـ
.
إسمحوا لي ان اشكره من اعماقي ، وانشاء الله اكدر اشيل نفسي وادخل للبلوغ لوحدي واكتب على راحتي.. لان بصراحة يا اخوان تعبت من المقالات ، فقلت يجب ان اتحول الى اسلوب اخر هو اسلوب التواصل اليومي، لان المقالة كمت اشوفها هواية رسمية وجنها لابسة قاط ورباط .. اريد اصير شوية سبورت واخذ راحتي بدون جديات ، وانت تعرفون اني بديت وياكم خوش ولد، ومخلصها ضحك ونكات وقصص عن خنجر وصبيحة وسوادي وباقي ال رحيمة الكرام، ولكن الاوضاع التي تدهورت بشكل عنيف سرقت مني الضحكة ، وسرقت الكثير من روح الدعابة ، وحتى نوبات من اريد اكتب فد شي ساخر، اكول عيب يا شلش ، لا الناس تكول هذا سفيه ، الدنيا بيا حال وهو كاعد ينكّت ، وهكذا يوم بعد يوم شفت نفسي شخص ماخذها جديات. وبعد شوية راح اصير جني مهدي الحافظ ، ميضحك لو يجي مدري منو . ولكن الواقع يا اخوان ان الحياة وخاصة للشعوب الحية (وانا مؤمن بحيوية العراقيين حتى هذه اللحظة) تستمر في اعادة انتاج نفسها، سواء بالبكاء والضحك واللطم والغناء والرقص والفن وحتى هامش الجريمة هو امر مفهوم في المجتمعات ـ (للاسف الجريمة عندنا لم تعد هامشا) ، فقلت ياشلش ارجوك اذا تريد تضحك ، اضحك ، واذا تريد تبجي ابجي، واذا تريد تخربط خربط ، يعني عيش كما انت وبالانكليزي بي يور سيلف ، لتخلي الامل يجف ، ولتخلي اعداء الضحكة يفرحون.. وشكد افرح من نوبات اشوف عرس بالكرادة ، واشوف شباب مطلعين راسهم من السيارات ويصيحون ويركصون واشوف بملامحهم نوع من الانتقام من الظروف التعيسة الي احنا بيها.. وافرح اكثر من يجيني سالم صديقي ويكلي اليوم متواعد وية صاحبتي، وافرح اكثر من اشوف حمودي كاعد بمقهى الانترنت ويدور مواقع مخلة بالاخلاق ، رغم اللافتة فوك راسه تكول ممنوع المواقع غير الاخلاقية.. افرح مو لان اني أييد حمودي بهاي الاشياء ، افرح لان الحياة مستمرة وبيها كل هذا التنوع ...ـ
.
رمضان راح يخلص واني صمت رمضان كاملا ، واكتشفت نفسي اني الوحيد من كل جماعتي صايم ، واقسم لكم انه من شارعنا كله، يمكن لو اربعة لو خمسة صايمين ، وحتى اللطامة ابناء المليشيات وحملة لواء حماية المذهب ، طلعوا صايمين بالجذب، يعني صوم نص ردن ، المهم اني مو رب العالمين ، يوم القيامة كلهم راح يتعلكون من كراعينهم..ـ
.
لو عكب باجر لو الثلاثاء راح يكمل العيد ، لان باجر نص عيد ، وراح اعايد كل الناس القريبين مني اهلي وجيراني واقاربي ، واصالح صديقي رضا لان زعلان علي ، وما ادري راح اعلكها لو لا ... يعني ألـط فـد ربعية ونص عرك لو لا ، ها خنجر شتكول؟!، لحد الان اني ما مقرر، بس من يلتمون الشباب هي تنلاص من كيفها .. الشباب لو تحطهم بجهنم هم يشربون ويغنون ويركصون ، واعتقد ان ما نحتاجه فعلا في هذا الوضع هو الغناء والطرب وشيء من الرومانسيات التي افتقدناها ، لان شوية شوية راح نتحول الى شعب من المخابيل ، والموسيقى وحدها كفيلة باعادة الحياة الى نقائها ...ـ
.
إخواني أخواتي القراء، بمناسبة العيد السعيد افتحوا المسجلات وعلى اعلى صوت ، واحتفلوا وافرحوا حتى لو بالجذب، ترى أعداء كم مهمتهم الاولى سرقة الفرح.. واذا طار الفرح شيبقى من الوطن غير يصير مقبرة .. لا .. منخلي العراق ابو الكعدة الحلوة ابو الامسيات الساحرة يصير مجلس عزاء كبير ، احنا شعب حي ولازم نستمر... ـ
.
لحد يكول شلش بطران قبل ميسمع يمة لدغتني العقربة لحسام الرسام والتي يختمهها بالمقولة الخالدة : اخرب واتكهرب بعيونه

أحسن هدية للعيد

.
الأخوات والإخوة
ترى شلش كام ينشر كتاباته بنفسه على هذا الموقع، وأول ما نشره هنا "اخاف احجي وعلي الناس ....ـ" أدناه وبتوقيعه
وحدك بالساحة شلش، شد حيلك وروح بفالك
أخوك
عماد خدوري

السبت، 21 أكتوبر، 2006

اخاف احجي وعلي الناس ....ـ

.
طبعا احنا مثل الغركان ويجلـّب بكشاية ..اكيد سامعين هذا المثل ، مرة يكولون الخطة الامنية ونصدك بكل مراحلها ، ونكول يالله على امل شوية نرتاح، ومرة يكولون راح نحل الميليشيات ورأسا نهلهل ونكول يالله سواها المالكي ، وبعدين الشباب قبل اسبوعين وقعوا وثيقة تحرم الدم العراقي، لان قبل جان دم العراقي بالنسبة الهم حلال شرعا وقانونا ، شنو قحط هو خلك عراقي ، واخيرا كالوا مؤتمر مكة المكرمة، رفعنا ايدنا للسما وكلنا يارب العالمين بحق بيتك العتيق اجمع قلوبهم لكي تحفظ دماء الناس الابرياء ...ـ
.
الاخوان وقعوا وثيقة جديدة وكالوا بيه دم العراقي حرام، ولافرق بين الشيعة والسنة ، لان كلهم مسلمين ، على اساس الاخوان اكتشفوا الخريطة الوراثية ، المهم اني كاعد انتظر شراح يصير، وبطبيعتي متفائل مثل مايعرف اصدقائي..ـ
.
بس هاي المرة عندي جم سؤال محيرني .. اذا مؤتمر يعقد في اقدس مكان بالعالم، و من اجل انبل مهمة في العالم ،هي صيانة دم الابرياء ، فاذا بهذا المؤتمر ميحضرالسيد السيستاني ، لعد شنو اهم من هاي المهمة الكبيرة حتى يحضر السيد ..ـ
.
موراح قبل سنتين من علكت بالنجف والرمي صار يم باب بيته الى لندن لغرض العلاج ، شكو بيها اذا راح للكعبة هم للعمرة وهم يحفظ دم العراقيين ...شيصير لو توكل على الله وكال خلي احل هاي المشكلة .. يعني منستاهل روحة لمكة .. والله ما ادري صدك اني دايخ ... ـ
.
ثانيا السيد مقتدى الصدر العام جان رايح لايران وبعدين لسوريا وبعدين للبنان وبلبنان صرح وكال اني موجود حتى اتقدم بمبادرة من اجل لملمة الشمل اللبناني، ومن صار الحادث الاجرامي على المراقد المقدسة رجع مثل الطلقة .. ليش لمكة ميروح وجيش المهدي طرف حقيقي وفاعل في الصراع الدموي وباعترافه الاخير؟ ...ما ادري شوكت يصير للدم العراقي اهمية ويصير السادة جادين بايقاف النزيف واطفاء الفتنة ..ـ
.
وعندي لسؤال لحارث الضاري ، اخوية اذا انت رايح توقع صلح الطارمية ، لعد شكو تسب بالناس وتشتم ، انت رايح تتصالح لو تتناطح لو رايح من ورا خشمك ؟... ـ.
واخيرا اريد اسال سؤال بسيط عن وثيقة مكة شنو الجديد بيها على العراقيين .. احنا مو اخوة وابناء وطن واحد ودمنا حرام ومساجدنا وحسيناتنا مقدسة ومحترمة . وهاي الوثيقة الكريمة لو واحد كاتبها قبل اربع سنين مو جان ضحكنه عليه ..وكلنا هذا مخبل .. بس منو وصلنا لهاي الحال وسوانا مضحكة للدول غير نفس الذين وقعوا الوثيقة وباركوها وايدوها.. فالحل يا اخوان كما يقول العاقل والمجنون هو ابتعاد اطراف الوثيقة عن الواجهة السياسية، ويكعدون بصومعاتهم معززين مكرمين ويتركون البلد للمختصين والخبراء ، ترى والله محد وصلنا لهاي النتيجة غيركم ، ومحد سوانا فرجة غيركم ، ومحد راح يشعلها اكثر غيركم ،، جربناكم اربع سنوات، حركتوا العراق وخليتوا الاخ يقتل اخوه ، وحسرة على ابن الثورة يروح للفضل، وحسرة على ابن الطوبجي يطب بحي القاهرة ، وبدل بغداد وحدة صار عدنا عشرين بغداد .. ـ

.
اخوان سامحوني ، مادري العيد شوكت باجر لو عكب باجر لو اسبوع الجاي حتى اهنيكم لان جماعة الوثيقة ، كل واحد يعيـّد بصفحة ،،،ـ
.
على كل حال عيدكم مبارك والك الله ياعراق ...ـ

الجمعة، 13 أكتوبر، 2006

واخيرا ياسيد مقتدى ...!!!ـ

كتبت وكتب العشرات من قبلي ومن بعدي ،وصحت وصاح الالاف من قبلي ومن بعدي ،ان جيش المهدي ليس الجيش العقائدي الذي قاوم المحتل وطرح مشروع الوحدة الوطنية ونأى بنفسه عن المذهبية التزاما بوصايا المصلح الكبير والعراقي الاصيل السيد محمد صادق الصدر . وانما هذا الجيش الذي نراه ونسمع عنه، انما هو عبارة عن عصابات من القتلة واللصوص وخريجي السجون . ومرة سألت السيد مقتدى في احدى مقالاتي، هل انت مع هؤلاء ياسيد مقتدى ؟ وجاءني الجواب عشرات ايميلات التهديد والوعيد من اتباع السيد كما يقولون ..واليوم وبعد نهر الدماء يثق السيد بان كلامنا كان صحيحا، فتبرأ من القتلة في جيش المهدي وهددهم بنشر اسمائهم ، ودعاهم الى التوبة قائلا ادعوا المسيئين الى التوبة . اي توبة ياسيد ، وقد ترملت الالاف من نسائنا وتيتم الالاف من اطفالنا ..لا ليس التوبة هي ما تستحقه هذه الوحوش البرية، وانما القصاص هو مايستحقون ونريده على يد جيش المهدي العقائدي كما سميته لكي يبعدوا التهمة عنهم ويثأروا لكرامتهم وسمعتهم التي اقترنت بالموتوالرعب . نريد ان يقتص الشرفاء من ابناء التيار الصدري من القتلة واللصوص ،وان تنشر اسمائهم فورا ، لكي تحاسبهم الناس دون خوف من سطوة التيار ،اليوم وبعد اعترافكم الذي تناقلته وكالات الانباء بجرائمهم نريد دماء ابنائنا منكم لانهم تصرفوا باسمكم واستغلوا شعاراتكم وتحركوا تحت عبائتكم .. اليوم نريد وقفة تجعلنا في صفكم وتعيد ثقتنا بكم وبهذا التيار الوطني الذي يرفض التقسيم والخطط الخبيثة التي جاء بها الغرباء عن بلدنا نريد منكم ان تصطفوا مع شعبكم لكي نصطف معكم ,نريد ان تثقوا بما نكتب لكي نثق بما تفعلون ، صحيح اننا احيانا نشتم وننفعل ، لاننا نموت ياسيد مقتدى ، لاننا نصبح على جثث اهلنا ونعرف قتلتهم الذين يقتلوننا باسمكم ...ـ
براءتكم من القتلة وتهديدهم هي خطوة كبيرة في اتجاه حقن الدماء، ولكننا ننتظر الخطوة التالية ..نريد تطهير التيار من القتلة والذئاب الوحشية بايدكم..وقبل ان تقتص من هؤلاء ، نرجوا ان تقتص من اولئك المقربين منكم الذين يقلبون الحقائق امامكم ،المقربين الانتهازيين الاميين المنتفعين الذي افشوا الرشوة والسرقة والخاوة باسمكم..وباسم الامام المهدي وباقي ائمة الهدى ..هل ستعبر نهر الدم الذي لم يعد ضيقا ؟ اعبره ياسيد مقتدى وخلصنا من قتلة الزمن الاسود ، خلصنا من الميليشيات خلصنا من الخوف والرعب لقد جفت انسانيتنا وفقدنا معنى ان نكون..ـ
شلش العراقي
.
حبيبي ... هذا مو ذوقي .. زين؟؟

الأربعاء، 11 أكتوبر، 2006

شتكولون لو نعتبر هاي الكلمات مقالة؟

.
اولاً اشكركم واني خجلان منكم
وثانياً والله ما اعرف اكتب مو من كل كلبي والكتابة والله فد شي صعب علي على الاقل لان اني مو كاتب اساسا..ـ
وبعدين اشو كاعد أكتب والامور تتدهور وذولة لا يخجلون ولا يستحون كانما احنا نكتب للقيادة الطاجيكستانية مو لحكام بغداد
بس مع ذلك خلال يومين انشاء الله ارجع اكتب
والاخ الذي يقول اموري عدلة اقول له وداعتك وانت عراقي وغالي ما كو عراقي امورة عدلة لان اغلى شي كاعد يروح من عدنا ..ـ
اموري عدلة لان عندي جكاير واكدر اشرب جاي واشوف تلفزيون
شو هاي صارت مقالة شطولها ويكول ما اكدر اكتب ..ـ
نصاب شلش متصير له جارة..ـ
والله اموت عليكم واموت من الخجل اذا اشعر واحد كاعد يشعر اني اتعيقل او شي من هذا القبيل ..ـ
اسمحولي ان اشكر الاخ الكبير العالم العراقي الذي يعطيني من وقته الكثير وينشر مقالاتي ..ويتابعها ..ـ
اخيرا اريد اكلكم خبر مهم ترى شلش صايم ـ
.. والمشكلة الوحيد اني صايم من الشلة، واحد مفطر ويحش بالجكاير كدامي والثاني صايم ويدخن يكول السيستاني حلل الجكاير والثالث يكول حرام الصوم والعراق محتل وهكذا .. بس شلش مقاوم بس ذاك اليوم طكت روحي دخنت جكارة وحدة ..ـ
الله يتقبل صيامنا وصيامكم وينتقم من اعدائنا واعدائكم المعممين منهم وغير المعممين ـ
.. اشو الكعدة وياكم حلوة وما اريدها تخلص ..ـ
خنجر شنو قصتك انت كاعدلي سجينة خاصرة مورحت لسوريا شتريد بعد مني خليتني بوجه المدفع وفلتت ..ـ
شتكولون لو نعتبر هاي الكلمات مقالة؟
مو احسن ؟
قبلاتي الاخوية وشوقي لكم
اخوكم شلش العراقي

الاثنين، 9 أكتوبر، 2006

رمضان كريم يا اخوان

.
رمضان كريم يا اخوان
وداعتكم مشغول وما اكدر احك راسي
ارجو ان تعذروني والغايب حجته ويا
هوآاني ما اتاخر لو ما مشغول
اخوكم
شلش

الاثنين، 2 أكتوبر، 2006

انطلاق موقع الحملة الشعبية " انا عراقي "ـ

.
موقع الحملة الشعبية " انا عراقي "ـ
.

This page is powered by Blogger. Isn't yours?