الاثنين، 15 يناير 2007

رسالة الى شلش العراقي

.
الله يساعدك شلش، شلونك ؟ ان شاء الله زين، ماعندك الا كل خير ان شاء الله . ـ
دزيتلك قبل هسه تعليق على شعر جيجان الـّي نزل بمدونتك، ما أعرف وصلك قريته لو لا ؟
بس راح اعيد الحجي من البداية، انا كنت ما اعرفك من كنت عايش بالعراق، ما عرفتك الا شهر ايلول الماضي، عرفتني عليك "فرشته"، انت ما تعرف فرشته بس هي تعرفك وتتابع كل مقالاتك، احنا صح عايشين بلندن بس كلوبنا بالعراق، هي صارلها هنا اكثر من 12 سنة بس عراقية اكثر من جمعيتنا الوطنية بهواي.ـ
أول مقال قريته الك كان عن لص الجادرية وابنه كتكوت الحوزة، من يومها وانا مدمن قرأة ما تكتب .ـ
طالت غيبتك ما نويت ترجع ؟
بقى بالنا يمـّك، فرشته تكول : أخاف راح بتفجيرات السوق الاخيرة بالثورة ؟ يعني هي التفجيرات ما لكت غيرك حتا تاخذه ؟
ساعة أكول اخاف السيد هد عليه المزعطة مالته، كلهم هاذا حرام، يعني قابل انت أعز من الطوبة، اذا هي الطوبة صارت حرام .ـ
وساعة اكول تولوه الارهابيين، كالوا هذا بدعة وكل بدعة ضلالة و علسوه للرجال، ونبقى احنا بالظيم .ـ
مرات اكول اخاف الحكومة سوتها وكطعته عنا، يعني ما كافي الماي و الكهرباء و الامان و الوقود وهواي شغلات ما أتذكرها، انوب هم انت يكطعوك بعد، بس يسويها البخت، الحكومة تريد مصلحة الناس فتسوي كل شي .ـ
ساعة اكول راح للزيارة، هي الزيارات ما تخلص، بس كل الي راحوا يرجعون، بس انت ماكو، ومره اكول هاجر، اي وين رحت ؟
يعني معقولة نسيت؟
حتى الي ينسى يذكروه،ـ
معقوله يأست ! انت كنت نتطي للناس امل ! ـ
شلش ؛ مو لخاطري بس لخاطر هالعراقيين الفقرة، قبل شويه كنت اقرا مقالاتك عن الحل المستحيل والمصالحة الوطنية، وصفك دقيق لصورة الناس، كنت اشوف الالم و التعب بعيونهم، لخاطرهم ارجع، والله الناس محتاجيك .ـ
لخاطر كل الي انكتلوا و عافوا ايتام، ماتكسر الخاطر دمعة ايتامك ؟
يعني هو بخت العراقيين ينحرمون من كلشي، على كولة الملا عبود :ـ
الدادة أم البخت خلخالها يدوي ويدش …ـ
وانا استادي لو زعل يمعش شعر راسي معش ….ـ
هم هاي دنيا وتنكضي وحساب اكو تاليها ؟
مو حقه ملا عبود، اي لخاطر ملا عبود والله عيب تفشله والرجال جايك ويدك بابك، زين لخاطر فرشته، والله تحبك تموت عليك، لحد هسه اذكر رادت تموت من الضحك من انت كتله لأبو اسراء : خو ما جدك نابليون، لخاطيرها فرحها وارجعلنا.ـ
يابا اذا تريدها فضل، ارجع وفضلك مغطينا، تريد نتوسل ؟ هذا انا اتوسل بيك، أحسبها كداوة، انا راضيها لنفسي، خلي العالم تكول علي مجدي والله انا ما اعرف أكتب مثلك وحتى لو أعرف، الناس تريد شلش العراقي مو A&Eiraqiالله عليك اكو واحد يقرا لواحد كل كتاباته كأيبه، بس شسوي غير افرغ الظيم،ـ
شلش عاد فضها وارجع تره نشف ريكي .ـ
انا الي علي كلت كل الي اقدر عليه وبعد تبقى انت وضميرك، بس يرضى ضميرك، عبد العزيز وعصابة العباءة السوداء من صفحة و جماعة الدليمي من صفحة وسروال الكاكا مسعود من كتر وغير ظيم الضاري وربعه ومقتدى والمزعطة مالته،ـ
هذولي كلهم يتولون الناس وانت ما ترد عليهم .ـ
بعد بكيفك، الي يناسبك سويه، بس احنا منتظريك
دمت سالماً يا شلش العراقي
اخوك المحب
A&EiraqiLondon 14.01. 1007

Comments:
صدك وينك شلش معقوله كل هل الاحداث ومأثارت بيك روح الكتابة!
 
please ... please Shalash come back to us
 
و اني هم .. اسف اقصد اول السلام عليكم .. بس دخلت مستعجل ردت اكوول و اني هم احد مدمنين كتابات شلش العراقي الله ايحفظه للعراق.. بس مع الاسف انقطعت فتره عن قرائت مقالاته الرائعه و توني سويت سيرش بالكوكل و لكيت الموقوع ماله - الي اتمناله الازدهار اكيد - و لكيت احد الاخوه كاتب رساله الى شلش ف حبيت اضيف تعليق.. المهم شلش لو اترشح نفسك لرئاسة الجمهوريه والله اله انتخبك حته لو جنت يهودي .. لان اهم شي انته مو طائفي مثل الموجوودين بالمنااسبه بيني و بينك انته سني لو شيعي ؟ .. اتشاقه تره.. و انشالله ترجعلنه اخووونه العزيز شلش و نرجع نقره كتاابااتك الرائعه و ندمن عليها .. لا مدمنين جكاير و لا شرب . ندمن بس على مقالاتك

اخووك دوما..
احمد
 
اي والله شلش وينك...... ترة الشي الوحيد اللي رابطني بالعراق و امخلي عندي امل هو انت.. فلاتغيب الله يخليك
 
والله حجيك صدك... اني كل يوم اجيك الموقع .. اكول بلكت الله يرجع شلش يكتب من جديد .. ويرجعلنا شوية امل ... بس اضاهر هو هم مل .. بعد الحجي ميفيد .. بس احد انا مضل عدنا شي غير الحجي وكاعدين نعد ايام شوكت الله ياخذ امانته ونرتاح ... لك عيني شلش اذا بعدك عايش .. فلا تبخل علينه .. بس اذاذ الله اخذ امانته مثل الناس الي نعرفهم ويوم على يوم ديروحن .. فما النا غير الله
 
كلي على اي اساس تنشر التعليق لو تشيله .. البارحه كتبت تعليق ..اشو لحد الان ماهوه
؟؟؟؟؟!!!!!!
 
Hi,

I am writing to you because I am working on the Iraq issue of the magazine I work for, which will be written entirely by Iraqis and published in 10 countries/languages. We have a print distribution of 1,000,000...

I would really like it if you would contribute a story. Please contact me.

Amie@vbs.tv
 
إرسال تعليق



<< Home

This page is powered by Blogger. Isn't yours?