الجمعة، 19 يناير، 2007

تدور الدوائر

الاخ الفاضل الدكتور خدوري، هذه رسالتي الثانية الى شلش العراقي ارسلها من خلالك. لن اطلب منك هذه المرة نشرها،لأن انت ما قصرت وراح تكول علي طمّاع، كل الي اتمناه ان تصل الى شلش وان يكون هو بخير و صحة ويعود للكتابة بأسرع وقت دمت سالماً ـ
A&Eiraqi
.....
الله يساعدك شلش، شلونك ؟
ان شاء الله زين
يعني هم بعدك مختفي، احنا هم بعدنا منتظريك، بس صدك طولتها للغيبة، انا شخصياً بدت تساورني الظنون شلش؛ خاف ناوي تصير مثل ابو فلان وبعد ما تطلع للتالي، عرفته لأبو فلان؟ هذا الكاعد بغرفته وما يقبل يطلع، كل ما يحجي ويا أحد يكلك الحل والربط يم ابو فلان، هو الوحيد الي بفضله ماكو حرب اهليه، هو الوحيد الي الكل تسمع حجايته، هو ما يقبل يدخل نفسه بالسياسة بس يدعم العملية السياسية، هاي شبيك ماعرفته ؟
هذا الي يومية الساسة الابطال مالتنا (خصوصاً قائمة الأئتلاف ) ملتمين يمه، على اساس يمه الحل والربط، وتاليها ...تيتي ...تيتي
انا دائماً اكول لو يطلع خطية يتمشى شويه، الشمس مفيدة، بيها فيتامين (د)، كلش مفيد للعظام،, بس هو كاعد، حتى ماسمعت فد يوم راح لمكة يحج، ولا سمعت رايح للزيارة، ما أعرف شعنده بالغرفة،ـ
عالعموم ؛ انا كل خوفي لا تصير انت يا شلش مثله و بعد طبيت وما تطلع للتالي، ونظل نتوسل، وماكو ...ـ
ويدور الزمن ويدور....وتدور الدوائر وتدور
اذ بان مجيء القوات الصينية لتحرير الشعب العراقي من الأضطهاد والدكتاتورية، واعادة مانهبهه القادة الى الشعب وتوفير الحياة الحرة الكريمة للعراقيين و رفع الجور و الظلم عن الناس،ـ
هذا الحجي بعد فد شكم عقد من الدمار والخراب وضياع الأول والتالي، و سيكون غالبية العراقيين ملتفين حول مرجعهم الاعلى اية الله العظمى ( شلش العراقي )، مؤكدين على انه الوحيد القادر على لم الشمل وتوحيد الصفوف ومنع الاقتتال فيما بينهم، وعندما تسأل اي واحد عن اية الله العظمى شلش (خصوصاً اتباعه ومناصريه) والذين يتمركزون في مدينة شلش المدورة ( الثورة – صدام الصدر) سابقاً، فسيؤكد انه المرجع الاعلى وان فضله واضح في وقف سفك الدماء وان الجميع يمتثل لأمره، وسيزيد البعض ويغالي، قائلاً :ان شلش انهى كليات الطب والهندسة والعلوم وحصل على ماجستير في الليزر ودكتوراه في الالكترونيات ومبرمج اربع انظمة لمايكروسوفت وعنده نظريات تدحض اراء اينشتاين و نيوتن ( هاي انا سامعها عن هواي من مراجعنا العظام) هذا بالأضافة الى رسائله الاجتهادية وفقهه العالي. وسيغالي البعض اكثر قائلاً ان الامام يجتمع بالأمام المهدي (عج ) ويستلم منه الارشادات.ـ
.وشلش , لا يخرج من غرفته ابداً.ـ
ويؤكد الساسة العراقيين من امثال عمك شناوة ( زعيم اكبر كتلة في البرلمان ) أنه انما يسير بهدي المرجعية الشلشية، وأنه من الابطال الذين طالما ذادوا عن حياض الامام شلش، أو دافع عن الامام وتحمّل في سبيل ذلك الاضطهاد والجور، مضيفاً ان الأمام فوّضه لبناء العراق وكتابة دستوره الجديد،ـ
سيكون هنالك الكثير من الانتقادات لشناوة شخصياً و الذي سيتهم بقيادة فرق الموت وشراء اراضي واسعة وبيوت واحتلال كامل لمنطقة الكرادة والبتاويين.ـ
بالتأكيد سيكون هنالك اعداء ومناوئين ومسيئين , فمثلاً محمد باقر عمارعبد العزيز الحكيم، سيؤكد، من ايران، ان الحكومة الجديدة قامت بقتل ابوه وجده الابطال بأبشع اسلوب،ـ
فبعد ما انحصر ابوه على جسر الطابقين، الذي اكد انه ومعظم منطقة الجادرية من املاكهم التي نهبت، قام اتباع المرجع شلش بتوجيه النعل والشحاطات وكل انواع الاسلحة الخفيفة التي ترمى باليد بأتجاه ابوه وهادي العامري والاشاوس من فيلق بدر حتى انتهى بهم المر في نهر دجلة غرقاً.ـ
ويستمر الحكيم الصغير فائلاً ان جده أُعدم بأبشع اسلوب مع جلال الدين الحقير، وان المنفذين رددوا هتافات مسيئة صائحين (شلش، شلش، شلش )،ـ
ويؤكد الحكيم ان لعائلته افضال على العراق لا تعد ولا تحصى، فالعراقيين كانوا حفاة لا بل عراة ولفهم جده بعبائته.ـ
سيصرح حارث مثنى حارث الضاري ان اتباع شلش ليسوا الاغلبية وانما هم يتعاونون مع المحتل الصيني الغاشم لفرض هيمنتهم على العراق وانه يدعم المقاومة الوطنية، ومن جوا العباية يدعم الأجرام بشتى انواعه. ورغم تأكيدات المرجع شلش المستمرة بأنه لا يتدخل في العملية السياسية، الا ان شناوة بادر الى وضع صورة المرجع على دعايات قائمته الانتخابية مؤكداً ان من نقل هذا الكلام غالط فيه كثيراً،ـ
وسيستفيد شناوة من تهجم عباس البياتي على الامام شلش، سيكون هذا قبل الانتخابات مباشرة وعلى قناة الجزيرة، اذ سيقول البياتي ان شلش ليس الا ابو عرك وكاوليات وانه كان يتمنى يصير شلش ابن مادونا.ـ
ستثير هذه التصريحات سخط الشارع العراقي وسيخرج العراقيين (رغم حضر التجوال المفروض من قبل وزيري الدفاع والداخلية : كريم ساطور وحمودي قامة ) معلنين ولائهم للأمام شلش هاتفين: كل الشعب وياك ياسيد شلش ،،،تاج تاج على الراس سيد شلش يحلاي، حي على خير العمل، سيد شلش هو الامل وغيرها من الهتافات، وسيظهر شناوة متباكياً مؤكداً للشعب بأن هدفه بالحياة هو الدفاع عنهم وعن المرجع العظيم، وانه لن يسكت حتى يسترد الحقوق.ـ
وسيحقق شناوة مراده ويحصل على اصوات كثيرة يفوز من خلالها بغالبية المقاعد في البرلمان و سيكلف خنجر بتشكيل الحكومة التي ستقود البلاد الى الرفاه والأزدهار، وشلش في غرفته لا يغادرها ابداً.ـ
ستكون صبيحة قائدة للتنظيمات النسوية وسيستحوذ آل رحيمة على كثير من المناصب الحساسة في الدولة،ـ
وسأقوم انا بأنتقاد الوضع و وصف معاناة ابناء الشعب، ولن اتوانى في توجيه النقد اللاذع وفضح جرائم شناوة وخنجر وصبيحة والسخرية منهم، وبعد حين سأصاب بالملل والاعياء خصوصاً ان الوضع لن يتحسن، والمدن تعاني والناس من سيء الى اسوأ،ـ
سأتعب واعتكف في غرفتي، لن اخرج منها ابداً ويدور الزمن وتدور الدوائر وتدور وتستعد "فرشته " لتولي المناصب القيادية واعادة اعمار العراق.ـ
ملاحظة : اخي العزيز شلش، لم أقصد اي اسأة في هذه الرسالة وانما قصدت تحفيزك للعودة، والتنويه عن ان الناس يقدسون اشخاصاً رغم انهم لا يعرفون عنهم شيئاً، كل ما كتب مأخوذ من مقالاتك السابقة،ـ
كل ما اتمناه ان تكون بخير وصحة وتعود بأسرع وقت

Comments:
يا اخي فك ياخه انته شكد لزكه... شلونك شلش و اخبارك شلش.. شنو كرايبه رابين سويه .. انت اصلا ماتعرفه ولاشايفه. بيك خير اكتب مقالات وانشرهه باسمك و لا تثولنه كل شويه.
 
طيح الله حظكم على هاية الرسائل السخيفة شوهتو الموقع
 
Dr Imad ,
I hope I am Wrong but I think Shalash is Killed by abu dira'a or Al-Mahdi gang,we need to encourge someone else to write in your patriotic site I suggest A&Iraqi is a good candidate
 
عمي أخاف أخونا شلش لزموه فرق الموت .. وبس الله يدري وين
لكن أخر مره كال أشتريت سياره جديد .. أكيد كاعد يفتر بالدرابين .. ووشر عنده البانزين ..والبقيه الله يعلم أشصار.. بيه .. يالله عسى أن لاتطول الغيبه
 
اخي العزيز الدكتور عماد خدوري:
السلام عليكم..... انت سبب انقطاع شلش عن الكتابه و انت تعرف ليش! و انت لازم ترجعه يكتب.
اخي العزيز: الي ياكل العصي مو مثل الي يعدهه و كل واحد يعتز برأيه و خلي يعبر عن رايه بالموقع الخاص به و لا يستغل مكان الأخرين و الخلاف لا يفسد للود قضيه.
 


بابا نؤيل في بغداد
مِثل ماتعرفون إنه (بابا نؤيل) رجّال حبّاب، ينطي هدايا للجَهال وللفقراء.. المهم فد يوم (حجي نؤيل) ديباوع بخريطة العالم چان يشوف العراق.. گال: إييييي.. هذولة خطيـّة خلي أساعدهم.. المهم.. نِگر سِلْف للعربانة مالته وچان إطِّيِر الغِزلان مال (بابا نؤيل) وإجه بيها للعراق وبغداد خصوصاً.. بقى تقريبا ثلاث ساعات يدوّر على بيت بي شجرة مال إكرسمس (بس طبيعية مو إصطناعية) وماكو.. هناك چان يخيّطها بِبريك قوي، حتى الغراض يلي بالعربانة وگعنْ واطّشرنْ... وگام يصيح: لگيت بيت...لگيــــــــــــت
نِزل بالسطح وبُقه يدوّر على فتحة مال مدخنة يفوت منها!!.. ماكو.. راد باب مفتوحة!!.. ماكو.. راد شباچ يكسره ويفوت منة؟؟.. مالگة.. لأن كلهة بيهة كتايب.
المهم.. فات من الفتحة مال المبردة وحطْ الهدايا يم الشجرة وطِلع.. أول ما طِلع چان يسمع صوت واحد يصيّح (حرامي!!!).. وعينكم ما إتشوف الاّ النور.. إشتغلتْ الطلقاتْ والبيكيسياتْ وحتى قاذفات وهاونات..كلها على هالرجّال المسكين.. وهوّه ظل يركض مِن بيت لبيت، ومِن سطح لسطح، ما يعرف شنو الفلم.. عباله صارت حرب.
والتمّت المونيكات والهمرات والحرس الوطني والشرطة... واحد يگول شفتة لابس حزام ناسف!!.. واحد يگول العربانة مالته مفخخة.
هناك چان يچيّت عليه واحد، وكُمشه.. وسحله من لحيتة للمركز طبعا بعد ما شبع كتل بالطريق.. وبالتحقيق محد صدّگه وكل ميفك حلگه..يجي راجدي.. وبعدين زينوه صفر وأخذو موبايلة وچانت بجيبة أربع أوراق ونص هم أخذوهِن.. تالـــــي طلع بالگوّة، گالو: رجّال چبير.
رجع (بابا نويل) للبيت يلي نِزل بالسطح مالتة لگة العربانة ماكو.. سِئل جاهل گله: شصار من العربانة؟؟... گله الجاهل: الغراض إلي بيهة إتحوسمتْ كلها، سأله (بابا نؤيل): زين الغزلان وكّلتوهن؟؟، گلّة يا غزلان عمي؟؟ هنّة چم حمار وعربانة مكسرة إجو أخذوهن الدوّارة أهل الطحين وراحوا.
ويدكهة الرجّال مشي من بغداد لبيتهم حتى فلوس كيا بجيبه ماكو وگال وية روحه: آني أجي لبغداد بعد!!!!!
المهم وهو بطريق الرجعة وما يعرف شيسوي طگت يمة مفخخة چان ينشمر ويوگع بالكاع، وإتبهذل... صفن وگال: وِلكَمْ شكو؟؟.. منو ماكِل باگلة زايد؟؟.. حقة ما يعرف شنو مفخخة.. وگوة فهموا شنو مفخخة.
كمّل مشي الرجّال وبالصدفة.. وهو بطريق الرجعة كمشُوه جماعة.. وأخذوه.. وهمْ عذبوه وگلوله: إنته منين؟؟ سني لو شيعي؟؟.. گاللهم يابا آني (بابا نؤيل).. كللوله: ناصب علينه!!!.. وجوي ديذبحوه، ويةَ مديذبحوه چان تجي الغزلان والعربانة... طلعوا فالتين من بغداد وبالكوة چلّب بيهن وفلت.. المهم هوة عبالة إرتاح وگال: الحمد الله جتّي على هيچ وبس.. بعده ما منَجِّم بالسِما، چان يجيه (سِترِلّه) من هذا الحنَيّن ويضرب العربانة وإشتغلت السبعة وخمسين علية ودوشكات... حرگوا الجو حرگ على الرجال المسكين.. المهم هوة مدري شلون إنشمر فوگ غزالة من غزلانه وچلّب بيها وفِلتْ وراح لبيتهم بالقُطب وقدّم استقالة من هاي الشغله.. وهسة هوة كلّش يكره الجهال وما يحب الهدايا وبس يباوع أفلام رعب واشترى مسدسات ورشاشات ويصيح....
ويــــن يـــروح المطلــوب إلنــــة

 
استاذنا العزيز شلش
احلفك بداعة الحجيه امي
اللي كل ما جنت تكتب مقاله جديده اطبعها وهيه تاخذهه وتروح توديهه للنسوان يقروها سوا ويه الجاي مثل الكعك
تدري من يوم اللي اختفيت و امي تسأل "يمه اشو متجيبلنه سوالف شلش"
احلفك بداعتها ترجع
بداعة العجايز و الشياب و الصبايا و الشباب
بداعة الطفله ام العشر سنين الي استشهدة قبل كم يوم بمنطقتنا
ارجع
 
ادري شلش شنو صرت رئيس وزراء و بعد ما عندك وكت تكتب؟
 
محد لاصها على شلش وخلا ايبطل كتابه غير التدخل السخيف مال خدوري اللي حط التعليق ماله بالاخير. مو من حقك يا اخي اتضيف تعليقك بهاي الطريقة مباشرة. يعني لان ساعدته وسويتله ويب سايت خاص بي كمت اتشوف لنفسك اكو حق اتغير بكتاباته يمكن وتحط التعليق اللي اتريده. لو اني ابمكان شلش ابدا ما اكتب هنا وادور على بديل مناسب
 
did shalash die??
 
إرسال تعليق



<< Home

This page is powered by Blogger. Isn't yours?