الجمعة، 24 أغسطس، 2007

حسجة

.
لكاتب مجهول الهوية
.
ـ" اويلي منكم يا عراقيين يا بطرانين يلي ما عاجبكم شي .... يا الله شلون شعب انتوا ما ترضون بالنعمة صدك عيونكم فارغة
بس تحجون عالحكومة ... ليش بيكم واحد يكول خلف الله عالمالكي ، رحم الله والديك يا جعفري .. ـ
نشكر جهودك الخيرة يا هاشمي - هذا ما قدمته لمن انتخبك
نشكر لجبهة التوافق ، كثرة شجبها وتنديدها المستمر .. ـ
نشكر لجبهة التوافق سرعة الاستجابة ، نشكر لها وفائها بالالتزامات و سرعة تنفيذها لتهديدات الانسحاب
شبيكم يا شعجب يا فايخ ( فايخ يتزوج ) .. ما يعجبكم العجب
هو مو صوجكم ، صوج الناس الي تحرضكم عالحكومة الوطنية الشريفة العفيفة البازة القديفة
كله صوج حسام الرسام الجذاب .. يكول لقد كان الرصيف كالمرايا وهسة الجثث كام يلمها كناس
شوفوا النفاق والكذب ، اصلا الجثث محد يلمها شنو هالجذب بعد
بعدين هية وين اكو جثث ، بس كم وحدة يادوب 50 جثة وكلهم صداميين بعثيين تكفيريين زرقاويين ارهابين
ورقصني يا كدع
ليش تحجون عالمالكي ... لان طلع بالتلفزيون بالاجتماع وية احمدي نجاد ومحاط وراه العلم العراقي
رئسا كلتوا هذا لوكي مال ايران ، ورايح يوم 8\8 ومتعمد مايحط العلم العراقي وراه .. ترة مو قصده اهانه العلم ولا الشعب ولا الجيش الي رفع هذا العلم عالفاو
لا .. بس هوة خطية نسة يجيب العلم وياه من يوم فوز المنتخب طلع بالشارع يهوس وانخبص لان مرته شافته ديذب رقم لبنية فارتبك خطية و نسى العلم بالسيارة
لا كلشي تسووه قصة عيب عليكم .. مو انتوا معتبرين نفسكم شعب الحضارات ، ـ
شوية استحوا وبطلوا كذب ... ـ
كل يوم تاهمين مغاوير الداخلية باعمال الخطف و التعذيب و القتل عالهوية
منين تجيبون هالحجي ؟؟؟ وين اكو هيجي شي اصلا
همة مجرد مجموعات مسلحة خارجة عن القانون ، يرتدون ملابس مغاوير الداخلية و يركبون سيارات مغاوير الداخلية و شيالين هويات مغاوير الداخلية ... بس همة مو مغاوير الداخلية
لان الهويات تتزور بمريدي ، والملابس تنباع بالعلاوي و السيارات مكومة عد سردار بس شوية صبغ حراري مرقط وتصير سيارات تخبل ، والبي كي سي الي تشوفوه عالسيارات ترة هم موجود بالسوك موفد علم يعني اي حداد يكدر يركبه عالبدي مال السيارات ... ـ
اتقوا الله بالحكومة ياعراقيين .. ـ
شنو يعني بانزين وكاز ماكو ؟؟ الا يعني ؟؟ الا ؟؟؟ ما تكولولي شلون جانوا اهلنا عايشين قبل
اشو لا كهرباء لا بانزين لا كاز لا ماي
كله يجيبون ماي من الشط و يبردوه بالتنكة الطين .. ـ
شبيكم يا عراقيين يا بطرانين ... بس تبجون بوجه الله
شنو يعني مستشفيات ماكو ؟؟؟ شنو يعني ادوية ماكو ؟؟؟
شنو نسيتوا الحلاقين ؟؟ مو جانوا قبل الحلاقين يداوون ويسوون عمليات ، ـ
من يصير عدكم حالة طارئة ، روحوا لاي حلاق هم يسوي العملية هم يزينكم و ياخذلكم سشوار وخيط
طبعا هسة هم تحجون تكولون هي وين اكو كهرباء حتى الحلاق يسشورنا
شعب ممل .. متطلب .. نحس الى ابعد الحدود
وتكيفون من تشوفون واحد يقلد عالحكومة
كيفتوا من طلعت الهوسة مال جيب الغاز جيبه
كيفتوا من طلعت الاغنية مال هج يالشعب .. شعجب .. شعجب
كمتوا تحسدون البزون .. لان تنام وسط الشارع
احد كايللكم لا تنامون وسط الشارع ، اصلا الحكومة دتسوي حضر التجول علمود يصير هدوء
و تكدرون تنامون بالشارع مثل البزازين .. بعد ليش تتبطرون عالنعمة
اني ما اعتب عالشعب البطران ، اعتب عالمواقع الطائفية المعادية للعملية السياسية
اعتب عالقنوات الفضائية المدسوسة .. سوسة .. سوسة .. سوسة
ـ ( هذا صدى الصوت مو عبالكم السي دي مشخوط ) ..ـ
فضائيات مدري منين جاية ، مدري منين يجيبون فلوس
شنو هالصرف ، شنو هالمذيعات
كلها من فلوس النظام البائد ... من تحرر العراق كلهم اخذوا فلوس الحكومة وطفروا برة سووا فضائيات
والشعب ما مصدك
عايف قنوات الحكومة الشريفة الغير مدسوسة والبعيدة كل البعد عن الطائفية و الدس المجوسي
وكاعد يتفرجلي هاي القنوات الصدامية البعثية الارهابية التكفيرية البيتنجانية والتبسية
احد المواقع الالكترونية ... نشر صور عن حي الجامعة
طبعا كل الصور جذب و تلفيق ، مسويها بالفوتوشوب ، اصلا مبينه
اي واحد هسة من حي الجامعة راح يعرف هاي الصور جذب بجذب
ابسط شي اكو صورة لفد رجال مكتول و امدد بالشارع ، احلف 100 يمين هسة اذا تروحون لنفس المكان ماتلكوه
.. وين راح قابل ؟؟ كام من الموت ورجع لبيتهم ؟؟
هذا دليل واضح وقطعي على انه هاي الصور كلها شغل فوتوشوب
وانتوا شعب تنطلي عليكم كل هاي الحيل والالاعيب .. ومستحيل يصير براسكم خير
مادام تضلون تحجون عالحكومة الموقرة
كله بسبب هالشعب المتذمر الي مو شكول خير دتصير هاي المشاكل السياسية
لان الاحزاب و البرلمانيين حبابين ورورد ابرياء
حتى اني دزيت رسالة شديدة اللهجة لنانسي عجرم .. رزلتها
كلتلها انتي ابدال ما جايبة اطفال وياج بالاغنية مال شخبط شخابيط
جان جبتي كم واحد من الحكومة العراقية ، عالاقل الكليب يطلع فيكة
وتحطين هادي العامري ابدال الجاهل المنغولي الي يكول .. تو اتمو ... ـ
بس ما سمعت كلامي هالنانسي لان هي ما تحب العراق
كافي يا شعب تكصون بالحكومة
ما شفتوهم البارحة بالاجتماع الي صار ابيت السيد رئيس الجمهورية المحترم
شفتوا المحبة و التاخي و الضحك ؟؟؟
وبعدين كعدوا اكلوا ... هنيئا مريئا ببطونهم ياربي
اي اي .. لازم ياكلون حتى يفكرون بمصلحتك ياشعب
لا وشوفوا تذمركم وبطركم وين وصل ، حتى الي طالعين بالخارج هم يحجون عالحكومة
لكم يا منافقين لو ما الحكومة جان انتوا عايشين برة هسة ؟؟؟
خلف الله عالحكومة الي خلتكم تشوفون سوريا و الاردن ومصر واوربا
بس انتوا مو شكول خير ، خابصيها للحكومة
والله جوازات ماعدنا .. والله اقامات ماعدنا .. شغل ماكو ، علاج ماكو
ناس بطرانة مابيكم خير .. روحوا شوفوا الفلسطينين شلونهم
مو عايشين برة ، وكونوا نفسهم
من سنة 48 بدوا يطلعون وربوا اجيال واجيال واستقروا بغير بلدان ، ولا شكوا ولا ضوجوا حكومتهم
دتعلموا منهم ياحظي .. شبيكم بس تبجون وتحجون عالحكومة
ادري الحكومة ابتلت بيكم خو ما ابتلت ... بالعراق تبجون طلعتوا برة تبجون
خابصينا بالكهرباء و الحر
شنو رايكم اني سمعت تصريح من مسؤول رفيع جدا بوزارة الكهرباء
يكول بصريح العبارة ... قااااااااااامت كواااااااااادرنا الهندسية
باصلاح الوحدة الخامسة الي قدرتها 70 ميكاواط والسادسة الي قدرتها 160 ميكا واط في محطة الدورة الكهربائية
بس اكو فد مهندس كهرباء جذاب .. من هالشعب المتذمر المزعج
طلع يدردم عالمسؤول .. يكول شلون صلحتوا الوحدة السادسة و الخامسة اذا هي اساساً محطة الدورة بيها 4 وحدات
واثنين منها عاطلة من ايام حرب الخليج ؟؟
بس هذا المهندس منافق كذاب .. بس يريد يحجي عالسيد المسؤول
بس السيد السؤول رد على هذا المهندس الفاشل وكله
عيني عيني ... على عنادك
وزارة الكهرباء و تحت شعار
خل ياكلون مادام خالهم طيب
راح تخلي الطاقة تستقر بالعراق وراح نحقق الاكتفاء الذاتي سنة 2009
وبعد الكهرباء ما ترمش .. والطاقة الانتاجية تصير 14 الف ميكا واط .. ـ
طييييييط
هاي شنو ؟؟؟
عفطة لو غازات ؟؟ اكيد عفطة لان اني ما متغدي فلافل اليوم
.... مو عيب عليكم
السيد المسؤول يصرح وانتوا تعفطوله ؟؟ مو اكولكم انتوا شعب مذتمر ونحس
واني تعبت من الحجي وياكم لان انتوا تسمعون منا وتطلعون منا
بس اريد اكولك شي واحد ياشعب يا متذمر .. كافي تحجي عالحكومة ، صير وياها ايد بأيد
ودير بالك ياشعب تصيح اخ ياراسي ، ترة بس البعثيين الصداميين التكفيريين يكولون اخ ياراسي
ولا تباوع الحكومة بالعين الصغيرة ، ولا تباوع المساوئ بس ، باوع عالمنجزات الحضارية الي سوتها
ولا تضل تقارن بين وضع العراق سابقا و حالياً
قبل جانوا الصداميين يحكمونا ، احمدوا ربكم خلصتوا منهم
ولا تستعجلون على رزقكم ، فالخير قاااااااااااااااااااااااااااااادم ( دووووووق فليييييييد ) ـ
واريد هسة تصفيق حار تعبيرا منكم عن حبكم للحكومة
شكرا وسهلاً "ـ

Comments:
لقد اشرت منذ فترة طويلة الى اختفاء الكاتب شلش حيث كانت هناك محاولات لاستبدال كتاباته الرائعة باخرى لكاتب مبتدىء حاول تقليدالاسلوب السهل الممتنع للكاتب شلش ولكن الفشل كان من نصيبه...وحدثت بعض المناقشات ضمن هذا الموقع لم تأت بنتيجة والى الان لم يعرف احد الحقيقة....ومن الممكن ان يساعدنا الاخ عماد خدوري....حيث لو ان استلام المقالات منه كان يتم من نفس المصدر فهو يرجح فرضية ان شلش قد تعرض الى ضغوط قوية لكي يتخلى عن عنوانه الالكتروني لكي بتم ارسال المقالات الركيكة من خلاله والله اعلم ماذا حدث له...اما ان يتخلى شلش عن هذا المكان الذي كان يتصفحه الالاف يوميا الى موقع مقاومة فهذه فرضية سخيفة لان شلش لم يكن يمثل احد...بل كان يمثل العراق ولذلك اتفق الجميع على روعة مقالاته....
وهو كان يهاجم المقاومة التي تقتل الابرياء بنفس القوة التي يهاجم فيها المليشيات و الحكومة وكل من له تاثير في الساحة.
احاول ان اتتبع كثيرا من المقالات علي اصادف ما يشدني كما كان يفعل شلش...ولكن للاسف لااحصل على ما يروي الظمأ...اتمنى ان اكون مخطأ ولكن ما اعتقده ان صاحب قلم شلش العراقي قد لحق بشهداء الكلمة....حيث ان عراق اليوم لايوجد فيه مكان لمن يقول الحقيقة(هسة طبعا راح اصير بعثي و صدامي بس اني قصدي انه الي اجة مو احسن من الي راح....)
اما اذا كان شلش قد ابتعد فقط عن الكتابة....فهو احتمال قد يكون مقبول...ولكنه ضعيف....
سلامي الى الاخ عماد


ابو علي
 
يعني شنو كاتب مجهول ؟؟
يعني شلش لو مو شلش ؟
 
اسلوب "مباشر" وساخر, اتفق مع الكاتب بطرحه.
واود ان اضيف شئ على الاشارة لهروب العراقيين من ديارهم وانتشارهم لاجئين ببقاع الارض, وهو المجهود الطيب للاخوة الارهابيين, عفوا اقصد المجاهدين الذين نشرت مفخخاتهم ورصاصات الارحمة الدافع والامل بنفوس العراقيين بالعثور على اللامان خارج الديار!
 
جدر الدولمة في العراق الجديد
تساءل السفير الأمريكي( المحب للعراق بطبعه) في إحدى الولائم المقامة على شرفه(إن وجد) عن محتوى صحن كبير موضوع على المائدة من ضمن عدة أصناف تم تحضيرها لهُ و للمدعوين من الساسة النجباء؛ تم التوضيح لهُ بأن هذا الصحن هو (دولمة) ؛ السفير أبدى إعجابهُ بها و تساءَل عما إذا كانت هذه الأكله سنية أم شيعية بالأصل؟!

جاء الرد من مسعود البارزاني و هو يبتسم بخبث :"لا كاكا, هزا دولمة سويها احنا بكوردستان هناك خوش تبخ نتبخ ؛انت يجي يمنا وشوف" ابتسم الجميع في باديء الأمر و ذهبوا الى بيتوهم بعد ان ناقشوا عدة مواضيع تخُص مصلحة الشعب مثل الفيدرالية و تقسيم الثروات و الخطط الأمنية و ما الى ذلك و لم يتوصلوا الى نتيجة بالتأكيد ولكنهم عادوا الى بيوتهم شبعانين و كروشهم ممتلئة هذا بالإضافة الى بعض الصفقات التجارية التي تم الإتفاق عليها هنا و هناك لتسيير بعض المصالح الخاصة و زيادة اللغف خدمةً لقضية ابناء هذا الشعب البار.

الليلة لم تمر هانئة و لم ينعم الجميع بليلٍ مطمئِن؛ الدكتور إبراهيم الإشيقر بقي طوال الليل يتقلب في فراشه دون أن تغمض عينه ؛ و على نفس الحال مرت ليلة طارق الهاشمي؛ كلمات مسعود البارزاني هل كانت محض صدفة؟ ماذا قصد بها؟ هل هي محاولة كردية للإستئثار ب(جدرية الدولمة) ؟!!!
مع خيوط الفجر الأولى وفي الوقت الذي كان ينعم به فخامة الرئيس(جلال الطالباني) بشخيرٍ عالي؛ بدأ الجميع يتحرك؛ دعا الإشيقر الى إجتماع طاريء للإئتلاف الموحد بعد مناقشات صاخبة على الهاتف مع كل من الحكيم و المالكي ؛ بعد جدالٍ طويل أصدر الإئتلاف بياناً تم إرسال نسخة منه للسفارة الأمريكية وضح فيه أن (الدولمة) هي أكلة شيعية و أن ما جاء على لسان البارزاني قد أُخذ على صعيد المزاح.
بعد ساعتين تم عقد مؤتمر صحفي لكل من عدنان الدليمي و طارق الهاشمي و المشهداني: وضح الثلاثة إستيائهم من تصريحات الإئتلاف و محاولاته المستمرة للهيمنة على العملية السياسية و أسلوبه الإقصائي المتمثل في فرض سياسة ديكتاتورية الأغلبية ؛ وشدد الثلاثة على أن الدولمة هي أكلة سنية مئة بالمئة و إن أهل السنة في العراق عرفوا بها منذ الأزل.

الموضوع لم يمر بسهولة ؛ إذ مع العصر ظهر علي أزدي الشهير ب(علي الاديب) في مقابلة تلفزيزنية موضحاً وجود مؤامرة على ابناء المرجعية الشريفة و محاولات البعثيين و الصداميين لطمس الحقائق و تزييفها, إذ أكد (الاديب) أن الدولمة هي اكلة معروفة عند المرجعية و أن من حق ابناء الوسط و الجنوب أن يضموها الى اقليمهم و أن ما يجري الآن من مشاركة جميع الطوائف و الأعراق فيها, إنما هو نابع من روح التسامح و الأخوة التي ينتهجها الإئتلاف حرصاً على وحدة العراق و سيادته.
و وضح الأديب أن الدولمة بترتيبها مستمدة من مأساة المقابر الجماعية حين كان المئات يوضعون في حفرة واحدة بعضهم فوق بعض , كما أكد أن مكونات الدولمة و الوانها من اوراق خضراء و بصل ابيض و باذنجان اسود إنما ترمز الى المرجعية الدينية التي ترتدي العمائم البيضاء و السوداء و تستخدم العلق الأخضر.

حارث الضاري ظهر على شاشات القنوات العربية موضحاً وجود مؤامرة ضد العمق العربي للعراق و ضد ابناء السنة بصورة خاصة ؛ و أوضح أن الدولمة هي سنية لا مجال للشك : و أن اسلوب تحضيرها هو اسلوب اللف مثلها مثل الكبة التي يشتهر بها ابناء الموصل الحدباء كما عُرفت الدولمة منذ القدم في الإحتفالات التي تقام في جامع الشيخ عبد القادر الكيلاني في حين أن الشيعة في العراق معروفين بال(القيمة والتمن ) ولم يسبق ان كانت لهم أي علاقة بالدولمة لا من قريب و لا من بعيد.
و أكد الضاري في مجمل حديثة أن أي محاولة للهيمنة على جدر الدولمة سيتم الرد عليها بعنف إذ لا يمكن السكوت على محاولات البعض للسيطرة على واردات البلد و خيراته وتراثه مستعينين بالمحتل الغاشم و دعا الى استقالة الحكومة الحالية إذ أن الأزمة الحالية خير دليل على فشلها.

من جانبه أكد مقتدى الصدر أن الدولمة هي حالة ناصبية و أنهُ من الواجب على جنود الأمام المهدي(عج) ان يتحاشوها ؛ كما نصح الزينبيات بعدم طبخها و استبدالها بال(شيخ محشي) عند الضرورات لأنها لا يجب ان تكون موجودة على مائدة الإمام المهدي (عج) عند ظهوره.

الموضوع بدأ يأخُذ ابعاداً خطيرة حين هدد مسعود البارزاني بالإنفصال إذا لم يتم الإعتراف بأحقية الكرد في (جدر الدولمة) مؤكداً على وجود العديد من الشواهد التاريخية على ذلك؛ وشدد البارزاني على أن ماجرى بينه و بين السفير الأمريكي كان رغبةً من في تأكيد حقوق الشعب الكردي في مسألة الدولمة و ضمان الفيدرالية في المستقبل.

الرد التركي على تصريحات البارزاني لم يتأخر على الإطلاق؛ إذ أكدت اعلى السلطات في تركيا أن (الدولمة) هي اكلة تركية و أن تركيا ستكون مضطرة لضمان حقوق التركمان في هذه المسألة حتى لو كلفها الأمر أن تتوغل في داخل الأراضي العراقي لمنع أي تهديد كردي للتركمان في العراق.

جيش المهدي باشر بتهجير كل من يقوم بطبخ الدولمة في بيته ؛ في حين باشرت مفارز الداخلية بتفتيش البيوت لمعرفة محتويات جدرية المطبخ إذ تم إصدار قرار بمنع طبخ الدولمة حتى يتم التوصل لحل بشأن هذه الأزمة التي تعصف بالبلاد.
المسلحون من جانبهم منعوا طبخ الدولمة ايضاً إذ أن فيها خلط بين الإناث و الذكور من المواد الغذائية مما يمكن أن يُشكل حالة فتنة و يشجع على الرذيلة و الفساد!!!

تم طرح الموضوع للنقاش داخل البرلمان العراقي و شهدت الجلسات مهاترات كثيرة و إنسحابات متوالية و تبادل للإتهامات من جميع الأطراف و مقترحات تم رفضها من حيث المبدأ.
الأئتلاف الموحد دعا الى وضع فقرة الدولمة في الدستور و التصويت عليها في وقتٍ لاحق أو إجراء استفتاء شعبي لتحديد مصيرها, الأمر الذي رفضتهُ جبهة التوافق بشدة مؤكدةً عدم إستعدادها لتقديم تنازلات في هذا المجال و مهددةً بالإنسحاب من العملية السياسية في حال تمت الموافقة على ذلك المقترح.
تم تشكيل لجان جانبية للتفاوض في الموضوع برمته للوصول الى حالة مؤقتة لحل الأزمة قبل حلها جذرياً؛ تم الإتفاق على تقاسم مكونات الجدر يالتساوي لحين فض النزاع و التوصل الى صيغة نهائية تتزامن مع إقرار الأقاليم و تقسيم الثروات.
لحين ذلك الوقت تم الإتفاق على أحقية الشيعة في كل ماهو أخضر في جدرية الدولمة و بالتالي فأن لهم كافة اوراق العنب و السلك بالأضافة الى حقهم في وضع بعض المكونات الخضراء كالباقلاء(شريطة ان تكون خضراء)؛ في حين سيختصر حق العرب السنة في لف البصل و لهم الحق في إضافة الطماطة إن شاؤا بشرط ضمان عدم وجود أي محتوى أخضر .
الأكراد لهم الحق في إستخدام أشياء أخرى شرط أن لا تكون خضراء و لا يستخدموا البصل نهائياً.
و بقي هنالك بعض الإختلافات بشأن الحشوة و كمية الحامض المضافة الى الجدرية إذ يفضل البعض الدولمة حامضة في حين يفضلها البعض معتدلة وتم الأتفاق على تشكيل لجان فرعية لحل كل هذه المسائل العالقة .

من جانبها اعلنت السفارة الأمريكية عن سعادة الرئيس جورج بوش لتوصل العراقيين الى حل لأزمة الدولمة بطريقة ديمقراطية و شددت على ان العراقيين بدأو يجنون ثمار التحرير من خلال ظهور هكذا ممارسات ديمقراطية.

إمتنع البعض عن ادخال مكونات الدولمة الى بيوتهم إما حرصاً على حياتهم أو إستجابةً للفتاوى الصادرة؛ إشتباكات نشبت في بعض المناطق بسبب الجدال الدائر حول موضوع الدولمة؛ سقط العديد من الضحايا بين قتلى و جرحى.
ربات البيوت في حيرة دائمة لا يعرفن كيفية التعامل مع التقسيم الجديد؛ إذ أن جدرية الدولمة أضحت فاهية و لا تعجب أحداً بعد أن كانت من الأكلات المميزة في المائدة العراقية
 
Thank you


Sorry,My keyboard does not have arabic language :(

As I know..this article is written by Agent 007 Iraq... and this is his way of writing.He is the administrator of Group 007 Iraq, and many other Iraqi websites.

Thank you again for this honest sincere iraqi website.

Ali Baba
 
يا محلا العراق سهولة وجباله .....وهلاهل ماجداته وضحكة أطفاله
وحكمة كل شيوخه وقوة إرجاله.....وتاريخه المجيد وسطوة إسنينه
يا محلا العراق البيه تربينة



يا محلا العراق ومحلا أيامه.....من جاع وتعرّى وتعبت أعظامه
ويمر بيه العطش بس ماحنى الهامة.....ودسنّة إعلة الحصار وبيه تلاوينة
يا محلا العراق البيه تربينة



يا محلا العراق وطيبة أنهاره.....ينابيع الشمال وطينة أهواره
من دربندخان لهور العمارة.....ملح صار الزمان وبيه تحلّينة
يا محلا العراق البيه تربينة




يا محلا العراق وصاحوا الشيعة.....عراق البيه علي وحسين منبيعه
حُكم حبه علينه ولازم نطيعه.....مثل عباس نخوة وغيرة البينة
يا محلا العراق البيه تربينة



يا محلا العراق تجاوب السنة.....ولعرس العراق بدمنة نتحنّة
أبو صالح الحادي بكل فخر جدنة.....وشباب الأعظمية تعلّگ الزينة
يا محلا العراق البيه تربينة




(تأنينة الشهادة وعز عشگنة الموت) .....منبيع العراق ولو على التابوت
سواتر من جثث بس لا عدونة يفوت.....ومن ظاگ الوكت بسمه تنخينه
يا محلا العراق البيه تربينة




يا محلا العراق الأبد ما بيه عيب.....الذنب ذنب السياسة (ذيب ياكل ذيب)
دعوفوه العراق وخل جروحه تطيب.....وخل ترجع الضحكة لوجه أهالينة
يا محلا العراق البيه تربينة
 
والله لو اتدز النا صورت الوالده وهيه بالحمام هوايه احسن من هذا الكلام بس وين راح عنك سعدي الحلي الله يرحمه
 
إرسال تعليق



<< Home

This page is powered by Blogger. Isn't yours?