السبت، 27 أكتوبر، 2007

وين صفينا يالعراق

.
وين صفينا يالعراق

صفينه ايدنه وي الكَاع حتى الكَاع ملّت من خطاوينه.. ـ
وصفينه ركام يامهيوب اسمك .. ليش تريد تمسح كل اسامينه..ـ
وصفينه ايد تلوي الايد بعد ماحار الوكت شلون يلوينه..ـ
وصفينه الدم للركاب يسيل بكل بيت الجفن حضرناه اخاف الموت يلفينه..ـ
وصفينه من الغروب انّام بعد ماجانت سهر كلها ليالينه..ـ
وصفينه نكَول للي يموت روح اخّلص من قهرنا ومن بلاوينه..ـ
وصفينه بالتفكَ متحزمين بس نكتل بعض والموت حادينه..ـ
وصارت كل مدنّا كَبور ظلمه ونلبس بس سواد شوكت ماجيت تلكَينه..ـ
وصفينه عالهويه نذبح الجيران ولا جن سنين الحلوه وياه كَضينّه..ـ
وطولنا اللحايا وكَصرنا الثياب وصار بأسم الدين تطلع كل فتاوينه..ـ
وصفينه نخبط الصافي بنهرنا الماصفه فد يوم طينه..ـ
وصفينه نعيد بالتاريخ ولعصر الجاهليه اليوم ردينه..ـ
ولاجنّه اول حضاره صارت اعل الكَاع ولا جن اول مسلّه احنه سنّينّه..ـ
ولاجن حكمنا الدنيا من بغداد ولا جن المنايا تخاف لو سمعت بطارينه..ـ
ولاجن كَبل واحدنه من ينضام يفز الكَلب من حشاه ويعينه....ـ
.شجــــــــانه اليوم بس كاتل ومكتول ولا رحمه بكَلبنا - كَلي شبينه؟؟..ـ
نبوكَ من الليالي مسامر الخلان ونكَطع وصل حبهم من شرايينه..ـ
نحرّم كل ترافه تخطر اعل البال وندندن صرنا بالبسكوت اغانينه..ـ
وصفينه كلـشي ماحاوين لاحاضر جديد ولاماضي قديم اللي يواسينه..ـ
نهاجر نكَول بلكي يهدّه البال برّه وتتحقق امانينه..ـ
ومن نفرح غفُل نبجي بدمع مهضوم لان فرحتنا تغّص بكل مآسينه..ـ
جاوبني يالعراق وكَلي ليش هيجي صفينه؟؟؟ـ
.
ملاحظة: أرسلت لي هذه القصيدة عبر الايميل ولا اعرف من كتبها
الف رحمة على روح موتاه اللي كتب هذه القصيدة
.
تعليق ورد بالإيميل:ـ
السؤال الذي يحير الكاتب ولا يعرف جوابا له ، جوابه سهل وهو الاحتلال (الذي لم يذكره في طول القصيدة وعرضها ) .ـ

Comments:
شكرا للاخ ناقل هذه الكلمات المتوبة بماء الذهب ..
والاخ الذي يعلق بقلوه لم يذكر الاحتلال ..
اقول له اذا ذكر الاحتلال عليه ان يذكر العربان الغربان الذي يرسلون لنا بالمفخخات والسلاح وفتاوى الموت ليلا نهارا
 
إرسال تعليق



<< Home

This page is powered by Blogger. Isn't yours?