الأربعاء، 31 كانون الثاني، 2007

الحجـّية

الحجـّية

الجمعة، 19 كانون الثاني، 2007

تدور الدوائر

الاخ الفاضل الدكتور خدوري، هذه رسالتي الثانية الى شلش العراقي ارسلها من خلالك. لن اطلب منك هذه المرة نشرها،لأن انت ما قصرت وراح تكول علي طمّاع، كل الي اتمناه ان تصل الى شلش وان يكون هو بخير و صحة ويعود للكتابة بأسرع وقت دمت سالماً ـ
A&Eiraqi
.....
الله يساعدك شلش، شلونك ؟
ان شاء الله زين
يعني هم بعدك مختفي، احنا هم بعدنا منتظريك، بس صدك طولتها للغيبة، انا شخصياً بدت تساورني الظنون شلش؛ خاف ناوي تصير مثل ابو فلان وبعد ما تطلع للتالي، عرفته لأبو فلان؟ هذا الكاعد بغرفته وما يقبل يطلع، كل ما يحجي ويا أحد يكلك الحل والربط يم ابو فلان، هو الوحيد الي بفضله ماكو حرب اهليه، هو الوحيد الي الكل تسمع حجايته، هو ما يقبل يدخل نفسه بالسياسة بس يدعم العملية السياسية، هاي شبيك ماعرفته ؟
هذا الي يومية الساسة الابطال مالتنا (خصوصاً قائمة الأئتلاف ) ملتمين يمه، على اساس يمه الحل والربط، وتاليها ...تيتي ...تيتي
انا دائماً اكول لو يطلع خطية يتمشى شويه، الشمس مفيدة، بيها فيتامين (د)، كلش مفيد للعظام،, بس هو كاعد، حتى ماسمعت فد يوم راح لمكة يحج، ولا سمعت رايح للزيارة، ما أعرف شعنده بالغرفة،ـ
عالعموم ؛ انا كل خوفي لا تصير انت يا شلش مثله و بعد طبيت وما تطلع للتالي، ونظل نتوسل، وماكو ...ـ
ويدور الزمن ويدور....وتدور الدوائر وتدور
اذ بان مجيء القوات الصينية لتحرير الشعب العراقي من الأضطهاد والدكتاتورية، واعادة مانهبهه القادة الى الشعب وتوفير الحياة الحرة الكريمة للعراقيين و رفع الجور و الظلم عن الناس،ـ
هذا الحجي بعد فد شكم عقد من الدمار والخراب وضياع الأول والتالي، و سيكون غالبية العراقيين ملتفين حول مرجعهم الاعلى اية الله العظمى ( شلش العراقي )، مؤكدين على انه الوحيد القادر على لم الشمل وتوحيد الصفوف ومنع الاقتتال فيما بينهم، وعندما تسأل اي واحد عن اية الله العظمى شلش (خصوصاً اتباعه ومناصريه) والذين يتمركزون في مدينة شلش المدورة ( الثورة – صدام الصدر) سابقاً، فسيؤكد انه المرجع الاعلى وان فضله واضح في وقف سفك الدماء وان الجميع يمتثل لأمره، وسيزيد البعض ويغالي، قائلاً :ان شلش انهى كليات الطب والهندسة والعلوم وحصل على ماجستير في الليزر ودكتوراه في الالكترونيات ومبرمج اربع انظمة لمايكروسوفت وعنده نظريات تدحض اراء اينشتاين و نيوتن ( هاي انا سامعها عن هواي من مراجعنا العظام) هذا بالأضافة الى رسائله الاجتهادية وفقهه العالي. وسيغالي البعض اكثر قائلاً ان الامام يجتمع بالأمام المهدي (عج ) ويستلم منه الارشادات.ـ
.وشلش , لا يخرج من غرفته ابداً.ـ
ويؤكد الساسة العراقيين من امثال عمك شناوة ( زعيم اكبر كتلة في البرلمان ) أنه انما يسير بهدي المرجعية الشلشية، وأنه من الابطال الذين طالما ذادوا عن حياض الامام شلش، أو دافع عن الامام وتحمّل في سبيل ذلك الاضطهاد والجور، مضيفاً ان الأمام فوّضه لبناء العراق وكتابة دستوره الجديد،ـ
سيكون هنالك الكثير من الانتقادات لشناوة شخصياً و الذي سيتهم بقيادة فرق الموت وشراء اراضي واسعة وبيوت واحتلال كامل لمنطقة الكرادة والبتاويين.ـ
بالتأكيد سيكون هنالك اعداء ومناوئين ومسيئين , فمثلاً محمد باقر عمارعبد العزيز الحكيم، سيؤكد، من ايران، ان الحكومة الجديدة قامت بقتل ابوه وجده الابطال بأبشع اسلوب،ـ
فبعد ما انحصر ابوه على جسر الطابقين، الذي اكد انه ومعظم منطقة الجادرية من املاكهم التي نهبت، قام اتباع المرجع شلش بتوجيه النعل والشحاطات وكل انواع الاسلحة الخفيفة التي ترمى باليد بأتجاه ابوه وهادي العامري والاشاوس من فيلق بدر حتى انتهى بهم المر في نهر دجلة غرقاً.ـ
ويستمر الحكيم الصغير فائلاً ان جده أُعدم بأبشع اسلوب مع جلال الدين الحقير، وان المنفذين رددوا هتافات مسيئة صائحين (شلش، شلش، شلش )،ـ
ويؤكد الحكيم ان لعائلته افضال على العراق لا تعد ولا تحصى، فالعراقيين كانوا حفاة لا بل عراة ولفهم جده بعبائته.ـ
سيصرح حارث مثنى حارث الضاري ان اتباع شلش ليسوا الاغلبية وانما هم يتعاونون مع المحتل الصيني الغاشم لفرض هيمنتهم على العراق وانه يدعم المقاومة الوطنية، ومن جوا العباية يدعم الأجرام بشتى انواعه. ورغم تأكيدات المرجع شلش المستمرة بأنه لا يتدخل في العملية السياسية، الا ان شناوة بادر الى وضع صورة المرجع على دعايات قائمته الانتخابية مؤكداً ان من نقل هذا الكلام غالط فيه كثيراً،ـ
وسيستفيد شناوة من تهجم عباس البياتي على الامام شلش، سيكون هذا قبل الانتخابات مباشرة وعلى قناة الجزيرة، اذ سيقول البياتي ان شلش ليس الا ابو عرك وكاوليات وانه كان يتمنى يصير شلش ابن مادونا.ـ
ستثير هذه التصريحات سخط الشارع العراقي وسيخرج العراقيين (رغم حضر التجوال المفروض من قبل وزيري الدفاع والداخلية : كريم ساطور وحمودي قامة ) معلنين ولائهم للأمام شلش هاتفين: كل الشعب وياك ياسيد شلش ،،،تاج تاج على الراس سيد شلش يحلاي، حي على خير العمل، سيد شلش هو الامل وغيرها من الهتافات، وسيظهر شناوة متباكياً مؤكداً للشعب بأن هدفه بالحياة هو الدفاع عنهم وعن المرجع العظيم، وانه لن يسكت حتى يسترد الحقوق.ـ
وسيحقق شناوة مراده ويحصل على اصوات كثيرة يفوز من خلالها بغالبية المقاعد في البرلمان و سيكلف خنجر بتشكيل الحكومة التي ستقود البلاد الى الرفاه والأزدهار، وشلش في غرفته لا يغادرها ابداً.ـ
ستكون صبيحة قائدة للتنظيمات النسوية وسيستحوذ آل رحيمة على كثير من المناصب الحساسة في الدولة،ـ
وسأقوم انا بأنتقاد الوضع و وصف معاناة ابناء الشعب، ولن اتوانى في توجيه النقد اللاذع وفضح جرائم شناوة وخنجر وصبيحة والسخرية منهم، وبعد حين سأصاب بالملل والاعياء خصوصاً ان الوضع لن يتحسن، والمدن تعاني والناس من سيء الى اسوأ،ـ
سأتعب واعتكف في غرفتي، لن اخرج منها ابداً ويدور الزمن وتدور الدوائر وتدور وتستعد "فرشته " لتولي المناصب القيادية واعادة اعمار العراق.ـ
ملاحظة : اخي العزيز شلش، لم أقصد اي اسأة في هذه الرسالة وانما قصدت تحفيزك للعودة، والتنويه عن ان الناس يقدسون اشخاصاً رغم انهم لا يعرفون عنهم شيئاً، كل ما كتب مأخوذ من مقالاتك السابقة،ـ
كل ما اتمناه ان تكون بخير وصحة وتعود بأسرع وقت

الاثنين، 15 كانون الثاني، 2007

رسالة الى شلش العراقي

.
الله يساعدك شلش، شلونك ؟ ان شاء الله زين، ماعندك الا كل خير ان شاء الله . ـ
دزيتلك قبل هسه تعليق على شعر جيجان الـّي نزل بمدونتك، ما أعرف وصلك قريته لو لا ؟
بس راح اعيد الحجي من البداية، انا كنت ما اعرفك من كنت عايش بالعراق، ما عرفتك الا شهر ايلول الماضي، عرفتني عليك "فرشته"، انت ما تعرف فرشته بس هي تعرفك وتتابع كل مقالاتك، احنا صح عايشين بلندن بس كلوبنا بالعراق، هي صارلها هنا اكثر من 12 سنة بس عراقية اكثر من جمعيتنا الوطنية بهواي.ـ
أول مقال قريته الك كان عن لص الجادرية وابنه كتكوت الحوزة، من يومها وانا مدمن قرأة ما تكتب .ـ
طالت غيبتك ما نويت ترجع ؟
بقى بالنا يمـّك، فرشته تكول : أخاف راح بتفجيرات السوق الاخيرة بالثورة ؟ يعني هي التفجيرات ما لكت غيرك حتا تاخذه ؟
ساعة أكول اخاف السيد هد عليه المزعطة مالته، كلهم هاذا حرام، يعني قابل انت أعز من الطوبة، اذا هي الطوبة صارت حرام .ـ
وساعة اكول تولوه الارهابيين، كالوا هذا بدعة وكل بدعة ضلالة و علسوه للرجال، ونبقى احنا بالظيم .ـ
مرات اكول اخاف الحكومة سوتها وكطعته عنا، يعني ما كافي الماي و الكهرباء و الامان و الوقود وهواي شغلات ما أتذكرها، انوب هم انت يكطعوك بعد، بس يسويها البخت، الحكومة تريد مصلحة الناس فتسوي كل شي .ـ
ساعة اكول راح للزيارة، هي الزيارات ما تخلص، بس كل الي راحوا يرجعون، بس انت ماكو، ومره اكول هاجر، اي وين رحت ؟
يعني معقولة نسيت؟
حتى الي ينسى يذكروه،ـ
معقوله يأست ! انت كنت نتطي للناس امل ! ـ
شلش ؛ مو لخاطري بس لخاطر هالعراقيين الفقرة، قبل شويه كنت اقرا مقالاتك عن الحل المستحيل والمصالحة الوطنية، وصفك دقيق لصورة الناس، كنت اشوف الالم و التعب بعيونهم، لخاطرهم ارجع، والله الناس محتاجيك .ـ
لخاطر كل الي انكتلوا و عافوا ايتام، ماتكسر الخاطر دمعة ايتامك ؟
يعني هو بخت العراقيين ينحرمون من كلشي، على كولة الملا عبود :ـ
الدادة أم البخت خلخالها يدوي ويدش …ـ
وانا استادي لو زعل يمعش شعر راسي معش ….ـ
هم هاي دنيا وتنكضي وحساب اكو تاليها ؟
مو حقه ملا عبود، اي لخاطر ملا عبود والله عيب تفشله والرجال جايك ويدك بابك، زين لخاطر فرشته، والله تحبك تموت عليك، لحد هسه اذكر رادت تموت من الضحك من انت كتله لأبو اسراء : خو ما جدك نابليون، لخاطيرها فرحها وارجعلنا.ـ
يابا اذا تريدها فضل، ارجع وفضلك مغطينا، تريد نتوسل ؟ هذا انا اتوسل بيك، أحسبها كداوة، انا راضيها لنفسي، خلي العالم تكول علي مجدي والله انا ما اعرف أكتب مثلك وحتى لو أعرف، الناس تريد شلش العراقي مو A&Eiraqiالله عليك اكو واحد يقرا لواحد كل كتاباته كأيبه، بس شسوي غير افرغ الظيم،ـ
شلش عاد فضها وارجع تره نشف ريكي .ـ
انا الي علي كلت كل الي اقدر عليه وبعد تبقى انت وضميرك، بس يرضى ضميرك، عبد العزيز وعصابة العباءة السوداء من صفحة و جماعة الدليمي من صفحة وسروال الكاكا مسعود من كتر وغير ظيم الضاري وربعه ومقتدى والمزعطة مالته،ـ
هذولي كلهم يتولون الناس وانت ما ترد عليهم .ـ
بعد بكيفك، الي يناسبك سويه، بس احنا منتظريك
دمت سالماً يا شلش العراقي
اخوك المحب
A&EiraqiLondon 14.01. 1007

الجمعة، 12 كانون الثاني، 2007

أو هذي هم جمالة

.
كريم العراقي
.
يا وطني هيا بنا بلعب
.
يا دجلة الخير - الجواهري
.
غريب على الخليج - السياب
.
دلي لول

This page is powered by Blogger. Isn't yours?