السبت، 24 أكتوبر 2009

قيم الرگاع من ديرة عفچ

الف رحمة تنزل عليك يا مُلا عبود الكرخي
من قبل 70 سنة كتب هاي القصيدة عن البرلمان
ولـِهسـّه تـِرهم، كأنها مكتوبة اليوم
....
....
قيم الرگاع من هاي اللحه
اتشوفه هيبه وعنده لحيه امسرحه
يشتـّم إبلا خجل وبلا مستحه
من إيحس المقعد اشويه اندحچ
قيم الرگاع من ديرة عفچ
....
برلمان اهل المحابس والمدس
عگب ماچانوا يدورون الفلس
هسه هـَم يرتشي وهـَم يختلس
ولو نقص من راتبه سنت انعقچ
قيم الرگاع من ديرة عفچ
....
اتشوف واحدهم امعگل بالوقار
وبالاصل تاريخه اسود كله عار
ابضرف ثلث اسنين مليونير صار
ايريد عالوادم ايعبرله چلچ
قيم الرگاع من ديرة عفچ
....
گمت ما اعرف حماها إمِن الرجل
ياهو التكضه أهو إيمثل العدل
وگمنه نستورد الشلغم والفجل
لان كلها ضلت اتدور ودچ
قيم الرگاع من ديرة عفچ
....
والله ضيعنه الصدگ من الچذب
اتشوفه هيبه وحچيه المصفط عذب
ياخذك وإيردّك ابشرق وغرب
وبسچاچينه يدچك حيل دچ
قيم الرگاع من د يرة عفچ
....
حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه ابحسچ
قیم الرگاع من ديرة عفچ
....
گمت ما اميز الذيب إمِن الحمل
امنين ما التفت گلبي يشتعل
انه ما شايف شعب يتبع خِبل
شاب راسي وتيهت كل السچچ
قيم الرگاع من ديرة عفچ
....
يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ
قيم الرگاع من ديرة عفچ
....
لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه اندرچ
قيم الرگاع من ديرة عفچ

Comments:
بالضبط التاريخ يعيد نفسه

يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ
قيم الرگاع من ديرة عفچ
....
لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه اندرچ
قيم الرگاع من ديرة عفچ


ولكن هل يتعض الشعب من التاريخ
ولماذا يعاد التاريخ اليس السبب اننا لا نتعض منه فنعيش في حلقة مفرغة؟؟

البرجوازي العراقي
http://birjwazi.blogspot.com
 
إرسال تعليق



<< Home

This page is powered by Blogger. Isn't yours?