الأحد، 3 يوليو، 2011

وين صفينا يالعراق؟ـ

وين صفينا يالعراق ؟ـ
المؤلف -غير معروف لنا-ـ

صفينه ايدنه ويَ الكَاع، حتى الكَاع ملّت من خطاوينه..ـ
وصفينه ركام، يا مهيوب اسمك، ليش تريد تمسح كل اسامينه..ـ
وصفينه ايد تلوي الايد، بعد ماحار الوكت شلون يلوينه..ـ
وصفينه الدم للركاب يسيل بكل بيت، الجفن حضّرناه، اخاف الموت يلفينه..ـ
وصفينه من الغروب انّام، بعد ما جانت سهر كلها ليالينه..ـ
وصفينه نكَول للي يموت، روح اخّلص من قهرنا، ومن بلاوينه..ـ
وصفينه بالتفكَ متحزّمين، بس نكتل بعض، والموت حادينه..ـ
وصارت كل مُدنّا كَبور ظلمة، ونلبس بس سواد، شوكت ما جيت تلكَينه..ـ
وصفينه عالهويه نذبح الجيران، ولا جنّه سنين الحلوة وياه كَضينه..ـ
وطولنا اللحايا وكَصرنا الثياب، وصار بأسم الدين تطلع كل فتاوينه..ـ
وصفينه نخبط الصافي بنهرنا الماصفه فد يوم طينه..ـ
وصفينه نعيد بالتاريخ ولعصر الجاهلية اليوم ردّينه..ـ
ولا جنّه اول حضارة صارت اعلى الكَاع، ولا جنّه اول مسلّه احنه سنّينّه..ـ
ولا جنّه حكمنا الدنيا من بغداد، ولا جن المنايا تخاف لو سمعت بطارينه ..ـ
ولا جان كَبل من واحدنا من ينضام، يفـزّ الكَلب من حشاه، ويعينه....ـ
شجــــــــانه اليوم بس كاتل ومكتول ولا رحمه بكَلبنا، كَلي شبينه؟؟..ـ
نبوكَ من الليالي مسامر الخلان، ونكَطع وصل حبهم من شرايينه...ـ
نحرّم كل ترافه تخطر عل البال، وندندن، صرنا بالبسكوت اغانينه..ـ
وصفينه كلـشي ما حاوين، لا حاضر جديد، ولا ماضي قديم اللي يواسينه..ـ
نهاجر، نكَول بلكي يهده البال برّه، وتتحقق امانينه..ـ
ومن نفرح غفُل، نبجي بدمع مهضوم، لان فرحتنا تغّص بكل مآسينه..ـ
جاوبني يالعراق وكَلي! ليش هيجي صفينه؟؟؟ـ

الركعة صغيرة والشك جبير - عزيز علي


Comments: إرسال تعليق



<< Home

This page is powered by Blogger. Isn't yours?