الأحد، 27 فبراير، 2011

ـ"أبو إسراء - أول مرة اشوف واحد هم كذاب وهم مو ديمقراطي"ـ


ـ"اي انت تورطت بدمنا ابو اسراء،، قواتك المقرّبة تورطت بدم شبابنا، ودم شبابنا غالي، واجهتنا بالرصاص الحي وسقط الورد من ايد بناتنا، ونزلت دموع امهاتنا، دمعت عيون الشوارع والارصفة والساحات، النخل والاشجار والبنايات كلها نزلت دموعها علينا، ملائكة السماء صاحت عليك : لا، حرام عليك، انوب انت عليهم، مو كافي الارهاب والميلشيات حصدت اعمارهم، انوب انت عليهم، ليش مو خطية، مو نصهم انتخبوك عبالهم رَجال وتحترم دمهم، ليش خرّبت عيدنا الوطني وليش سرقت فرحتنا؟ احنا شمسوين؟ شفتنا حركنا بناية، شفتنا خربنا شارع؟ شفت ويانا مندسين، شفت بعثيين، شفت ماجورين وقابضين ثمن من دول الجوار؟ اي وينه الثمن جان بين علينا، ليش تطلق الرصاص الحي، احنا شرايدين، والله ما طالبين شي، شوية ماي وكهرباء وحصة تموينية ولا تسرقون فلوس الفقراء. شطالبين اكثر من هذا؟ ليش تطلق علينا الرصاص الحي؟ احنا عبالنا انت مثل ابونا وراح تسمعنا شنريد، بس للاسف بدل مل تسمعنا، تورطت بدمنا، وللاسف يا ابو اسراء صار بينا وبينك الدم، وانت سمعتنا واحنا نهتف بالروح بالدم نفديك يا عراق،ـ

وهاي اول مرة بحياتنا نهتف للعراق مو للقائد العام،ـ

انت ما قصرت، سرقت الهتاف من حناجرنا وسفكت دمنا على ارض العراق وبساحة التحرير، الله كريم با ابو اسراء، وموعدنا ساحة التحرير."ـ

الــعــيــد الــوطــنــي

ـ26 شباط 2011


الخميس، 24 فبراير، 2011

يا بووا - شلش صار على (وجه الكتاب) الفيس بوك ... و "علي بابا والاربعين برج"ـ


ـ"اخوان، عندي طلب بسيط، وأعرف مَتقصّرون!ـ
باجر ورا المظاهرات، محتاج كم واحد منكم يجون وياي للمنطقة الخضراء.ـ
خطية الحكومة مضيعين أربعين مليار دولار، اي والله البارحة سمعت اسامة النجيفي يكول عدنا اربعين مليار دولار امريكي مصيرها مجهول وكاعد اندوّر عليها!ـ
فتعالوا وياي نساعد الحكومة، وبلكي نلكاها! حرام ترى هاي فلوس مال ايتام، اي والله، مال ايتام وارامل ومساكين ومُهجرين ومُهاجرين، بس الحكومة ضيعتها! حكومة ثولة، كل ما نحط ابيدهم شي يضيعوا، إنطيناهم أصواتنا ضيعوها، إنطيناهم ثقتنا ضيعوها، إنطيناهم العراق ضيّعوا. متكلي بعد شننطيهم؟ شبيكم؟ ثولان خو مو ثولان؟ اكو واحد يضيّع اربعين مليار دولار؟ صح، هو مبلغ بسيط و تافه ولا يساوي غير ميزانية اربع دول مجتمعة هي سوريا والاردن واليمن والبحرين! نمونة، قحط، مشايفين؟ هي اربعين مليار!"ـ

علي بابا والاربعين برج

ـ24 شباط 2011


الأحد، 20 فبراير، 2011

ـ"أنتم ، أبو إسراء ، المُغرضين والمُندسين والمأجورين"ـ شلش


ـ"نقسم بالله العظيم وبتربة العراق وبرافدييه وقبابه ومناراته العاليات ، نقسم بالآم امهاتنا وعيون حبيباتنا الحلوات ، نقسم بصبرنا وجوعنا وفقرنا وإنحناء ظهورنا ، نقسم بعباءة الحجية التي مزقت جنسيتها ، وبالشاب الذي أهنتم كرامته صباح امس في ساحة التحرير، ونزلت دموعه امام الشاشات ، نقسم لك ، وانت ما محلفنا ، باننا لا مدسوسين ولا مغرضين ولا مأجورين ولا ابناء الدكتاتوريات ، ولا نريد اعادة عقارب الساعة الى الوراء ،،،ـ
اية ساعة يا ابو اسراء؟ واي وراء؟ لقد أعادتنا حكومتك الى ما قبل قبل قبل النظام السابق بالف عام . فاي عقارب ساعة ، الله يخليك؟ـ
نحن يا دولة رئيس الوزراء شعب منصوب عليه ، سُرقت امواله وخُرّبت احواله ومُحيت ذاكرته ، أحِلتم حياته الى جحيم ، لا حصة تموينية ولا كهرباء ولا ماء ولا مجاري صرف صحي ولا خدمات ولا كرامة ولا وظائف ولا أمن ولا بطيخ"ـ

لا يا دولة رئيس الوزاء

ـ20 شباط 2011


السبت، 19 فبراير، 2011

شلش يعود الى الباب الشرقي - 25 شباط 2011


وصل استلام صورة جماعية

ـ"كتابات" - شلش العراقي
ـ19 شباط 2011

بعد خمسة اعوام من توقفه عن الكتابة .. شلش العراقي ينضم الى " يوم الغضب العراقي "


This page is powered by Blogger. Isn't yours?