الأربعاء، 24 أكتوبر، 2012

شلش يعلقها على الفيسبوك

.
  Shalash Eliraqi  طركاعة تهف متابعي شلش العراقي على موقعه في الفيسبوك
 
و بعد أن إنهالت عليه مئات الردود والدموع والآهات، نصحهم شلش بتصويب إجاباتهم بالأتي:ـ  

ـ"اخوان ممكن الاجابة بوضوح بعد تفكير عميق وبدون شعارات وسخونة لفظية وكلمات جاهزة ، ماذا يعني العراق لديك؟"ـ

عراقي شاب مغترب يقطن تورونتو، كندا ردّ عليه بالآتي
 
 
ـ" اليوم شلش العراقي سألني شنو معنى العراق بالنسبه إليـَه ؟ـ
جاوبته ذكرى عشتها بيوم وإنباكت من ايديـَه !ـ
حياة حبيتها ومن شفتها تموت ومجتفه ايديه ...تركتها غصباً عليـَه
العراق طوبه بالشارع ودعبل ، ختيلان وشرطه و حرامية
العراق شارع فلسطين وثنين وخمسين، الربيعي وبوتات الأعظمية
العراق ملعب الشرطه وتحرك بكلب عامر لأن إنت تكره الشرطه وتشجع الجوية
العراق تصنيف وأصدقاء وبمدينة الألعاب جيب بطن واضحك على الشروكية
العراق مطعم السندباد والمشوار والساير والبندقية
العراق ابتدائية الإبتكار والإيام النموذجية
العراق متوسطة الفرات والتوسل بالمخابرات يرجعولنه الطوبه يومية
العراق أستاذ فائز و جمال، ست بهيجه، وأحلام أم اللغه الإنكليزية
العراق درب ثانوية دجله وإضرب أخر درسين بالنضامية
العراق بندقية صجم وسوك على الطيور بمزارع الراشدية
العراق سفرة المدائن وعقرقوف وجزيرة بغداد السياحية
العراق سرسنك وشقلاوه، الموصل والحبانية
العراق النجف وأبو حنيفة، دير متي وصباغه جماعية
العراق بطولات التنس بالصيد و بازارات العلوية
العراق ذب الرقم جيب الرقم وإذا شاله أحد بالغلط .. كتلتك مظاهرة جماهيرية
العراق كرندايزر وساسوكي والهداف وأحلى أفلام كارتونية
العراق تحت موس الحلاق وذئاب الليل وأفلام هندية
العراق الوكفة وسوك الغزل، بس لا تنسى دفتر الخدمه وهوية الأحوال المدنية
العراق لمت أهلي وأحبابي حزام ضهري وشحده اليندك بيـّـَه
بس العراق إتشوه ودمروه ولو بس أكلك منو المسؤول بهذه القضية
شعبه السكت لسنين ويبجي يكول أني الضحية
شافو وطنهم ينقتل و بصوت ناصي يتشاورون "شكد خطية"
اعدائه يريدون يحطموه ويسيطرون على ثرواته النفطية
لا عمي شدتحجون هذه مؤامرة ضد الأمة العربية والإسلامية
واليحجون عددهم قليل فكلش سهل ينسبوهم للبعثية
وعلى هذا الحجي والمنوال يتمالخون على الإنترنت يومية
وهم لا كالو لأبو الزيتوني لا تبطش، ولا كافي بوك يلجيت على دبابه أمريكية
ولا حتى لأبو عمامة اطلع وإرجع القواعدك الإيرانية
لو بسكم إرهاب وقتل مدفوع حسابهم من قطر والسعودية
سنه سنتين أو يمكن ثلاثين راح إتدوم هاي الوضعية
صدكني ما يتغير شي وراح تبقى هي هي
ـوهذا العراق بالنسبه إليـَه"ـ
Ray Siger
ـ22 تشرين الأول 2012

Comments: إرسال تعليق



<< Home

This page is powered by Blogger. Isn't yours?