الجمعة، 29 مارس 2013

بدلا من ان نطلع مظاهرات ضد الفساد، نطلع موكب عزاء على حظنه الاغبر

قديمة، بس ...

"رئيس البرلمان اسامه النجيفي يقول مضيعين اربعين مليار دولار!!.ـ
اي والله! اربعين مليار دولار، يمعوّد مو انته مصلاوي والمصلاوي اذا ضاع منه دينار يعلن
الحداد شهرين .!!  ـ
يمكن الحكومه كانت صاعدة باص وانضربت جيب ؟ـ
فاذا اكو واحد شاف نشال شايل اربعين مليار يبلّغ اقرب حسينية، حتى نطلع كلنه نلطم ونضرب زنجيل وقامة على هل المصيبة السودة. ـ
لو يمكن استثمرت الحكومة الاموال في البورصة بشرائها صفقة بيتنجان، ثم هبط سعره بعد ان زادت الصين من انتاجه وادخلت للاسواق البيتنجان المقلي وراثيا، فراحت الاربعين والبيتنجان معها.  ـ
بدلاً من ان نطلع مظاهرات ضد الفساد، نطلع موكب عزاء على حظنه الاغبر وقسمتنه الطايح حظها. ـ
كم مرة كلنالكم ياحكومة من تصعدون الباص خلو اديكم على جيوبكم، وكم مرة نصحناكم, البيتنجان ما ينفع، استثمروا في الشعير لكثرة المطايا في عالمنا.  ـ
هاي اللي ردتوها؟ ـ
اكو واحد يضيّع الف مدرسة وخمسين مستشفى وعشر محطات توليد كهرباء وعشرين مجمع سكني تكفي لأسكان مليون لطّام، واربع حدائق حيوان نسكنها بدل مدن التنك، والاف الكيلومترات من الطرق وعشرات الجسور؟ ـ
هذه ليست مصيبة! انها كارثة بكل المقاييس!ـ
يمكن يا أخوان اني بطران ومتأثر بهذولة الكفرة الاجانب اللي بلا دين وما يلطمون على ابا عبد الله، بس يا ويلة وسواد ليلة السياسي اللي يضيع فلوس الشعب، ـ
مرّة وزيرة هولندية لكفها صحفي مفوّلة بانزين لسيارتها الخاصة ومقدمة الوصل للحسابات،ـ
ما اريد احجيلكم شنو الرزالة اللي اكلتها إلى ان استقالت، والمسكينة تحلف انها استخدمت سيارتها بعمل رسمي!! ـ
يكولولها العمل الرسمي يمكن يحتاج ربع  تفويله، الباقي وين صار؟؟ ـ

اني اريد اسألكم، بلكي واحد مطفّي مثلي يكلّي كم ربع زحلاوي نشتري بالاربعين مليار حتى نظل سكارة العمر كلّه وما نشوف ولا نسمع واحد يكول ضيّعنا اربعين مليار ومايشنق نفسه!!. "ـ
2011-03-07 
بقلم: سرمد الجراح
.

 البقرة الحلوب

La vache qui rit®

.





Comments: إرسال تعليق



<< Home

This page is powered by Blogger. Isn't yours?